兔年股市又開工，希望大家狡兔有三窟，唔好咁易俾股市餓狼食咗。 放假期間，外圍股市表現參差，歐洲比較反覆，美股表現強勁。杜指上週五收12092點，微升30點，係連續第五日上漲，全周共升了268點，升幅超過2.2%。 港股美國預託證券上周五個別發展，ADR港比指數收23950點，比香港放假前收市高41點：或0.2%。匯控收88.38元，比香港高1.5%，中移動收77.1元，比香港低0.5%。 美國勞工部上周五公布，美國1月份非農就業人數增長36000人，為最近4個月來增長最少的一次，遠低過市場預期的15萬人。有趣的是失業率意外地降至9%，創下自2009年4月以來的新低，而市場預期係由9.5%輕微下降到9.4%。好多分析員都認為非農就業人數偏低係因為受到了1月份惡劣氣候的影響。另外，過完聖誕節，裁員數字通常都會增加。至於失業率大跌的原因係有好多人已放棄揾工。估計人數超過50萬人，令勞工市場人數的基數縮細了。 一直拖住全球股市後腿的埃及反政府示威，已經接近兩個星期。埃及總統穆巴拉克宣布不再競逐連任，話會做到今年9月。但反對派堅持要佢即時下台，並揚言繼續抗爭至他落台為止。而政府的反擊係開始限制傳媒對示威的報導，希望盡量壓抑事件的擴大。 不過，估計僵局好快會打破，因為最大反對派穆斯林兄弟會與副總統蘇萊曼（Omar Suleiman）談判，已取得初步協議。雙方同意進行憲政改革，當局將成立政制改革委員會，並確保穆巴拉克9月不再競逐連任，以及放寬多項言論限制，但蘇萊曼拒絕接替穆巴拉克掌握實權。 另外，美國對支持穆巴拉克硬撑到9月的態度亦有所改變。美國總統奧巴馬的顧問團最近表示，穆巴拉克在位越耐，埃及政局會越嚴峻。因此，美國將循多個途徑向穆巴拉克政權施壓，要佢盡早走人。昨日，奧巴馬接受美國霍士新聞訪問時就話, 「埃及政府是時候作出轉變, 不能再走回頭路」，並且要求總統穆巴拉克立即下台。穆巴拉克沒有了後台老闆的支持，睇嚟都唔玩得好耐。 我今日在頭條日報講到叫大家兔年唔好唔買股，但又唔好買得太狼，認為大市有機有危，要好好把握，意猶未盡，講多幾句。你可能想問究竟是買定係唔買? 我俾個簡單答案，係人棄我取。 假設今年高位係28000點，而家23908點，大約有17%水位，如果笨笨地而家買大股，跟住攞枝棍打暈自己，唔好醒番，事先叫定個經紀到28000點幫你沽貨，咁都係一個方法，防止自己亂咁搞嘢。 你可能覺得呢個方法太笨，想追求更高回報。我建議一個思考角度俾大家，要人棄我取，即係等個市跌得多啲，好多散戶唔敢買股時，你才入市慢慢買。唔使預先定死一個指數點，或者跌到23000點買啲(距28000點有22%)， 22000點買啲(距28000點有27%)，21000點買啲(距28000點有33%)，咁樣若入哂三注，平均價22000點，假設大市最後跌唔穿21000點好多，就見底回升，到下半年真係升到28000點，到時沽之，都有28%回報，都相當唔錯啦。 你可能會問，咁點解唔在21000點一注買? 當然可以咁，但入市點愈低，出現的機會相對下降，有可能買唔到，或者你無定好入市計劃，跌得多時個市一定幾恐怖，你到時唔敢入都未可知。所以如果你對個市有啲感覺，例如21000點、22000點都去到一啲價值位，唔怕買吓，即使唔對路，長揸收吓息都無壞。記住個感覺係人人都唔想買股時，你就慢慢買吓，應該唔會錯得去邊。 呢個22000點買、28000點沽的設計，有兩個風險，第一係跌唔到22000點買唔到，第二係升唔到28000點沽唔到(升突咗、沽早咗唔算係風險)。但我估都有不低機會可以在22000點買、28000點沽。 如果想22000點平均價買，28000點沽，賺取27%回報係一個「基本假設個案」(base case)，你當然可以設計更好的方法，賺取更高的回報。例如你想走多兩轉，想走一走個市的波浪，跌2000點入市，升2000點沽貨，希望一年走得三幾轉，賺取更高回報。但大家亦要注意，回報和風險通常成正比例，如果回報可能高啲時，風險亦可能高啲，要高啲技術，或者高啲心理質素去執行，無人棄我取走一轉咁簡單啦。 陸羽仁