|
||||||
|
繼分拆和記港口信託到新加坡上市，超人李旗下之長實又分拆匯賢房託上市；前者形同出售香港同大陸之碼頭業務，後者則係沽出北京之商場、酒店及寫字樓物業。皆為套現之舉也。 套現並不一定係睇淡香港同內地之前景，而可能係另有部署。不過即使係未公布分拆匯賢之先，超人李上個禮拜已經講到出口：「香港變得政治化，對於香港現在面臨嘅問題，我係欲語而無言。」各位，咁嘅口脗，你話係睇好定係睇淡啦！ 當然，以長實之規模（總市值超過三千億港紙，多過政府全年開支），冇可能一話擸起就擸得起者。始終要一步步嚟。其他唔好講，長江基建年來就喺加拿大、英國、法國……全方位出擊收購電廠。密密套現，又點會冇後着呢？不過可以肯定唔會喺香港買嘢。 李家有子初出道 中環寫字樓供不應求，因為國金一二期之後，再無乜新寫字樓面世矣。今年第一個項目，係樂聲置業嘅干諾道中50號，但都要將近下半年先至入到伙。 干諾道中50號，前身既係鱷魚恤大廈。幾年前俾專起豪宅獨立屋嘅樂聲置業同外國房產基金Apollo買咗，搵嚟耶魯大學建築學院院長Robert Stern做首席建築師設計呢幢大廈。樂聲置業董事總經理Loewe‧李本智猛讚設計正斗，佢最欣賞整幢寫字樓室內完全冇柱，樓底起碼三米以上，空間感十 足。 講開Loewe，雖然佢只得三十歲，哈佛畢業之後喺紐約JP Morgan做賓架，學滿師至返屋企幫手。干諾道中50號係第一砲而已，跟手應該陸續有料到矣。 |
||||||