近日文憑試開考，考生戰意高昂，有的更認為：「唔可以入唔到大學！」、「入到大學先搵到好工，搵到好工先有好嘅前途！」九十後關志豐（Ken）及何詠凡（Winnie），對這些觀點卻一點也不認同。兩人在中一已就讀同一中學，到中五開始邊拍拖邊網上賣手袋，其後開設行李部，轉賣行李喼。升大學，更特意一同選讀城市大學公關系，讀到最後一年，見賣喼生意愈做愈有，竟雙雙「quit u」，專心做生意。他們都揚言：「我哋嗰科無乜前途，快啲出嚟做生意仲好！」但「創業難，守業更難」，雖由網上轉戰旺角樓上鋪，食正近年廉航潮，月賺高達七萬。但二人除了要氹掂要求多多的空姐客人，更曾面對MK大漢「挑機」，他們又如何拆解？ 訪問期間正值長假期，開店前兩位老闆原以為港人都出外旅行，老闆之一Ken指：「復活假之前已忙咗輪，今日應該唔多人o架啦。」怎料下午三時開始人流湧至，訪問亦被迫中斷。就現場所見，不少顧客都明顯有備而來，在手機上「碌碌吓」，詢問兩位老闆款式。由於沒有請店員，兩位老闆難免有點手忙腳亂，但客人大多都不介意等待。其間更有空姐專誠到店鋪拿貨，對於要求多多的空姐，Ken亦不怯：「呢個款啱短途機」、「個色今晚之前仲有得轉」，不斷製造話題之餘，更主動教空姐如何保養行李箱：「記得拉鏈位唔好整花，保養唔保o架！」怪不得其中一位空姐Jan，在兩個月內已介紹二十位客人給他：「都係同一屆訓練嘅同學，佢都特登平俾我哋，我見用得幾好咪介紹俾其他同學。」 未畢業創業有團火 「一開始邊有講得咁流利，都係憑經驗累積！」二十四歲的Ken，記者看不出他已有逾八年工作經驗。他自命不是讀書材料，又碰上末代會考，早已打算投身社會。偏偏他又夠分升讀中六：「中五時已開始做生意，一開始喺大陸廠房入貨，再拎啲手袋去Yahoo!拍賣，放學時交收。之後發現愈嚟愈多人咁做，咁我就轉做賣喼。」在網上賣了三年多行李箱，二人儲了四萬多元，決定到旺角好景開實體店。Winnie回想起風險其實頗高：「我哋都無問屋企人攞錢。大部分嘅錢都用來入貨，如果一個月都賣唔出都幾危險，曾經試過一次真係周轉不靈，惟有問媽咪賒咗幾萬蚊數，一、兩個月後就還咗。」生意愈做愈有，二人開始考慮未來路向：「嗰陣讀緊year 3，生意上咗軌道，愈嚟愈忙，開始兼顧唔到讀書，我哋就諗如果就咁唔做，但係畢咗業就未必有呢團火，屋企人起初都反對，但最後都決定唔讀。」 閒日賣平過SOGO 店鋪一開始，都是賣大陸「雜廠牌」行李箱，他指「雜廠牌」雖然毛利較高，但如要開實體店，始終要售有牌子的貨品，保持店鋪形象：「我揀咗Delsey同American Tourister，就係因為佢哋有三年全球保養，維修幾多次都唔加錢，其他牌子好少做得到。」由於兩個牌子都在百貨公司有售，樓上鋪要接洽都花了不少工夫：「大牌子最少都要入一百隻，近十萬蚊貨，我要開鋪一排先儲到錢。一開始求佢哋俾幾隻款我哋試，應承佢哋每個月可以賣幾多隻，佢哋仲特登上過嚟睇吓環境，最後都肯應承。」他透露不少客人知道品牌在一田、SOGO等大型百貨公司都有售，令營業額提升。他們坦言，行李箱在一般百貨公司的專門店，大約有三至四成利潤，樓上鋪比專門店可以賣平一點：「我哋毛利大概百分之十至十五左右，來貨成本一定比專門店佢哋貴，如果賣一樣價錢，我哋就唔使做，所以佢哋零售價會高少少，俾生存空間我哋。」