專題人物：鐵皮檔姊妹花 守護60年中環情味
1 :
GS(14)@2013-05-12 13:55:31http://hk.apple.nextmedia.com/news/art/20130508/18253242
經過姊妹花的兩個鐵皮檔，很易走漏眼，她們一不高聲叫賣，二不緊守檔口，經常把酸蕎頭、涼果置之不顧，熟客都懂得放聲大喊：「買嘢呀！」妹妹王麗花這才急步回巢，原來她正在姊姊王木卿的檔口打牙骹，一副不在乎的模樣。
「哈哈，冇生意咪過去搵佢傾偈囉，你照顧我，我照顧你！」中環打工仔終日掛着撲克臉營營役役，衝鋒陷陣，在中環出生的王麗花卻每天笑口常開。兩檔皆沿用其父之名「順記」，一檔賣蒸糕，一檔賣涼果，街坊稱她們為「大妹姐」及「二妹姐」。
想當年王家八兄弟姊妹，兒子負責上學及玩樂，女兒則看檔及走鬼，二妹姐九歲便在士丹頓街住所樓下賣豆腐花，「初頭木頭檔，走鬼？點走呀，由佢拉囉，架車嚟到，就叫：『妹妹，又係你？上車啦！』拉到熟晒㗎喇！」上庭認罪罰一元，「算多㗎！嗰陣一碗豆花先賣斗零」。執法無私，幸而行家有情，「嗰陣環境唔好，肚餓嗰陣，你有叉燒包賣，我有豆腐花賣，咁你畀叉燒包我食，我就畀碗豆腐花你食」。
隔離檔邂逅賣牛肉老公
12歲目睹父親離世，還好當時已獲市政局發出牌照，告別打游擊歲月，而檔口則搬到卑利街，即是現時大妹姐的檔口，以及結志街重建地盤旁邊。「呢度拆第二次喇，頭一次拆，我食沙呀！」二妹姐站在地盤外，眼神飄到遠方，推土機過處，塵土及回憶翻滾，40多年前，就在這個位置，她遇見日後的丈夫，那時她不過12、13歲。
「喺我隔離賣牛肉識㗎，就係呢度囉，佢好勤力，好少出聲，收工陪我一齊行返屋企，日日幫襯我，收唔收錢？梗係收啦，哈哈，環境唔好點會唔收？」跟時下的速食愛情相比，夫婦的相戀過程猶如白開水，平淡無奇，卻相互依存。「嗰陣都唔乜嘢叫拍拖，佢喺鄉下嚟，香港冇人冇物，朝早4點幾出嚟劏牛，嗰陣大家都係由朝做到黑。結咗婚33年，佢對我好好㗎」。雙方年齡相差12載，丈夫現年70歲，已經退休，閒時弄孫為樂，間中為老婆煮幾味。
大時代的洪流，沖走了舊人舊物，「啲街坊走晒，個個都唔識，買完嘢都唔會同你傾多句」。人情漸冷，但二妹姐始終堅持用心待人，記者首次幫襯她時，正好遇着同街檔主詢問入貨地點，明明是商業秘密，二妹姐也如實相告，「（油麻地）果欄、（上環）三角碼頭囉！」不怕爭生意？「喺我隔離擺檔都唔緊要㗎，人多拍埋一齊賣，仲好生意呀！」姑勿論這道理是真是假，但在今天爾虞我詐的商業社會，她的豁達肯定絕無僅有。
她的「順記」也從豆腐花檔演變成今天的涼果檔，現代人講健康，當年的濃油赤醬幾近從飯桌上絕迹，檔口的生意也不復當年勇，「以前過時過節，一日做到1,000蚊生意㗎，而家做成日100蚊都試過，我家姐好生意過我㗎，唔信你過去問下佢，哈哈！」
兩姊妹性格南轅北轍，命途也迥異，二妹姐有兒有孫，大妹姐卻早在40歲便守寡，自此生活擔子一肩挑，30年悄然過去，一對子女已長大，雖同一屋簷下，鮮有時間相伴。大妹姐因擺檔久經日曬，兩年前雙眼患上黃斑病，動手術後視力大不如前，「我成日找錯錢畀人，50蚊當咗20蚊，啲客通常都會畀返我」。
都市人冷漠，街坊碰面如同陌路，然而姊妹情始終不變，放假總會相約上茶樓，妹妹跟老公旅行，也會預姊姊的份兒。兩姊妹的住所都在中環歌賦街，朝夕相對，即使感情再好，難免磨擦，「發起脾氣上嚟，我唔睬你，你唔睬我，一陣間又睬返，通常都係佢氹我。」大妹姐說。
二妹姐健談，自言惡死；大妹姐看似寡言，實質隨和，因此常被欺負，她說：「有陣時唔知佢（顧客）買乜嘢，望一望啫，佢就問：『係咪做生意㗎！』。」二妹姐總會適時救駕：「唔好蝦我家姐呀，蝦我家姐我唔放過佢㗎，天腳底我都追住佢！」