|
||||||
|
昨日講起一位資 深馬可孛羅會會員來電郵指左丁山在北海道方向不清之餘，並且投訴「國泰對馬可孛羅」會員服務不周，令佢地排隊太耐，左丁山除咗昨日答番自己嗰部份之外，將 佢封信轉畀國泰，國泰有關人士如此回覆：「（一）機場貴賓室『寰宇堂』全新大規模裝修，在廿二號閘口開設一間『爾雅堂』貴賓室，但因為繁忙時段人客較多， 或會造成不便，裝修工程完成後，可望解決人客擠擁問題；（二）登機安排以分三行登機為目標，但閘口目前只有兩部查票機，所以仍難將乘客分三行登機，查看護 照機票時，知道有會員輪候嘅話，會請佢優先入閘。至於信用卡持有人可獲會籍，係市務部宣傳，會籍只限一年。」 好嘞，讀者如仍未滿意，請直接寫電郵去國泰，自行查詢。 八 月份乃傳統放假月份，歐洲人尤其認為八月假期，神聖不可侵犯，政治人物有不成文規矩，所有重要會議、國家大事，不能安排在八月舉行，啲總理、首相紛紛放假 去也，點知今年偏偏發生歐債危機，美國國債主權評級下調，金融市場因而大幅波動，搞到歐洲各國政府要員紛紛延遲放假，連星期日都要辦公。我等小民，唔理得 咁多咯，國家大事於我何干，一於放假照舊，可惜呢，香港人不是歐洲人，每年有薪假期之少據講在全世界排在榜尾之列，可出外嘅日子邊可以有一個月咁耐呀，老 友引誘話一齊去意大利Tuscany住番兩三個星期起碼，只可以恨到流口水！不過呢一輪睇見意大利、西班牙陷入債務危機，立即自行阿Ｑ一番，一個國家放假 咁多，國民過份識嘆世界，好則好矣，驚住有咁耐風流……啫。 美國人放假之少，少過香港，但美國一樣有債務危機噃？又有何解釋？究其實，一樣 與過份嘆世界有關，美國人往往入不敷支，先使未來錢，係咁碌卡，美國政府亦一樣，為維持超級強國地位，既要牛油麪包（社會保障及醫療福利），又要飛機大炮 （國防），公共支出一路有增無減，靠發債支撐，卒之爆煲。美國人係勤力工作呀，只是不懂量入為出之道，借錢始終要還嘅，當借錢總數（國債）累積到等於一年 總收入（GDP）時，仲可以扮威威咩。 |
||||||