千呼萬喚之下，iPhone 7終於隆重登場，由於7同廣府話粗口關係密切，三星嘅Note 7趕住出狙擊iPhone 7變咗流動炸彈，爆到係連美國都考慮唔俾帶上飛機果隻，所以依家Note 7真係變咗果句粗口，咁iPhone 7會唔會一樣鑊氣重真係不得而知。
不過，iPhone 7一直盛傳會取消傳統耳筒插口，好多人都猛話蘋果嘅做法有違用戶意旨。只不過，啲人見到AirPod個型樣，以及蘋果會附送的Lightning耳筒轉接器，當堂唔記得曬之前對蘋果嘅質疑。
其實蘋果已經唔只一次大幅度改變用家慣常習慣，包括取消咗慣常PDA嘅手寫筆，人人用手指寫字，加大換SIM Card難度，手機唔可以隨便換電池等等，呢啲設計都喺蘋果未推出新款電話前，好多人預言係唔可能改變到用戶習慣，但最後證實用戶習慣都係改變到，甚至競爭對手都要追隨蘋果嘅做法。作為改革者，蘋果好成功。
蘋果成功改變一般人嘅使用習慣，唔係因為佢係蘋果特別型，而且蘋果可以提供更合理嘅方案出嚟，例如手機唔俾換電池無問題，因為蘋果嘅作業系統可以做到比佢嘅競爭對手慳電，加上尿袋呢種嘢出現，仲方便過自己換電池。而AirPods肯定熱賣，因為AirPods細到同助聽器一樣，中環人未見過任何一款藍芽耳筒可以同助聽器一樣咁細，但蘋果偏偏能人所不能做到，所以蘋果咪夠薑取消曬傳統耳筒插口，因為你自然會乖乖額外俾錢買AirPods，甚至唔換iPhone 7都要買AirPods。其他競爭對手，根本就係提唔到更好嘅方案，咁又點可能改變到人地嘅生活習慣。
所以講嚟講去，你要改革社會無問題，你要學似蘋果咁，俾一樣型到震嘅嘢你，令你甘願跟蘋果去改變自己嘅行事習慣。問題，十個政界同商界人，九個半都無蘋果嘅功力。所以蘋果啲現金多到唔知點駛，而你間公司，或你個政府，就好鬼擇駛。
中環客