由於百貨公司定時都會舉行大減價，這時候價錢就會比他的店平：「一年都係得幾日，我哋都唔會特登減價去鬥，免得破壞同大家嘅關係。」 引客落鋪睇 對於不少小店都流行用facebook及Instagram宣傳，但Winnie指相比衫褲鞋襪，要宣傳行李箱較為困難：「衫嗰啲都預計到size，但係喼客人就比較難預到幾重。就算同個客講二十八吋，佢哋都唔知幾大，我哋惟有喺網上好詳細咁講用咩料，張相影靚啲，再吸引佢哋上嚟。」他補充在網上的貨都不會寫價錢：「試過寫，隔籬網就會跟你個價再平少少，最後只會一直鬥落去。」除了在社交網絡宣傳，他們連日漸衰退的團購都不放過，二人皆指團購網賣貨「無肉食」：「一嚟啲網站每件貨都要抽佣，二嚟團購個價又唔可以貴，所以幾乎打個和。放上去主要都係為咗多啲人識，同埋去多啲貨。」但試過有團購網「走數」：「爭咗我十幾萬，拖足我三個月，依家仲有四萬未還。」 童顏惹MK挑釁 年紀小小就成為老闆，竟然引來顧客眼紅。Ken指出，因自己樣子不夠「老成」，在開鋪初期成為障礙：「試過有次有客行入嚟，問我係唔係老細，如果話係，個樣就好唔忿氣；如果話唔係，佢就會話一睇就知啦，俾心機，捱吓啦。」他指有不少客人因自己年齡問題，故意留難後離開，亦曾經試過客人在店內要脅向海關舉報：「佢買咗個喼唔鍾意，想退錢，我話只可以換款，佢就發爛渣話我賣假貨，最後我惟有打去專門店確認，佢先知難而退。」最誇張一次就是引來MK大漢挑釁：「嗰陣係個客訂咗四隻喼想嚟拎，但係我哋未齊貨，佢講晒粗口，除晒錶要我出走廊，撩交打咁款，咁我梗係死都唔出去啦，最後佢都無辦法走咗。」 毛利漸少求出路 兩位老闆直言，現時店鋪盈利的確有所下降：「自由行的確有影響，之前好多旅客喺下面買完奶粉會上嚟買喼。同埋愈來愈多新嘅競爭者，依家惟有薄利多銷。」他認為最終出路是要有自己的品牌：「我依家做嘅嘢，其實同專門店sales無分別，我知道做一個新嘅牌子好難，但係呢幾年最清楚啲客需要咩，如果唔趁後生試，過多幾年先去做仲更加難！」談到退學，二人異口同聲地指未曾後悔：「將來賺到錢一定會繼續讀，到時用自己錢去外國讀書！」 開業資料（好望角店，06/2015）租金 #二按一上：$60,000裝修：$60,000傢俬器材：$10,000入貨：$400,000雜費：$20,000總投資：$550,000 營業資料（03/2016）營業額：$255,000租金：$20,000人工（兩位老闆）：$20,000入貨：$140,000水電等雜費：$5,000盈利：$70,000 搭廉航揀咩喼？Ken指，各間廉航對於行李負重及尺寸都有一定限制，所以要小心留意才選購，他對於選購行李箱有以下心得：（1）相比起鋁邊行李箱，有拉鏈的行李箱更適合，因為輕身約一公斤，而且容量更大。但當要攜帶易碎行李時，鋁喼就較佳。（2）因國際民航安全要求，到美國需要選購有TSA鎖的行李箱，因為當地執法人員有權突擊檢查行李，如沒有TSA鎖的行李箱就有被撬爛的風險。（3）現時主要行李箱以四隻轆及八隻轆為主，他指八隻轆更穩定，就算重心不平均都不會向前傾，但四隻轆的行李箱使用時相對較靜。 撰文：梁延宇攝影、攝錄：廖健昌[email protected] | ||||