我主場：苗僑偉最緊要好玩
1 :
GS(14)@2013-06-29 17:45:35http://hk.apple.nextmedia.com/entertainment/art/20130629/18316020
嫌棄再演警察
過往三哥所拍的電視劇，收視方面都有好成績，加上今次找來萬綺雯、黃宗澤和周麗淇演出，難怪外界視為救亡劇，三哥說：「唔可以話救亡，呢啲全部係公司安排，我相信擺邊套劇喺呢段時間播，大家都會咁講，呢次只係咁啱得咁蹺。當然，《好心》嘅娛樂性豐富啲，又好少呢類題材，我自己都有信心，唔會有壓力。」
三哥笑說：「今次係一切從心開始。成套戲有啲黑色喜劇包裝，幾特別，同我以往拍嘅唔同，我相信喺醫學角度上，唔會有呢啲事發生，不過喺某程度上，我覺得會有啲不期然嘅嘢走出嚟，真係好懸疑。」
從80年代開始拍劇至今，見慣世面的三哥，又怎會受這些不能控制的因素影響，現階段若非題材特別，相信未必可以吸引他，他笑笑口說：「唔係咁講，話晒拍咗咁多年戲，做過好多唔同類型嘅角色，都要諗好多嘢。而家基本上每年幫TVB拍一套劇，佢哋都會諗有乜嘢啱我做，不過我都覺得幾難諗，好似《學警》呢類型又拍咗幾輯，警察又做過好多次，仲有啲乜嘢可以玩呢？」
三哥續說：「今次呢個特別啲，好過癮又好好玩，講我換咗心之後對我嘅影響，作出嘅改變，所以前半段觀眾會覺得幾好笑，後半部嘅感覺會heavy啲。如果你問我，我鍾意前半段多啲，唔單止角色見到個演繹方式有轉變，我又唔使再做差人，捉住啲人喺度走嚟走去。」
挑戰寫實角色
作為一個演員，最開心當然是可以收到一個有新挑戰和新嘗試的劇本，但相信最令人羨慕的，莫過於他可以選擇喜歡的工作，吃喝玩樂又可以隨心所欲，難怪他笑說：「所以我覺得做嘢嗰陣會好開心，最緊要好玩！」
三哥透露下半年無綫會為他度身開拍一部新劇，提到今次的題材，他說：「詳情未知，初步知係一套貼近現實嘅劇，講香港嘅金融市場，類似華爾街嗰啲，貼近打工仔嗰層，但係我未知做乜嘢。」
冇面俾 林峯唔吼《使徒行者》電影版 監製戚美珍推老公苗僑偉升男一
1 :
GS(14)@2015-06-11 12:40:372015-06-11 NM
大台打鑼宣布開拍《使徒行者》電影版，話明原班人馬，林峯、佘詩曼孭正，點知已離巢的峯少唔稀罕，一句「無興趣」，推！被老死曾志偉拉落海做電影監製的三嫂戚美珍，索性順勢推在劇中飾演臥底阿Sir卓凱的三哥苗僑偉，做電影版男一，夫妻檔上陣，話晒事。唔傾片酬即推
繼《衝上雲霄》一開二後，無綫拍板開拍去年最高收視劇《使徒行者》電影版，並屬意沿用已經離巢的林峯做男主角，但林峯話之你，以「無興趣」為由拒絕，完全冇面俾。「林峯梗係唔接！《使徒行者》都叫做高收視，但TVB淨係俾佘詩曼攞視后，就算Seed哥都好有口碑，但林峯因為唔續約，就連豬肉獎都冇！既然係唔開心咁走，點解仲要俾面；況且林峯而家集中打大陸巿場，嚟緊又會同古天樂合作《尋秦記》，所以佢連片酬都懶得傾，一口就推咗。」林峯身邊人說。
徐子珊謀住
大台開戲，一貫慣例，自己友玩晒，《使徒行者》由曾志偉負責策劃，自己友戚美珍處女下海做監製；男主角換人，劇本亦要重新執過。「三哥三嫂同殼王玩得好埋，年前志偉叫三嫂出山幫大台主持飲食節目，三嫂碌卡搵咗好多紅人好似梁家輝、洪金寶做嘉賓；今次由佢做監製，對搵大卡士幫手都有幫助。而家林峯唔做，三嫂索性叫自己老公做男主角，反正之後都會搵啲大卡士坐鎮。」知情者說。男主角有變，女主角釘姐亦可能換，據了解，明年二月約滿的佘詩曼，仍與大台在拉鋸 階段。「如果阿佘唔續約，TVB未必俾佢做女一，加上樂小姐之前安排咗一班就快約滿嘅藝人同老闆食飯，徐子珊講到明續約條件係要有機會同想拍戲，所以如果阿佘傾唔掂，徐子珊分分鐘做女主角。」知情者說。
