股壇老手趙渡的國際資源（1051），○九年轉營掘金礦，引入BlackRock後，由毫子股升到上兩蚊，但揼石仔幾年後，公司以差不多六十億港元賣咗印尼個金礦，揸住8%國際資源嘅BlackRock就反對呢單交易，要求將賣金礦所得「分錢」，如果咁切蛋糕，BlackRock分得近五億港銀，有膽開此盤口，BlackRock背後揸旗人當然非普通基金佬。 持國際資源8%的BlackRock World Mining Fund，其基金經理名叫Evy Hambro，佢來自丹麥銀行世家，Hambro家族早於一八三九年在倫敦創立Hambros Bank，初期幫英國政府安排政府債券，二戰後專做鑽石貿易融資，故有「鑽石銀行」稱號，七十年代銀行飽受世界航運危機拖累而走下坡，八十年代控制銀行的Hambros家族信託解散，成員分道揚鑣，至九八年Hambros Bank出售予法國興業銀行。 Evy Hambro父親Peter Hambro在英國貴族學校伊頓公學畢業，曾在家族銀行打工，八十年代與「金」結下不解之緣，在倫敦Mocatta & Goldsmid做黃金買賣時，公司是蘇聯黃金買賣交易對手，至蘇聯解體，Peter Hambro就到蘇聯掘金礦，同俄羅斯拍檔在九四年成立Peter Hambro Mining，兩個仔Evy和Jay細細個跟老豆去礦場掘金。三父子生意亦千絲萬縷，Evy Hambro出任BlackRock基金經理後，都先後入股父親在倫敦上市的俄羅斯金礦公司Petropavlovsk，以及細佬Jay做主席嘅鐵貨（1029），三父子都押注礦業，自然有concentration risk，老豆同細佬間公司因商品價格下滑而受累。如果Evy Hambro逼到國際資源賣金礦後分錢，總算能為基金收復番點點失地！ 中環寸嘴：有型有款未必夠現款$$$ 工廈大王楊耀松長子，遊走高級酒店、銀行，及知名食肆，與各路人士打交道，透過美酒佳餚，察看人生百態，讓讀者「嗒」落有味。 唔怕話你知，我係亞視擁躉，最鍾意睇人在旅途灑淚時，驚佢執咗就飲恨睇得少喇。真係好笑，搵箱金牛「現兜兜」用錢撻你，點知俾人影到搵嘢「墊高」，下面仲係一百蚊紙，嗱！呢啲係職業病，拍戲用慣咗道具嘛，如果現兜兜攞住一千幾百萬周街走，要買多重保險喎！雖然有老友寸我冇型、冇款，有現款，但你估咁易呀？呢排好多老友同我講周星馳嗰套票房三十億人仔嘅《美人魚》，贏晒王晶嗰套《賭城風雲3》，搵埋周潤發、劉德華卡士夠晒又點吖？年年拍套賭片做賀歲片，邊有咁多古講吖！《美人魚》頭嗰三分一講大陸人識笑嘅笑話，中間嗰part鬼佬都識笑，臨尾就講環保，星爺起用啲新進演員，成本低、效益高，仲卜卜脆添（講啲製片咋），所以環境唔好更加要諗橋。 做生意都係，我平日收到好鬼多地產經紀佬newsletter，早排暉煌物業租務通訊，吖！成本report設計好有創意，仲送咗支五顏六色嘅懷舊顏色筆，就算唔睇report都留番支筆吖！個董事個名仲過癮，叫鄺富貴（Felix），唔係「抗通縮」，真名嚟o架！聽佢講近排商鋪租金插水，做地產經紀下下要同業主提減租，咁就梗係有壓力啦！呢份newsletter嘅secret garden設計，係佢公司成班經紀一齊度嘅，俾大家填吓顏色減吓壓喎！係咁就啱，你字號又唔係大，唔諗吓點突出自己，你派多多份都唔夠啦，寄多一萬封都冇用呀！ 南豐秘密花園 寫字樓的天台，往往是得意私人空間，以前中環太古大廈住咗美心集團創辦人伍沾德，已故慈善家何英傑居於北角煙草公司廠房天台，南豐大廈天台也設有秘密花園，係主席陳慧慧個女張添琳（Vanessa）得意之作，大學修讀Landscape Architecture，親手在中上環闢出另一新天地。 東亞腳仔軟 上期本刊封面故事，揭出金管局㩒死銀行、滋生財仔，炮製了捆綁式次按炸彈。故事出咗街後，攞命陳好鬼緊張，副總裁阮國恒走出來公開話，負資產個案增加乃「正常現象」，又補多句搞緊按揭中介問卷，睇吓有無問題。跟住，就輪到東亞銀行腳震喇。本刊查到，東亞近年仍繼續向康業信貸提供sub-mortgage。佢哋公關上週四嗱嗱聲傳真過嚟，澄清有關sub-mortgage嘅貸款組合已逐步縮減，並且喺金管局發出規定後，已無向放債機構提供「新」嘅sub-mortgage。公關其後再補充，話康業嗰啲係之前做落、未到期嘅盤，做生意唔能夠叫人即時還錢。佢仲強調無做新o架啦！ Well，點解東亞咁緊張？咪就係想話俾金管局聽：「我有做嘢o架！」 | ||||