近年單車運動備受追捧，更愈玩愈專業，擁有一架過萬甚至過十萬的單車，現在已經是等閒事。不過，專業對於單車迷來說還是未夠喉，能夠令愛車獨一無二，加入自己喜愛的花紋才是終極目標！熱愛踩單車的阿興，2年前為愛車換上自家設計的新拉花貼紙，受身邊朋友讚賞，吸睛度大增，啟發他開設公司Design H，專門為單車友設計單車貼紙，令單車更加個人化！ 今年34歲的阿興，07年畢業於IVE的平面設計高級文憑，之後當過廣告公司及燈箱工程公司的平面設計師。5年前，因工作關係，他開始接觸山地單車，自始活躍於單車比賽，去年更放棄全職工作，以家中書房作為workshop，專注在單車貼紙的設計工作。阿興說：「兩年前，我喺一次比賽中炒車整花咗車架貼紙，之後想換番張新，但見市面原裝貼紙存貨唔多，顏色又唔多選擇，所以決定自己試吓整。」 度尺最考功夫 現時Design H提供的定制單車貼紙，全由阿興負責設計，收費最平由$150的人名貼紙，至到最貴$3,000的全車改拉花都有，服務包括度尺、舊貼紙移除及貼紙安裝，貼紙材料以厚約1mm的PVC貼紙為主。阿興表示，製作過程中，以度尺最花時間，「而家嘅單車架同部件都好精細，畫layout係最花時間，好似頭管、上管嘅頭尾直徑都唔一樣，最麻煩！最難度係Road Bike，太過流線，最長我試過用2至3個鐘先度完，有時仲要出個紙樣去試位，就要更耐時間。」度完尺寸便開始設計部分，阿興事前會與客人商議，當知悉客人想要的風格後，便開始設計圖案。「我有留意開單車拉花，喺設計上會知客人想要啲乜，好似今日要貼呢個車架，原本得紫底白字拉花，客人Brian就話想要新世紀福音戰士RT初號機嘅紫電，睇完reference，我用咗2個鐘就畫好，前後改咗2、3轉就output得，約兩星期印好就可以貼，貼上單車一個鐘都唔使。」 厚身貼保護車身 阿興的厚身單車貼除了美觀外，還有保護作用，所以幫襯多數是愛單車之人士。「一般單車嘅貼紙都好薄身，仲係die-cut啲字就算，冇乜保護作用，其實而家啲單車咁貴，車主都唔想整花，通常搵我整貼紙，貪靚之餘，仲係想用厚車貼保護車身，就好似跑車都會貼保護膜、電話會貼mon貼一樣。出面嘅保護貼多數係透明或者實色，我可以整埋graphic，暫時喺香港咁樣貼單車都係得我做。單車之外，我都有試過貼航拍機，不過自己最熟單車，會主攻單車客。」因是獨市生意，故阿興沒有大力宣傳，主要透過朋友介紹及facebook作宣傳渠道，當中亦遇到不少「白撞」的查詢。「我試過起好design後，個客冇晒踪影；不過呢個都未算最差，之前講過度尺畫template最花時間，試過有客叫我send個template俾佢改，我最終冇覆佢，因為同打劫冇乜分別。」 需求開始回落 阿興跳出全職工作，很多人也會質疑是否能夠維生，阿興表示高峰期的確可以，不過暫時需求似乎稍有回落，「試過一個月有40單生意，營業額有3萬幾，每張貼紙印刷成本只係＄100起，每月賺＄18,000都算唔錯。不過最近踩單車嘅人好似少咗，貼紙生意少咗一半。問我驚唔驚有競爭？都驚o架！市場其實唔算大，如果有人加入，分薄晒大家都難做，不過我而家賣埋其他單車product，仲會接design同攝影job頂住。」熱愛踩山地車的阿興，當然不是以造單車貼紙為最終目標，其實他最想自己舉辦比賽。「設計單車貼紙都係突如其來嘅事，我最想搞一個單車比賽，覺得早前嘅單車比賽冇乜氣氛，最近我line-up咗唔少sponsor同禮物去單車聯會嘅比賽，支持參加嘅車友。雖然當中冇收入，不過氣氛好咗，大家玩得更開心，之後更多人玩，sticker生意都多啲啦！當然有得自己搞比賽就更加好，多一條出路嘛！」 facebook @ Design H - Design & Photography 即睇點貼單車貼紙 開業成本 器材：$30,000租金：$9,000雜費：$3,000總投資：$42,000 每月支出 營業額：$32,000租金：$9,000 (連住所)成本：$6,000雜費：$4,000盈利：＄13,000 撰文：黃德禹攝影：劉宇軒（部分圖片由被訪者提供） | ||||