好不主席：男模 vs口靚模
1 :
GS(14)@2012-08-07 12:18:50http://hk.apple.nextmedia.com/financeestate/art/20120807/16581371
先兩日幾位唔同部門嘅女同事不約而同都話要出去中環做啲嘢，事有蹺蹊，怕且係有名店減價。後來先知原來係有名店開張，仲搵咗成班筋肉人喺中環做秀，搞到原本「應該」舉止高貴嘅中環 OL都失晒儀態「嘩鬼叫」，不過話唔定嗰班人都學似我啲女同事咁係跨區趁墟，先至壞了「中區麗人」的名聲。如果唔係又點會個個都表現得「如狼似虎」，仲係咁肆無忌憚同啲男模「攬抱摸錫」。
平時我哋男士稍為目有斜視，或者只係動口品評兩句，莫講話夠膽動手，就已經俾人指住嚟鬧「賤格、猥瑣、麻甩、鹹濕」。男女果然有別，雙重標準嘅對待咪就係性別歧視囉，本來發生呢啲事就應該由平機會表態指正，但我估佢哋嗰位林主席家陣淨係得閒去勸喻啲官員要坦白自首。既然欲訴無門，咁不如講吓尚可與男模匹敵嘅「模」。
事緣早排公司搞活動都請咗批「模」出來，無非為咗提升氣氛，當中遊戲少不免，見佢哋擒高趴低都面不改容，仲要全程着住三點式㖭……咁喺沙灘舉行呀，唔通晚裝出場咩，不過都係爭在啲布料再少啲啫。總之在場嘅同事就情緒高漲，我開始明白點解啲富豪咁鍾意搵一大班女上自己隻船開 P。
其實最弊就係蔡東豪早前唱通街話我又唔會攬「模」，更加冇話會做帶氧或伸展運動，所以嗰次班女仔對住我都甚為客氣，即係好「生外」。不過照計佢哋冇理由知悉「盧主」嘅身份，所以應該係我完全欠缺嗰啲公子同富 X代嘅氣質，或者直接嚟講就係財魅不足，難望有化學反應。
不過也好，當日我公司的公關人員早已嚴陣以待，一就梗係驚我把持不定、二就怕啲女飛擒錯咬，不過最擔心都係怕有「狗仔」暗伺在旁。幸好嗰幾日嘅娛樂版同之後嘅「卜 B」都不見報道，所以同事稍鬆口氣，然後又畀咗份新嘅企劃我過目，咦，又再請 Model？不過啲參考圖片全部係嗰啲大隻紅褲壯男。咁即係工作之餘，亦趁機會自娛，真係諗得周到！
邊看邊罵 一樣虛偽
其實「模」熱潮這一兩年略有退減迹象，不過勝在貨如輪轉，那怕新陳代謝，亦總算喺呢幾年造星無力嘅娛樂產業殺出一條血路。「模」有的是無敵青春，缺的只是叫價本錢。唔好誤會，我只係想點出她們的市場價值所在。
請一位薄有名氣嘅明星或模特兒擔任代言人，拍廣告片又或現身產品促銷同宣傳活動嘅費用動輒以百萬元計，但係聘用呢班幼齒就確係「好使好用」。雖然這些「模」未必能滿足中高消費階層嘅口味，所以啲名牌奢侈品都唔會簽佢哋，不過只要略添三錢拼博、減二両錫身，捕捉眼球嘅效益唔見得比嗰啲名人效益低，而市民大眾咪一邊罵「家陣啲女仔幾 XX」，一邊看得津津有味，虛偽之處同嗰啲中區麗人沒有兩樣。
盧先亞