之前本刊曾報導過，前大台女藝人簡珮筠開咗間公司Bellefontaine，專賣瑞士化妝品，仲撈到風生水起。可惜最後同拍檔梁享英及葉希德反目，簡珮筠因為壓力仲兩度小產，非常陰功。呢單官司，仲有漫漫長路先搞掂，不過簡珮筠並唔係獨撐。 小宗近日查冊Bellefontaine嘅香港商標，發現由一間叫Swiss Cosmeceutics嘅公司持有，而呢間公司嘅股東，除咗有簡珮筠，仲有鄭裕彤長孫鄭志恒（Conroy），佔咗兩成股份。鄭志恒一路跟彤叔住，傳過話係接班人，不過後來因為一堆緋聞而轉為低調。簡珮筠話，佢同Conroy識於微時，對方仲入股一齊搞生意，「到佢知道公司出事，知我經歷咁多壓力，佢好心痛！」Conroy發火，非同小可，即刻幫簡珮筠安排律師團隊。而簡珮筠的代表律師，正是林炳昌。當年于文鳳向周星馳追討佣金，都係搵佢入稟o架！簡珮筠仲話，佢而家搞緊另一個化妝品牌SUR PUR，半年已經開咗百幾間。所以話，女人嘅力量，不能睇小！ 最有「效率」獎 由宏安地產發展嘅馬鞍山新盤「薈朗」，今個週四開賣。「薈朗」九成單位唔夠三百呎，悲！小宗睇番塊地嘅來歷，係一四年推出嘅「限量地」。噢，當年嘅限量，唔係限單位數量不能多，反而係不能少噃。呢塊地就限咗住宅單位總數，不得少於三百一十個，目的是增加中小型單位供應。不過發展商仲狼死！一於起夠六百四十個，超額一倍完成。宏安當年以七億買入地皮，就當每個單位賣三百萬元，套現十九億有多。條數點為之鍊到盡，有辦你睇。 中環寸嘴 朱太最威 立法會選舉就開鑼，琴日業界搞咗場閉門會議，三個候選人，就住最有爭議嘅證監諮詢方案發言。呢個方案，提出證監在上市審批上有更大話事權。咁影響好多人飯碗，咪話唔啃！張華峰一路係話支持方案嘅，但琴日突然反對，徐聯安同詹劍崙梗係圍插佢轉軚。三人有唔同立場，但有樣嘢好有共識，就係見到殼后朱太現身，都一個箭步走埋去影合照。白啲講句，「大票倉」噃，啱數！ 曹貴子由沙田升呢去中環 曹貴子由一個醫生，跳入股票市場做殼王，短短幾年儲埋儲埋十幾隻殼，身家大躍進。近排佢再升呢，不但捐錢俾香港教育大學，校方仲命名做「曹貴子基金會大樓」，威水咯！曹醫生依家辦公室，喺沙田小瀝源源順圍，無論佢旗下的康健集團、基金會、聯夢活力同新銳集團呢幾隻股，都報呢個地址。小宗早前仲見到《都市日報》旗手黃浩，揸住自己架跑車去呢度上頂層，即係曹醫生辦公室。唔通係面聖？曹醫生依家升晒呢，沙田鄉郊凸顯唔到身家，有消息話，佢已經預租明年落成的中環德輔道中24至26號、由華懋發展嘅商廈。每月單係交租都五百幾萬。論身份，平添喇！ | ||||