呢排商界人士聽到「巴拿馬文件」都驚驚，其實在九十年代冇番間海外註冊嘅公司，又點顯得夠國際化呢？最近中華總商會永遠榮譽會長蔡冠深，被揭早年成立海外公司，其生意拍檔Cheong Kheng Guan原來把炮到同伊朗船運合作涉及運送大殺傷力武器，更揭出蔡冠深嘅親戚亦大有來頭，其海外公司的另一拍檔Richard Tao，其實係佢妹夫陶家祈，陶家祈父親是愛國商人陶哲甫，四七年畢業於重慶國立中央大學機械工程系，四九年走到緬甸做工程師，一九五六年受到感召，從緬甸返回祖國建設，傳授拖拉機技術，再返回緬甸發展海運事業，七十年代陶哲甫在香港成立船務公司昌麗集團，並在新加坡發展酒店、地產生意，陶氏家族成立的Singapore Land，當時商界媲美為Hong Kong Land置地。中國改革開放，陶哲甫出錢出力，在南京興建金陵飯店，奠定他愛國商人地位。蔡冠深的妹妹蔡少萍在哥倫比亞大學讀書時認識陶家祈，父親蔡繼有家族捕魚出身，與陶哲甫結成姻親，雙方生意亦愈做愈大，所以蔡冠深涉足船公司生意，拍檔都係佢妹夫陶家祈。 陶哲甫（右四）生意遍布中、港、東南亞，去年底過身，其家族有間上市公司新澤控股，前年被中國綠景地產收購；陶家祈Richard Tao（左二）為陶氏長子，太太蔡少萍（左一）為蔡冠深胞妹。《蘋果日報》圖片 二百萬擇日 誠哥「射波」請病假，缺席長和股東會，副主席李澤鉅反而特別生猛風騷，雖然未能收購英國O2，兜番話避開英國脫歐風險，仲話「長和幾好風水」。其實點只長和風水好，家山都好，話說李嘉誠搵風水大師蔡伯勵擇日修葺莊月明之墓，以蔡伯勵級數，風水顧問費都係一封利是，李氏捐咗兩百萬予蔡伯勵的順龍仁澤基金作為種子基金，有李氏帶頭，蔡伯勵個慈善基金滾存至今有二千五百幾萬，都咪話唔和味。 中環寸嘴：阿叻搵「阿叻」拍賣 工廈大王楊耀松長子，游走高級酒店、銀行，及知名食肆，與各路人士打交道，自認有jet set生活方式，透過美酒佳餚，察看人生百態，把「生平絕學」不吐不快與粉絲分享。 上個禮拜五去公益金慈善晚宴，預咗要俾人揼心口喇，見啲小朋友（註：在場參與拍賣善長）係又舉，唔係又舉，梗係喇，有老豆俾錢，冇血汗嘅，心情都輕鬆啲，又勾起我一啲回憶，自己廿三、四歲時，奉老豆之命去拍賣工業地，嗰時老豆俾錢梗係冇有怕去舉，用一億銀投咗德福花園對面九龍灣工業地，係政府推出尾二嗰批地，以戰養戰，分十年期付款。所以話，阿叔我見過呢啲億億聲嘅大場面，今時今日使唔使為嗰幾廿皮嘢咁操勞呀？足足二百倍都唔只喇。拍賣主持阿叻拍第一隻花膠（1.084kg）時都爭得好激烈，拍咗$53.8萬，咁輪到第二隻（重1.162kg），梗唔低得過第一隻o架，阿叻問我點睇，我咪輕描淡寫咁話「照跟囉」，呢個阿叻都接到波，話我好似玩show hand咁，我梗係睇清楚敵我形勢，通常拍賣官嗌「第二次」我先至舉嘅，咁個拍賣官都開心啲，可以再篤吓計數機嘛，最後$56.8萬拎隻花膠返屋企囉，俾夠齊頭六十萬又點話吖？起碼唔使好似舊年十一月喺禮賓府咁，公益金拍賣唐英年一箱紅酒，阿叻叫我「開個好頭」，咁就拍囉，點知開頭又係我，結尾嗰啲酒又係叫我拍埋佢，你估依家搵隻雞拜神呀，有頭有尾！ 銀主盤背後杰撻撻 港島區收租盤縉城峰和博仕臺突然有十四個「銀主盤」掟出市場，部分銀主盤嘅公司涉及一間杰撻撻嘅上市公司——太平洋恩利（1174），董事鄭鳳英、黃裕培母子，正是太平洋恩利主席和董事，公司以捕魚、急凍海鮮生意為主，可能喺餐廳、超市都食過佢嘅魚柳。話說滙豐向太平洋恩利旗下新加坡上市嘅中漁集團的俄羅斯、秘魯及非洲捕魚公司申請清盤，並入稟香港法院委任臨時清盤人；獅子銀行雖然夠薑，但其他債仔銀行提出反對，因鍊死咗個客大家同銀行一齊攬住死，最終法院俾六個月時間緩衝一下，至八月再決定。不過評級機構已鬥快將中漁評級下調，新加坡監管機構落埋手去查。太平洋恩利九四年在港上市，創辦人是馬拉佬黃垂豐，能夠在世界各地捕魚搵食，正所謂喺公海做乜都得，投資界對太平洋恩利的生意嘖嘖稱奇，公司曾俾老廉調查非法醒股票俾基金佬，不過最後證據不足未有被起訴，有基金佬謂太平洋恩利：「死性不改。」 | ||