講膠所手記：睇嘢，唔係睇一日咁膚淺！
1 :
GS(14)@2012-04-19 22:20:57http://www.sharpdaily.hk/article/fin/20120419/80355
昨日見報，《爽報》財經版嘅頭條，我哋揀咗「歐文龍案翻舊賬 濠賭股危危乎」呢隻故仔，而昨日，濠賭股係靚升嘅，隨即，有條「神級茂莉」話：「唓，啲賭股唔跌喎……」作為有份扑鎚頭條故仔嘅一員，YY都係時候講吓我哋「度」頭條嘅理念！
每一日嘅頭條，我哋都會以mark to market為大前題，希望做到話畀大家知嚟緊應該避開啲乜嘢股、有咩可以炒、有咩股要留意，而我哋考慮嘅時間性，唔係「聽日」，而係「呢一排」，因為，無論係案件、國策，都唔會係「一日」就算，正如前日嘅頭條「薄熙來拖跨重慶板塊 恐秋後算賬 重農行首當其衝」，都係話呢一排。
或者，你會話YY，你死雞撐飯蓋啫！即係咁，昨日新鮮出爐嘅《壹周刊》，都做隻《歐文龍貪污案 香港富豪大鑊》嘅故仔！
YY絕對唔夠膽認叻，只係想講一句，每日諗頭條嗰陣，YY同拍檔都過到人過到自己，因為，我哋真係有帶埋個腦返工！
YY