ZKIZ Archives


明愛暗戀偵探社

2016-09-01  NM

文顯楠,三十歲。男仔頭的她,七年前創辦宏智偵探社,以「全女班」做賣點,因有感女仔細心又無殺傷力,容易親近目標,吸引家長幫襯搵她跟蹤子女有無學壞,令她見盡年輕人的「明愛、暗戀」經歷,更做埋輔導,但不是針對後生仔,而是家長。

我間偵探社,一開始同其他行家一樣,靠查偷情和商業案件為主。近幾年有啲唔同,要等、伏、跟嘅對象愈來愈細,連小學生都有。咩人連細路都唔放過?咪就係佢哋嘅老豆老母。父母查仔女,不外乎懷疑佢哋吸毒、援交,想我哋跟蹤證實。而家啲交友app咁流行,小朋友想隨時識人好易,但一唔小心就遇上壞人,尤其喺暑假,所以我哋前排特別忙。不過,我接咁多單查仔女嘅case,發現好多時問題核心唔係細路,而係喺家長身上。

關心錯

有個中產家庭,父母係專業人士生活無憂,阿女要咩父母都盡量滿足她。但日忙夜忙嘅兩夫婦,突然發覺個女有啲唔妥:成日唔返屋企,又買多咗化妝品,沖涼又沖好耐,仲有大量不知名嘅人打電話搵佢,於是就請我哋睇吓佢個女發生咩事。經過一輪跟蹤,我哋發現個女仔有個固定男朋友,屋邨仔一名,打緊份一般人眼中唔太高尚嘅職業,冇咩本事,身體又有毛病。結果個女仔唔單只瞞住爸媽,仲瞞埋男朋友,去援交,幫補兩個人嘅生活。正所謂「門不當戶不對」,佢父母當然唔鍾意個男仔,仲認定係佢令到個女「學壞」,沒收咗女兒電話,又去到邊跟到邊,仲試過鎖佢喺屋企,問我哋:「可唔可以幫手棒打鴛鴦?」結果個女仔鬱到有精神病,要入醫院,而我哋當然冇出手拆散小情人。我哋觀察咗半年,見個男仔雖然唔叻、搵唔到錢,但對個女仔好真心,佢每日除咗返工,就係陪個女仔,仲每日親手煮嘢食俾留院嘅女友。反而個女仔同我哋扮朋友嘅臥底講,唔鍾意返屋企,因為細個見到表面係模範夫妻嘅父母各有外遇,所以唔信佢哋。佢寧願自己搵錢,留喺男朋友身邊,至少感覺有人可以信賴。最後偵查變輔導,我哋從三方面入手,搵臥底結識男方、女方做朋友,又搵家庭輔導員同父母傾。一方面軟化個女,令佢明白父母嘅緊張;另一方面教父母用正確方法關心個女,最後關係總算慢慢好轉。

要獨立

其實,我阿爸阿媽以前咪又係由朝做到晚,唔得閒理我,但我諗番轉頭,反而慶幸當初有咁自由嘅時光。阿媽係幼稚園主任,日日我未起身佢已經返到學校,佢放工返屋企我都差唔多瞓。阿爸自己做老闆,成日神龍見首不見尾。細個時真係對住工人多過佢哋。到後來我長大屋企無再請工人姐姐,得番我同細佬兩個。我自細學識照顧自己,記得有次跌親入醫院,都係自己一個撐出院。父母唔係唔關心,但想你自己企番起身。屋企都算小康之家,但零用錢從來唔多,想多啲錢使就要靠自己,有年我連十六蚊一個鐘嘅洗碗暑期工都做。我去廣州讀完大學英文系回港,遇上金融海嘯,見十幾份工都冇一份請。幾個月過去,淨係搭車、食飯都使晒啲零用錢。惟有死死哋氣,攤大手板問父母攞。最後,佢哋黑晒口面同我講:「呢五百蚊係我最後俾你嘅錢,用晒之後,無論將來點,一分一毫都唔會再俾。」得五百蚊?我覺得無退路,惟有同自己講,無論咩工請我,都一定要去做。結果,就入咗一間私家偵探社,時薪得廿蚊。到後來我同父母講想瞓身投入呢行,自己開公司,佢哋好反對,話我讀咁多書,使咩做啲咁嘅嘢,又不停叫朋友介紹「有前途又有錢途」嘅白領工俾我,我都當耳邊風。阿爸阿媽,我對呢行嘅興趣,其實都係因為你哋。以前你哋返晒工唔理我時,我最鍾意就係去搵做偵探嘅uncle。有次佢出動,我就匿喺佢架van仔,聽佢啲行動代號、點補位行去幾點鐘方向,架車行咩路線衝唔衝燈。我就當自己做control centre,控制一切。我嘅偵探初體驗,其實都係源自我阿爸阿媽。多謝你哋。

撰文:關冠麒攝影:胡智堅攝錄:李育明[email protected]

PermaLink: https://articles.zkiz.com/?id=213862

Next Page

ZKIZ Archives @ 2019