中門大開：自己玩死自己
1 :
GS(14)@2012-08-01 10:44:38http://hk.apple.nextmedia.com/financeestate/art/20120801/16565006
一本左版國民教育手冊，引發之爭議，連帶中國運動員在倫敦奧運的優異表現也冇乜人關注，真係超低能。本來最佳提高國民身份認同係奧運、世界盃呢類大型運動盛事，超慢鏡溶接國旗緩緩升起，運動員眼泛淚光，所煽起的民族激情，好過去十次內地交流團。
國民身份唔係靠上堂
點不知今屆倫奧先有轉播權之爭，令無綫及亞視遲遲唔做宣傳，連帶中國運動員介紹也欠奉。到倫奧揭幕前，反國民教育之火已燒起，冇人會注意中國隊備戰，到中國女子射擊易思玲首奪金牌，更上唔到頭版。有時真係唔明，內地一套意識形態宣傳，連內地80後一代都唔多受落，點解有人以為可以搬落嚟用，而香港人會受落呢。
國民身份建立，根本冇可能由一個學科，由老師去教，正如無綫早前盛女節目教人溝女嗰位性天奴，話追女可以上堂學習，一聽就知搵老襯。情感點可能在課堂上育成呢？只有在日常生活中潛移默化，在文學、藝術、語言、歷史等體驗，而不是在課程中。在殖民地時代小學生學文言文《陋室銘》、背「尺牘」、學成語、課外書睇《西遊記》連環圖，就已經係國民教育。到初中國文念《愛蓮說》、《慈烏夜啼》詩，已是在傳遞傳統文化價值，初中中史課更是民族認同建立之重點。
一場教改，將國文科變成實用語文訓練，更將中史科變成選修，但卻另立通識、公民教育，試問一開波就要學生面對中國時事，你話係咪自己搵嚟搞。情感培育是要自然，要給予學生思考空間。
一首唐詩，已包含了多少中國文化歷史精粹，言有盡而意無窮，所謂少年國家情懷，就係由唐代邊塞詩所孕育而成，而非老師強灌「中國人民代表大會制度」。
教育官僚們，明白嗎？羅范椒芬，你明白嗎？
添馬男