|
||||||
|
美國中期選舉， 共和黨大勝，重奪眾議院控制權，俄亥俄州眾議員John A. Boehner代替來自加州三藩市嘅眾議員佩蘿茜做眾議院議長（Speaker）。呢位貝納先生係一位脫貧成功嘅經典例子，佢有一位哥哥，十位弟妹，一家 十四口住在一間兩睡房嘅細屋，爸爸經營一間小鎮小酒吧，佢自學曉站立，行路開始，就幫爸爸在酒吧抹地、洗廁所、洗碗碟、企枱，長大後成為全家第一人考入大 學（Xavier University），靠半工讀支持學業，佢經常講："I loved every job that I had, at least until I get the next one."（我鍾意每一份工，直至搵到第二份為止），絕不會做一份怨一份，騎牛搵馬之時，絕不偷懶。時下不少人打工，做嗰份怨嗰份，做嘢冇乜心機，應該向 貝納學習。 貝納今年競選時，到處講一個玩弄文字嘅笑話，每次都引起哄堂大笑，選民受落。佢講：「昔日列根總統時候，我地有Bob Hope（卜合，大笑匠），有Johnny Cash（一代民謠歌手），現在奧巴馬做總統，我地冇希望，冇現金（We have no hope and we have no cash）」。列根總統在任之時，美國自由派知識分子睇佢唔起，認為佢冇知識，冇內涵，只識唸台詞做戲。但三十年後，列根被視為美國一位偉大總統，共和黨 人之神聖偶像，一個政治人物之評價，會隨着歷史變遷而改變嘅。 點解要講呢位貝納先生？上星期飲茶，一位富豪第二代係美國名校畢業生，對我地 講：「我近月參加志願團體之扶貧工作，做過六七次基層家訪，感到有啲悲觀，基層貧童冇電腦，唔識iPad，唔識講英文，未出過中環，佢地讀書點夠我個仔或 者太古城嘅兒童競爭呢？第日搵唔到好工嘅喎。」呢類想法不止呢位公子有。睇報紙報導，一啲社工亦怨這怨那，怨政府唔理跨代貧窮。其實脫貧主要靠自己努力， 靠父母鼓勵及灌輸正確態度，並非一味倚賴政府幫忙。上個月有一位媽咪讀者來函，稱左丁山為老師，愧不敢當。佢話夫妻兩人係外省人，唔識英文，帶五歲女兒來 港之時，一切由頭做起，死捱死做，死慳死抵，從未申請過津貼，平時常睇蘋果名采專欄吸收知識，女兒成長時，教女每日讀左丁山嚟激勵自己。現在長女已大學畢 業，在投資銀行工作，所以有心情寫信嚟。只要努力及有正確態度，窮家女讀書未必輸蝕畀有錢仔嘅。 |
||||||