| ||||||
| 「年未三十，不 通一經，不得解褐」，讀吳瑞卿之《俗語有話》，方識此句。吳瑞卿之中大師弟妹，一群八十後，不妨細味斯言。有人講到社會進步，須要一代新人勝舊人，長江後 浪推前浪，但如果大學畢業生係一蟹不如一蟹，社會就停滯不前咯。 《俗語有話》第五頁講「一蟹不如一蟹」嘅出處，出於蘇東坡之《艾子雜說》 ──艾子行於海上，首先見到蝤蛑，然後見到螃蟹，是後見到蟛越，一隻比一隻細小，故感嘆曰：「何一蟹不如一蟹也！」如果在街市或超市首先見到北海道大蟹， 然後見到廣東肉蟹、花蟹，跟住見到蟛蜞，就知道一蟹不如一蟹嘅道理。 香港人最鍾意炒樓，炒地皮，「地皮」原以為係廣東話，但吳瑞卿考證，唐 代詩人盧仝《蕭宅二三子贈答詩》有句：「揚州惡百姓，疑我捲地皮」，地皮即地面或地下，韓愈《昌黎集》有：「榆莢車前蓋地皮」，蓋地皮就係鋪地面。由此可 見，「地皮」一詞，古已有之，廣府俗語甚有古風，上述之「蓋地皮」、「捲地皮」可證。捲地皮就係貪官搜刮民財嘅意思，今日我哋講炒地皮，炒即炒賣，有根有 據o架。 近日睇世界盃，英格蘭對阿爾及利亞，英隊水皮到極，控球、傳球、射球，全部不知所謂，隊中一個朗尼加一個謝拉特，皇馬傳出消息話會 出一億英鎊買入，值唔值呀，呢兩位仁兄嘅身價，可以買起全隊阿爾及利亞與史洛文尼亞甚至加埋全隊美國，但佢哋打唔打得贏阿、美兩隊呢？唔得咯。阿爾及利亞 穿綠衣綠褲綠襪，球迷戴綠帽，我哋睇見就暗笑，點可以戴綠帽o架！吳瑞卿本書《俗語有話》（第一百二十四頁）講綠帽，原來可以去到漢朝咁遠，漢代人民分等 級，賤民最低下者戴綠色頭巾為記，至唐代，犯罪分子會受罰集體戴綠色頭巾遊街示眾受辱。到咗明朝，妓女房間有綠色窗口，稱為「綠窗」，在妓院謀生之男人 （如今的「馬伕」、「龜公」）全戴綠頭巾，傳傳吓，家中妻子紅杏出牆，老公等同妓院男職工，等同戴綠帽。外國人（如愛爾蘭、阿爾及利亞）喜愛綠帽，我哋就 萬萬不能。 | ||||||