ZKIZ Archives


追求明日 左丁山


2010-1-22  AD




 

一位美國律師去北京,經過香港,公事之餘,就係搵朋友飲茶。人住在文華酒店,心思思要去陸羽,請佢嘅朋友賓架P訂位,賓架P又叫左丁山去訂位,於是無端端走咗去陸羽飲早茶,順便認識一位新朋友。

呢 位律師A原來識得一啲普通話,能讀簡單中文。問佢點解唔喺文華食早餐,而要嚟陸羽呢?律師A話:「一九九七年我與太太來港,睇旅遊書介紹,慕名而來,但唔 知係唔係陸羽唔睬鬼佬嘅呢,我地一場嚟到,無人理會,變成熱情而來,無奈而去。o依家又到香港嘞,真係想試一次呢間茶室究竟係Mr. Luk還是Mr. Yu嘅?」於是向佢講解少少歷史,Luk Yu(陸羽)並非陸先生、余先生。呢日啱啱收到城市大學鄭培凱教授嘅新書「茶道的開始」,台灣出版,粉紙七彩精印,內有大量彩圖,認真漂亮,原來呢本書就 係《茶經》,陸羽原著,鄭培凱導讀,咪兔8號繪圖,愛茶,喜歡嘆茶嘅人士應該人手一本。揭過呢本書,對律師A吹番幾句,解釋陸羽是何許人也,啱晒!

但 律師A聽得唔係幾明,亦無興趣,於是我地講番中美經濟,國際大事,老實講,賓架P與左丁山加埋知道嘅美國大事,比律師A對中國嘅認識多好多,起碼佢在美國 冇睇中文報紙,而我地在香港就日日睇FT、WSJ、FHT。但係律師A有一樣就知道得十分清楚,佢話到日本公幹之時,曾有日本公司請佢做代表,控告中國公 司侵權,但佢一口拒絕,點解呢,佢話:「日本係昨日,中國係明日,我地美國人點解要代表昨日控告明日呀,明日先至有前途o架嘛!」美國律師果然理性到極, 識得為未來生意增長着想,亦可以此推論,中國崛起,已成大形勢,美國商界會一面倒親中,唔怪得美國嘅美國商會極力反對紐約州參議員舒默(指控中國操控匯價 之議員),熱烈歡迎胡錦濤訪問。胡錦濤訪美,隨員眾多,代表團龐大,內有香港前特首董建華。聽講董先生早前曾赴美一遊做定準備工夫,佢對中美關係之發展, 有一定角色扮演o架。


PermaLink: https://articles.zkiz.com/?id=21600

Next Page

ZKIZ Archives @ 2019