| ||||||
| 行政會議召集人 梁振英傾向支持資助置業，可能係專業測量師言論，亦可能係政治性言論，地產界中人幾乎一致反對。但一間擁有最多發展土地嘅地產公司嘅主席竟然發言支持，與 田北辰站在對立面，就令人覺得驚奇。呢間大地產公司就係MTR港鐵，主席錢果豐對記者講：政府有責任實現市民安居樂業憧憬，梁振英有見地。同一日， 運輸及房屋局副局長邱誠武就話七成置業目標已毋須保留，政府嘅主要角色係集中於土地供應方面。 第二個地產公司主席講資助置業，會真係得個講 字，但港鐵主席就唔同，港鐵嘅大股東係特區政府，三十年來經營地鐵，根本全無賺錢能力，唔蝕本當偷笑，港鐵之有盈餘支付龐大債務嘅利息及償還本金，全靠地 鐵站上蓋等物業發展權，港鐵要興建港島西綫，因上環至西環已無上蓋供建築新樓用，港鐵立即計唔掂數，要政府斥資，港島南線由於有黃竹坑上蓋發展權，港鐵可 望賺到大錢。 由此可見，一旦離開地產，港鐵頂多係一間無利潤之公共交通公司，隻股票有人買先至奇。而今錢果豐主席贊同梁振英所言，可以身體 力行吖，譬如在黃竹坑物業投標時，可以在標書講明，全部興建五至七百呎嘅細單位，售價不超過五千元一呎，方便上車人士，而在地價方面，一般估計係三百億元 左右，錢主席可否向林鄭局長曉以大義，將補地價減至一百億元？如此一來，特區政府變相津貼新樓業主，港鐵公司唔賺錢，或賺少好多，亦係補貼新業主啫，大股 東唔會嘈。如要防止炒賣，大可限定未來黃竹坑物業上蓋住宅單位嘅新業主，買入後要入住起碼三年，先至准轉售圖利，或當係居屋辦，轉售要補地價！如果錢主席 在董事會上提出，又得到林鄭局長同意嘅話，錢主席嘅威望一定直線上升，蓋過曾特首與曾司長。至於小股東若有任何投訴，叫佢哋去搵周松崗呢位外貌似佛爺嘅總 裁啦。錢主席有資格講得出，做得到，既然已經就資助置業一事表態，索性責成下屬落實啦。 | ||||||