ZKIZ Archives


營運人生(7)陸羽仁


http://blogcity.me/blog/reply_blog_express.asp?f=5YTPBH5B812303&id=239775&catID=&keyword=&searchtype=


美股早兩日微升牛皮消化一輪後,終於又再突破向上,杜指升咗成100點。摩根大 通及Intel公布業績亮麗,企業與消費者支出回升,美股牛皮咗咁耐,刺激投資者入市的胃納,杜指升至2008年9月以來新高,標普500指數亦收報 1200點關口。杜指昨日走勢都好靚仔,全程穩步向上,以接近全日最高位收市,收報11123點,升104點;標普500指數升13點至1211點;納指 升幅就更為顯著,升40點至2505點。杜指期貨指數最新報11059點,比現貨低水64點。

 

港股美國預托證券造 好,ADR港比指數收報22372點,比香港收高251點或1.1%。匯控報83.56元,比香港收市高 1.3%,中移動靠穩,收報80.37元,比香港收市高0.4%。

摩根大通及Intel齊派第一財季成績表,成績都好過市場預期。摩通盈利較去年同期增長55%;Intel仲驚人,賺咗24億美元,大 幅增長近3倍。摩根大通股價大升4.1%,美銀漲3.9%,美國運通升3.3%,三隻股票佔了藍籌股升幅榜的頭四位內。排第三嘅係Intel,升 3.3%。

值得留意嘅係兩家公司上季業績同樣超出預期,但業績公布後,投資者馬上趁好消息出貨,兩隻股 票遭大量拋售,當時股價都無得升。今季公布完業績股價都明顯造好,反映投資者對美國經濟復甦的信心,正在增強,雖然都有短炒獲利貨,但更多長線投資者入市 接貨,購買力大過沽貨力,所以仲有得升。

另外,昨日公布的經濟 數據亦提升了市場投資信心。政府報告稱3月份零售銷售上升1.6%,出現了4個月以來的最大增幅,顯示消費回升。 但同期嘅消費者價格指數(CPI) 較上月微漲0.1%,符合市場平均預期,經濟復甦未引來通脹。核心通貨膨脹數據持平,投資者亦沒有加息的壓力。2月份商業庫存較上月亦增長了0.5%,高 過市場預期的0.4%,亦好過1月。

運輸業的表現,最能反 映商業活動是否蓬勃,美國主要的速遞公司UPS、和公路鐵路物流公司Landstar及JB Hunt業績都有明顯增長,Landstar及JB Hunt季度營收都有17%的增長,在在顯示美國本土的貨運業正在改善當中。Landstar的CEO Henry Gerkens話,「運輸業環境正在改善,預計情況會持續至今年第二季。」UPS就弱啲,只有7%的增長。

美股而家全面炒復 甦,都係週期股當旺,好炒過消費股,顯示市場對高失業率下的消費市場未夠信心。

昨日睇到網友stockinvest一段留言,才知道佢有份月入30000元平平穩穩的工作,為何咁想轉做全職投資者。佢話自己或者比較 得太多,有太多的不必要壓力。壓力來源並不光因為自己,亦來自己的家庭。佢父母、兄弟都好過佢。過去的下屬如今都成了商人,或者收入、資產少過佢,但有更 好的前途(只是佢覺得係咁)。佢太太的朋友有啲資產有1000萬(佢只有580萬),仲在增長中,所以stockinvest認為買股票是他唯一的機會, 去令佢攞番啲榮耀,但佢亦明白,比較太多會令自己變死人,若不享受自己的所有,會走入死胡同。

     唔好覺得stockinvest無病呻吟,人經常有「人比人,比死人」的煩惱。我小學的時候,新年時最怕一個 師奶來屋企拜年,佢會滔滔不絕咁講自己個仔幾叻,入咗名校讀書,又會話個女仲叻,入名校都唔止,仲考埋第一。我阿媽愈聽愈黑面,用眼角崛我一下,好似見到 佢頭頂飛出句話:「最衰係你呢個百厭星,無心機讀書,搞到我無哂面。」我只能好無癮咁向後走。40年過後,睇番呢兩個叻仔叻女,佢地而家做嘢都係好一般咋 噃,當年咁比,又有乜意思呢?

     有一個故仔仲絕,一班朋友食飯,當中不少事業有成人士,朋友A是 大公司老頂,是朋輩公認的打工皇帝,佢太太講起家事,面有慍色咁話,「都唔知點解我老公咁衰架,返到屋企乜都唔做,只識坐在梳化睇電視,好似死狗咁,話好 辛苦、要休息吓喎,屋企啲嘢佢也都唔理架!都唔知想點。」朋友A稍稍回應一句:「我都有返屋企呀。」朋友B聽得出呢句話的絃外之音,就出來抱打不平話: 「阿嫂,你就唔好咁多要求啦,好似阿A咁,50歲剛出頭,年入近10球(近1000萬),有咁多身家,我見到呢啲人,10個中起碼有5個出去滾,有啲仲收 埋一件生埋仔。你老公係好人嚟架,佢無出街玩,早早返屋企,乜唔係好好咩? 你要知佢管咁大盤生意,日日返工好似鬥牛咁,放工睇電視,只係俾大腦休息,你就唔好咁多要求啦。」

    朋友A太太聽後無言,朋友B再補多幾句,「好多二奶醜樣過大婆,啲大婆唔明,二奶未必要好靚,但係佢地千依百 順,老公見到佢地好開心。但老公一番到屋企,見到大婆好似老逢咁,日嘈死嘈,聽到都心煩啦。你要知你老公在外頭幾威先要得,你唔好用打狗捧日日將佢當狗打 啦。(有一句無講,『咁遲早打走佢架』)」

     唔好意思,愈講愈離題,我只係想 講,人係咁,愛好比較,喜新忘舊,男又係咁,女又係咁。我只係想同stockinvest及佢身邊的人講,唔好成日比較啦,風物長宜放眼量,而家又點知 20年後,邊個會好啲呢。都係珍惜眼前人,珍惜自己擁有好啲,當擁有失去時,先至知道痛苦呀。再加一句,stockinvest,唔好俾呢啲壓力,逼你去 做你做唔到啲事,人生要由自己努力掌控。

陸羽仁

PermaLink: https://articles.zkiz.com/?id=15148

Next Page

ZKIZ Archives @ 2019