即將出任恒生銀行行政總裁的鄭慧敏（Louisa），以前又叫鄭蔚彤，何解有兩個名行走金融界呢？呢位準恒生一姐篤信風水行內人人皆知；Louisa身份證登記名字是鄭慧敏，自二千年起，佢改用鄭蔚彤之名，在滙豐仕途猶如坐直升機，每兩、三年升職一次，佢喺滙豐個寫字樓都搵高人睇過風水，而且銀行都「就」晒佢要求嘅擺設及坐向，你估金融人唔信邪？滙豐都搵龍師傅喺地下擺支「風水米」！ 然而，仕途得意情場失意，Louisa不敵女強人之宿命，於○一年與丈夫李輝堂離婚，似乎「蔚彤」呢個名唔係好利夫妻感情。及至一○年，Louisa又用番原名鄭慧敏，聽講佢家陣有位「老外」男友，用番呢個名，就學得即將交棒予她的恒生一姐李慧敏咁，人人記得其夫是袁天凡，起碼表面都愛情事業兩得意！ 紡織世家出女將 上海「紡織大王」王統元女兒王培麗、王培芳兩姊妹活躍於上流社會，王培芳做過保良局主席，佢細佬「雪褸專家」王福元原來都有三個女。王氏呢兩兄弟喺香港有朵，原來佢哋仲有個兄弟叫王濂元，八八年已經仙遊，呢家人一樣出女將，阿女王培琪，唔識？佢老公馬時亨是也。 此女何來又問句妻 馬會大董利子厚與騎術高超蒙古妹閃婚後，再分道揚鑣；去年低調地與鋼鐵大王龐鼎元孫女龐卓貽拉埋天窗，總算是門當戶對，聽講咁匆忙成婚係以為中咗頭獎，點知食詐胡；早排利子厚一家三口現身馬場拉頭馬，女兒相信十歲有多，此女何來又問句妻。曾在母校聖保羅書院教英文的龐卓貽，鍾意細路仔到不得了，甚至思想前衞去「借種」懷孕，轉眼間，「何」家有女初長成，上天又賜位繼父利子厚組成個甜蜜全家福，夫復何求？ 中環寸嘴奶媽之風 VS乃父之風 工廈大王楊耀松長子，八十年代往北美洲開山劈石，做一帶一路先頭部隊，自比為星仔變星爺前冇人懂欣賞其無厘頭文化，廿年後終於領略當中奧妙，與粉絲分享在北美洲各路人士交手經歷，絕不老點。 新加坡開國總理李光耀未死前，已安排將間故居拆掉，騰番塊地起樓，等周圍地皮重建時都可以起高啲，唔好阻住新加坡長遠發展，不過現任總理李顯龍無按老父遺願，想話保留大宅，卒之細佬妹入稟告大佬，引發為國際大新聞，《金融時報》都大事報導。呢間大屋我都去?過，話晒係李光耀發跡地，老實講個江山係李顯龍乃父打返來嘅，李顯龍最多都係Lucky Sperm Club成員，要延續你老豆德政，將個地段發揮到the best land use先至係o架，香港有奶媽之風，你就要有乃父之風先得o架。等我教李顯龍點積陰德俾子孫，將間屋「隊」冧佢，重建成多層單位，兄弟姊妹按自己命格去搵啱層數及坐向，每人擸番個單位，話晒有樓揸手封住細佬妹把口先，其餘嘅可以租又可以賣，啲新加坡佬都想沾吓國父故居之旺氣，肯定有市場，又老黎，唔係搞個人崇拜，大方得體，我只係充「風水楊」，但紫微楊兩父子就係正牌嘅風水楊。上一回新加坡抄我哋嘅公屋，仲青出於藍，呢鋪會否雙城記再贏一鑊！ | ||||