食得唔好嘥
電視劇收視好，亦唔擔保拍電影版有捧場客，但大台食得唔嘥，近年將收得的電視劇一開二，執多劑！
《Laughing Gor之變節》09年電視劇《學警狙擊》的Laughing哥大爆，大台搵影帝黃秋生及吳鎮宇坐鎮，捧謝天華做男一開拍電影版《Laughing Gor之變節》，公司揼本捧，不過謝天華人氣未有受惠，前年約滿大台後自組公司返內地發展。
《衝上雲霄》《衝上雲霄2》大收，不單令Cool魔張智霖人氣爆燈，大台更趁勢開拍電影版，除了安插親生女佘詩曼做女主角，又搵來古天樂、鄭秀文等大星孭飛，今年賀歲檔期收二千多萬，票房一般，慘蝕收場。
【爆相爆片】捕獲疏導交通苗僑偉逐車 溫柔指揮
1 :
GS(14)@2016-10-13 08:09:34■苗僑偉逐架車叫佢哋慢慢後退，助郊遊人士解決塞車困局。讀者提供圖片
三哥苗僑偉雖然已經五十有八，仲有兩年就登「六」，但對佢嚟講年齡唔係問題，次次出嚟都係一貫chok爆型佬look。平時做開「型警」嘅三哥原來唔係電視上先見得到，前日讀者李小姐透過本報「爆相爆片」，分享喺南生圍「捕獲」三哥指揮交通嘅情況。
■苗僑偉大前日在南生圍化身「型警」，幫手指揮交通。讀者提供圖片
慢慢後退
大前日雙十節，李小姐一家大細揸車去南生圍郊遊，因為嗰度係單程路，加上兩邊行人路又有唔少路人，令現場交通頗為混亂。李小姐話冇耐見到一個着住白色T恤兼戴住黑框眼鏡嘅男人，逐架車叫佢哋慢慢後退，當時佢都冇為意，直到佢老公話呢個係三哥苗僑偉嘅時候，佢真係好愕然。片中就爆咗一句：「真係㗎！？好有型呀三哥！」李小姐話開頭都唔信，行近啲見到真係，即時讚唔停口：「佢身形真係好fit，把聲仲好溫柔。嗰陣因為有車出唔到嚟，佢就每架車幫手叫我哋退後，可能冇諗過會喺呢個情況下見到佢，所以大家都慢慢退後。」查實唔止司機愕然，連啲路人都忍唔住向後望！至於搞咗幾耐啲車先退後晒？李小姐話：「我諗有10分鐘度，我架車後嚟泊咗埋一邊，就冇再睇到佢行咗幾遠。」
來源:
http://hk.apple.nextmedia.com/entertainment/art/20161013/19798786
苗僑偉話周柏豪冇義氣
1 :
GS(14)@2016-12-07 07:41:19苗僑偉（三哥）和米雪昨日在尖沙嘴出席健康食品活動，對於合作拍劇《使徒行者2》的周柏豪早前秘婚，三哥笑說：「佢突然請假幾日，以為佢去做嘢，點知被狗仔隊影晒，我哋有恭喜佢，不過話佢冇義氣，要佢返嚟請我哋食飯。」會否擔心將來女兒苗彤的婚事先斬後奏？三哥說：「唔會啩！我啲仔女好聽話……應該，佢哋冇咁快，我係呷醋外父。」三哥表示已見過女兒的男友，但笑言叫她要多找幾個做選擇，並直言是民主家庭，一切由子女決定。提到米雪與岑麗香將在《溏心風暴3》飾演母女，米雪表示知道香香結婚，很替她開心。採訪、攝影：黃曉妍
來源:
http://hk.apple.nextmedia.com/entertainment/art/20161206/19856111
Next Page