📖 ZKIZ Archives

移民專家關景鴻：香港始終最好

1 : GS(14)@2011-02-27 13:15:05


「保證申請成功，否則原銀奉還」，景鴻移民董事長關景鴻由 90年開業至今便沿用這經營策略。替人搞移民超過 20年，由早年目的地以美加為主，到今天內地同胞愛擇居香港，本身亦早於 80年移居加拿大的關景鴻說：「去過咁多地方生活，香港始終最好。」
記者：黃碧珊　攝影：程志遠
關景鴻胞姊 73年移居加拿大， 80年， 23歲的關景鴻隨父母，以家屬團聚身份移居加拿大，「我係個幾孝順嘅人，爸爸媽媽開心，我都尊重佢哋意見。」為自己辦理加拿大移民審批，關景鴻首次跟移民官打交道，「嗰時無家咁 formal，好似記者室咁，成班人坐埋一齊，過程好輕鬆簡單，大概問咗 10分鐘，見完已馬上畀答案話『無問題，恭喜你哋』。」
助加國華僑團聚
人在異鄉靠朋友，「唐人街好細，由中國同台灣去嘅華僑文化水平低，我識中文，英文識啲、四邑話又識啲，佢哋會叫我幫手搞報稅、學生證件續期、擔保等嘅簡單工作。」關景鴻起初只是出於互相幫助的精神，不收分文，但同鄉總會以利是答謝，每封數百加元，「收到呢啲額外收入好開心，嗰時年薪得 3萬至 4萬加元，每年多幾千蚊喎！」
90年，關景鴻在加拿大開設移民顧問公司，並且加、港兩邊走，當年正值香港移民熱潮，他在高峯時，平均每月有 50至 60宗個案。除協助香港人移民加拿大，亦有加拿大華僑找他幫忙，「 90年代初，中國尚未完全開放，要移民到加拿大，要有親戚喺嗰邊。」關景鴻憶述，當年經常要返內地見客，但協助內地人移民加國與家人團聚，每宗收費 500至 1000加元，「幾個家庭團聚都唔夠畀交通、酒店錢。」
現時國內客佔 98%
以前無論內地、香港，以至台灣客戶，移民目的地大都選擇美國及加拿大。不過，近年隨着中國經濟起飛，背靠中國的香港反而成為內地同胞的移居熱點。現在景鴻佔 98%為國內客戶，有一半客戶選香港為移居地點。
雖然關景鴻是移民顧問，但他說，「我去過咁多地方生活，始終香港最好，天氣唔錯，而且地運好，你諗吓舊年颱風咁嚴重，鮎魚明明嚟到呢度，都閃咗去台灣。人要講運氣，香港地運好，又有祖國做靠山。」對於香港空氣質素較差，「世事無完美，即使去到世外桃源，新西蘭空氣好，但羊多過人！」他笑指，香港人靈活多變，但新西蘭在黃昏 6點後，大部份商店已關門，要食消夜都有困難。
推退款保證被圍攻
推出保證退款，目的是透過自我規範，保障專業形象，關景鴻說，「當年有人認為，移民顧問係唔正氣行業，專門接唔合情理嘅邊緣個案，收咗錢，但申請唔成功。所以學外國消費模式，買嘢有退款保證。」
退款保證，在商言商，是賣點；在消費者眼中，是理所當然。不過，在行家眼中，卻是「頂爛市」。關景鴻因而被加拿大行家「圍攻」，但他堅定地回應，做到先收錢，「 We are professional。」做會計出身的關景鴻深信「專業」的重要，專業知識令他協助加拿大唐人街一班華僑朋友，亦讓他認識合作夥伴，更助他開展一盤移民生意。
把握加國技術移民商機
由一般會計晉升至私人機構的財務總監，關景鴻的圈子不再局限於唐人街，「做財務總監識得老闆級華人，佢哋網絡大，願意我提供呢種增值服務。」為幫一眾老闆及其朋友辦理移民，關景鴻經常出入移民局，從毫無認識到學懂移民程序，並因此與移民官混熟。關景鴻其後索性放棄會計工作開移民顧問公司，更獲兩個移民官辭職加盟。
92年關景鴻得到太太鼓勵，拿着皮篋回港，以哥哥工場為臨時辦公室及休息室，正值香港過渡期，主要客路為香港人，「每日帶住嗰日要見客嘅文件，去 coffee shop、客人屋企傾，由朝早 9點做到夜晚 11點，試過喺地鐵瞓着，有時去到總站要坐返轉頭。」
機會多給予有準備的人， 94年中國與加拿大簽訂備忘錄，加拿大接受技術移民（如廚師、秘書等）申請。「我喺中國有個秘書，係大學畢業嘅廣州朋友，每星期 call 20至 30個舊同學嚟，我同佢哋講解技術移民，好似一個小型講座。由於全部係大學畢業生， 10個申請 10個都夠資格。」 97回歸移民潮提早結束，香港生意由 94年平均每月 50至 60宗，急速下降至 95年每月僅 5至 6宗，但憑着加國技術移民的商機，令他熬過這段低潮。
生意不絕靠關係
創業初期，關景鴻走遍中、港、加拿大見客，現在業務既已上軌道，卻仍經常親身見客，他說：「大家朋友傾偈，唔算見客。你可以話（我）有見客、無見客都得，今時今日工作似一個大公關。」正所謂「四海之內皆兄弟」，對關景鴻來說客戶是其朋友，「有呢個心態先可以有長遠關係，移民顧問係服務性行業，透明度高，用心去做係好重要。我唔係刻意靠關係做生意，但有好關係絕對有影響。」
現時單計生意宗數，是 90年代高峯時期超過一倍，對於去年 10月起，香港提高投資移民門檻，他說，「生意確實減少接近五成，但我睇法樂觀，因為投資相連保險產品就快納入投資移民範圍，我哋已經做好部署同培訓」，相信全年可保持 1600至 1700宗生意。
為何有此信心？「 10間上市民企， 7至 8間老闆係我好朋友，我有提供意見。投資香港門檻雖然提升到每個家庭 1000萬，但佢哋唔單止有呢個數目，身家斷億計。」
後記
除了幫客戶搞移民，關景鴻亦協助不少家長安排子女到海外留學，「好多小朋友喺國內有褓姆同保鑣，前呼後擁，但到咗外面，只得一個人，可以獨立啲。」
他的兩名女兒，亦分別在美國及加拿大讀書，畢業後將回大中華地區工作。他教路，「有時做父母可以扮做得辛苦啲，等仔女挺身而出幫手。」
關景鴻簡歷
1957年：出生
1980年：移民到加拿大
1990年：成立移民顧問公司
1990年中：回流香港
1992年：成立香港辦事處
1995年：成立廣州辦事處
2008年：成立新加坡辦事處
2011年：在全球共設 8間辦事處

---

2 : abbychau(1)@2011-02-27 14:14:42

我都唔明d 人點解懶到連移民都唔自己搵資料, 要去搵顧問

---