ZKIZ Archives


搭的士難 左丁山

2010-9-24  AD




 

星期一香港大學 在下午五時有大師演講,就係一九九二年諾貝爾經濟學得獎人加利.貝加(Gary Becker)到訪,講題係"Causes of the Worldwide Boom in Higher Education, Especially of Women"(環球高等教育之原由─以婦女為特例),貝加之所以來香港,正與環球高等教育興旺有關。佢與另一位諾貝爾獎得主,芝加哥大學的經濟系同事赫克 曼James Heckman係訪京芝大代表團成員,到北京參加大學合作簽約儀式,之後就來港一行。

貝加名氣咁大,左丁山好想到港大聽演講,點知當日下午已掛咗三號風球,中環交通混亂,汽車在路上寸步難行,的士去咗邊呀?都唔知點樣先至搵到一部。等吓等吓,卒之投降,因為即使搵到的士去,都驚住唔知點樣可以返回中環。

近 來唔知係唔係因為經濟興旺,在中環放工時間,好難好難搵到的士。大記者最神奇,在大道中Club Monaco門口望到一架的士落客,及時跳咗上車,話去灣仔,點知司機大大聲咁話:「你估你上咗車,我就要去o架嘞,我可以交更唔接客o架!」大記者怕咗 司機大佬,唯有陪着笑臉咁話:「去灣仔好快啫,塞都係塞一陣之嘛!」司機再有偉論:「見你去平民區就去啦,我最憎啲半山區富貴師奶下午走落中環飲High Tea,飲完就叫的士上麥當勞道、羅便臣道,一程十八蚊,嘥晒我啲時間!」大記者為之哭笑不得,諗住的士司機有仇富心態還是係好生意得滯,要揀客呀?

惡 佬明另有所遇。呢日佢聽到沙田有急事,連忙走出灣仔地盤,立即叫的士過海,司機話:「咁塞車,唔去喎。」惡佬明講:「你冇得唔去,我上咗車你就要去,最多 就係行西隧。」司機話:「咁又點呀?你落車之後,我冇客返香港,行紅隧,又係塞死,計唔掂數!」原來司機要計埋來回車程,點都唔制,話要車惡佬明到華潤搭 過海的,惡佬明唔肯,要佢直去西隧,幾乎相持不下,但惡佬明係地盤佬,唔怕鬥大聲,話明唔去九龍就去灣仔警署,司機卒之都係死死氣過海,好快就到達目的 地,唔計隧道費,二百蚊有找,換轉係左丁山,一早會俾司機趕咗落車。

 


PermaLink: https://articles.zkiz.com/?id=18217

Next Page

ZKIZ Archives @ 2019