| ||||||
上星期五華華喺 中環ifc碰到久違嘅鈴木雅典。此君何許人也?佢稱得上係香港科網一代梟雄,當年就係佢一手帶領光通信呢條過江龍嚟香港,大舉投資互聯網業務。2000年 頭,盈科數碼動力主席李澤楷同光通信主席重田康光,以私人名義換股單世紀大刁盛惠10億美金,就係由鈴木撮合。到今日呢個紀錄仲未被打破。當時光通信國際 (603,現已易名中油燃氣)由1蚊升到上廿幾蚊,亦係佢嘅傑作。 咁耐無蒲頭,鈴木今次喺中環現身所為何事?無論華華點問,鈴木都唔肯回應,但就話日本呢幾年經濟唔好,好多公司都知道要生存,一定要走出去。 吼資源、食品項目 加上前排日本大地震,將日本東北糧倉震散,更加快日本企業走出去,搵JV partner兼搵資源、食品類收購項目。佢呢排正安排一大堆日本企業去中國、香港搵嘢買。 查實華華上星期都聽過第一東方投資老闆、「日本通」諸立力講,311後日本好需要搵人幫手、搵嘢買,佢個office個幾兩個月以來日日都有日本人上去開會。唔知鈴木呢次會唔會再次搵到高手,同佢策動另一單世紀大刁呢又? 李華華 |