|
||||||
|
飲茶時份，碰到 一位老恒生職員，呢排嘅話題自然離不開政府派錢六千大元，退稅上限六千元等等，呢位老恒生係港大校友，於是問佢：「有港大校友發起捐出六千元政府大利是 噃，你捐唔捐？」呢位老恒生、老港大唓一聲：「捐唔捐錢，係我嘅私事，唔想其他人教我。」旁邊就係律師W，亦係港大校友，同樣咁講：「香港人要尊重選擇自 由，有校友捐出六千元，我會欣賞，讚佢地有善心，但千萬唔好因此而向他人施以壓力。」咁又係，有記者打電話嚟問：「喂，港大校友捐錢噃，中大校友會唔會捐 呀？你又捐唔捐呀？」真係睇得起，呢啲事左丁山一於少理，人地鍾意捐就捐，鍾意用六千元消費又有何不可，冇理由人地捐錢你就讚，人地消費你就彈嘅啫。由此 引申，有報道話政府為了考慮鼓勵儲蓄，會提供利率優惠喎。唉，政府派錢，已要動用不少行政費用，如果仲要諗埋鼓勵市民儲蓄呢一瓣，慎防又試好心做壞事，俾 人鬧餐懵，既然政府派錢，以最簡單方法派咗就算嘞，唔好搞到咁複雜。 注資強積金，俾人鬧到飽，無謂再講。但老恒生懷舊一番：「想當年，一九 七二，恒生上市，每位職員有一百股，市值好似係千零蚊，等於我出多一個月糧，有一位人事部阿太向各位同事收購嗰一百股，溢價一成，好多同事諗住千零蚊話多 唔算多，套現之後有錢幾好使，於是不少人，包括我在內，都賣咗一百股俾阿太。最近一位舊同事退休同我講，當年如果唔賣嗰一百股，現在連埋紅股及分拆，市值 有三百萬元喎，嗰陣時真係細路仔唔識世界！」今日注資六千元落強積金戶口，四十年後會唔會變成到時嘅三百萬？好似係發夢，遙不可及，但今天立即用咗六千 元，連夢都冇得發。
好多年前有一個美國基金賣廣告，內容大致如下：三個男人合作發咗橫財，一人分一份。A君用咗去買遊艇， 日日搵靚女上船，好不快活；B君買咗一架名貴跑車，在路上威風；C君用嚟買咗基金。二十年後，A君人老錢又冇，B君仍然揸嗰部跑車，C君呢，到佢上遊艇， 揸新車，享受退休生活咯。或者有人話呢個廣告太過美化基金，不過老恒生講嘅親身經驗，與廣告主旨有雷同之處。 |
||||||