查封酒店
2008-06-28 AppleDaily
一 百歲唔死有新聞聽，香港執達吏查封樓宇追債，並非新生事物，時有所聞，但係查封酒店，旅客被迫鬆人，則係未曾見過，聽過。旺角一間漢普頓酒店，英文叫做 Tatami Hampton Hotel，如果唔係發生新聞，左丁山都唔知呢間酒店位於何方。上雅虎香港網查吓，呢間酒店位於旺角長沙街十一號，有一百零八間房，睇吓啲資料，屬 budget hotel類，圖片顯示房間窄細，有一位美國旅客Joseph W，於六月三日住宿，在網上留下評語云：I was extremely disappointed in this hotel...Don't trust the pictures...dirty sheets, dirty walls and tiny room，又話即使為咗慳錢，北角有一間賓館仲會好啲。如此酒店，難以評論，香港好多時客棧、賓館、酒店不分，旅客若非有親身體驗，靠網上資料，難以作 準。至於業權方面，東亞銀行早於二○○二年二月入稟法庭要求酒店業主「勞工大廈股份有限公司及中邦有限公司」還款，連利息高達八千六百多萬，單官司要等到 二○○七年第四季先至聆訊，○八年一月二十三日法院裁定東亞勝訴，被告上訴，一路拖到○八年六月十八日東亞先至正式透過執達吏去接收酒店。但在官司期間， 酒店繼續做生意，接受訂房。法院於○八年二月二十一日正式發出管有令狀（收樓令）及扣押債務人財產令狀，被告喺三月、四月、五月及六月向法庭申請「臨時暫 緩執行令」，法庭逐次駁回。後來上訴庭按第一被告要求，下令「臨時暫緩執行令」可伸延至六月二日，畀時間被告安排好酒店訂房事宜。如果真係有安排好──即 六月二日後再唔接客了，咁就乜事都冇。但酒店仍然接客噃，於是到咗六月十八日，執達吏收樓時被迫要遣走啲住客。如果酒店及酒店業主按照法律及法庭命令做 事，就唔會累親旅遊事務專員區璟智俾人批評，其實旅遊界平時應該留意法庭新聞，一見到有大型追債案件（八千六百多萬，夠大型嘞啩！）就應該主動 monitor（監察）酒店嘅事態發展，及派人到酒店了解營運情況！