|
||||||
|
全球冧市，小市民有無股票在手， 都受影響。有人低價購入大批龍鳳鈪出租創業，貪蝕極「有渣拿」，殊不知股跌金升，無端執到金。還有「樓奴」捱生捱死，男人四十學人炒股錢搵錢，結果損手離 場，決心跟老婆去菲律賓種甘蔗，搞實業。股海無涯，恒指人生，有贏，一定有輸。 金價居高不下，新郎哥「唔想責死晒啲錢」，花幾百蚊租龍鳳鈪了事，出租金飾店老闆陳宇瀚（Kenneth），就因「唔想責死晒啲貨」，賺了他第一桶金， 「開時裝店，啲衫賣唔出，責死晒啲貨，一定蝕，出租龍鳳鈪就唔同，啲金飾本身值錢，租唔出都可以賣番出去，我當時就諗，呢盤生意相對穩陣，起碼唔會渣都 無，無諗過啲金之後升成咁。」 執到金冧市贏家 股市連日急挫，過去一星期都在萬九點低位徘徊，具避險功能的金價，反而節節攀升。黃金價週一再創新高，衝上每兩一萬九千一百元，以一對三兩六的金鈪作為 「龍鳳鈪指數」，九八年是八千二百八十元，升值逾七十倍。在尖沙咀利時商場開設出租金飾店的Kenneth，受惠於環球股災，除了所持大批龍鳳鈪及金鏈， 進一步升值，顧客也受金價創新高刺激，紛紛落訂單租「金」，十一、二月的婚嫁黃金檔期，不少好日已「租爆」。「好多新人會等到就嚟結婚，睇啲金價會唔會回 落，先決定買唔買龍鳳鈪，呢排啲金係咁升，啲人諗住年尾前都唔會跌，先扑槌嚟租。」Kenneth說。去年一月創業，Kenneth分階段斥資逾百萬，購 入十四對龍鳳鈪和六條金鏈，用以出租給新人結婚行禮之用。創業時每兩金價還未到一萬一千元，但到週一，金價已衝破萬九大關，他所持的一批金飾，年半間已暴 漲三分二，淨賺逾七十萬，加上金飾租金「增值」，一箭雙鵰賺到盡，相當和味。戴龍鳳鈪出嫁，是廣東人的傳統，他說除了港產新人，一成客是內地自由行，試過 有廣州人，一次過大掃四對龍鳳鈪加兩條粗金鏈，由於出租的金飾，會根據當日金價計算按金，總數六件金飾，按金已達三十多萬，「內地大款真係好多，試過現兜 兜俾廿幾萬做按金，好豪，反而香港人多數碌卡，唔過數住，好多張信用卡夾埋先夠信用額，但啲金價係咁高，都無辦法。」他說。 炒股損手去菲種甘蔗 有人無端「執到金」，有人趁股市低迷「撈底」嘗甜頭，四十四歲，人到中年的李志能（Enoch），就說股海無涯，離得愈遠愈好，「近排個市咁波動，我成日 都留意住，有時忍唔住，同人講邊隻好抵買，但我自己就唔會再玩囉，唔想再過以前嗰種生活。」家住屯門疊茵庭的李志能，書房有部廿七吋大電腦，可同一時間看 到兩個網頁，連同另一部電腦，每天看着股價上落，分秒必爭。「十萬蚊本，買隻729（中聚雷天電池），兩日賺八萬，足足係我半年人工，唔心雄就呃你。仲有 隻股叫瑞年，賣保健產品，買入三蚊，升到六蚊，又賺到，我深信一定會升到九蚊，以為自己係股神。」三年前男人四十，Enoch決心告別「乖乖打工無啖好 食」的日子，趁西鐵通車不久，開荒入屯門炒細價樓，先後購入七個屯門單位，包括六個疊茵庭及一個大興花園的單位，全是二百萬樓下的上車盤，其間賣掉五個單 位，賺了五十多萬，留下一個自住，一個收租，一年多賺了五十多萬。 「九九年我買荃威花園，一百三十四萬，借政府首置，第四年開始供成六千，我得萬三蚊人工，近一半攞嚟供樓，好辛苦，做咗十年樓奴，差唔多供完，三年幾前西 鐵通車，我覺得屯門啲樓有得升，賣咗層樓就搬入嚟，○九年三月賣咗第一層樓，賺咗廿幾萬，足足多過我一年人工！」炒樓賺上第一桶金，Enoch心思思用炒 樓賺來的錢，炒埋股票，期待九出可以十三歸。「同賭錢一樣，輸錢皆因贏錢起，最初梗賺，後來明知老千股都入，大起大跌，諗住一衝上去就賣，結果中咗伏，我 記得有隻北亞策略，一日內跌一半，蝕咗三、四萬，介紹俾朋友同細佬，結果個個坐晒艇。」Enoch直言，上年底最後持有的股票是意馬國際，三日升五倍，但 大起大落的心情，至今難忘。「第一日升、第二日升，第三日繼續升，個心跳咗出嚟，放定唔放？我記得第三日係星期一，早上十一點，我決定放晒去，到中午十二 點返工，個心仲跳到不得了。」埋單結算，Enoch的炒股生涯，輸掉十萬，他說輸少當贏，執番身彩。「嗰大半年日日茶飯不思，成個人落晒形，日日飲咖啡當 飯，放假對住部電腦，返工望着部電話，覺得咁樣落去，賺到啲錢都唔夠睇醫生。」決心戒炒的Enoch，今年初跟隨菲籍太太返菲律賓投資甘蔗生意，還有三個 月，便是收成的季節，「呢啲話晒係實業，安全感大啲，炒樓炒股係賺得多，但一樣輸得多，俾個number你，轉個頭賺十萬八萬，邊有咁着數嘅事！」 Enoch笑着說。 |
||||||