| 2011-5-17 AD |
||
|
香港商品交易所搞咗3年，聽日開張大吉，主席張震遠事先張揚唔會搞開幕儀式，唔會有舞龍舞獅開香檳，只會喺6至7份中港報章賣廣告，公告天下。比起3年前開記者會講成立，得到財爺曾俊華「贈言」祝福低調得多。 交易時段迎合同胞 聽講，商交所諗住做出成績，推多幾隻產品，兼等埋幾個月後由九龍站ICC搬去數碼港，同另一個寫字樓嘅同事坐埋一齊，先至大鑼大鼓。 不 過，部份商交所會員對於低調開張就嬲爆，華華聽商交所會員高層話，商交所開業初期推出一公斤（32金衡盎司）黃金期貨合約，喺香港屬於新事物，家陣玩低 調，投資者可能連開張都未必知，遑論玩番兩手；加上會員數目廿間唔夠，市場深度成疑。有會員高層同華華講，商交所嘅交易時間係早上8點至晚上11點，啱晒 內地投資者，唔使無得瞓喺美國落單，但商交所過去3年無晒聲氣，開張又咁低調，佢對初期交投都抱住觀望態度。 |
||