ZKIZ Archives


欺騙港 Money Cafe

http://moneycafe-icable.blogspot.hk/2014/07/blog-post_8318.html
考慮分析員推介週期股、商品股前,關鍵不在於上升空間、行業需求、價格走勢,而係相關抵押融資連鎖問題。

一單之後可以再接一單,摩根大通認為青島港雨過天青,內地進口商重拾補倉意欲,但青島之後,可以有另一個港!!

繼銅之後,仲有其他商品!!

內地繼「鉻」、假黃金後,再爆一單。主要是天津港,涉及嘅係石化副產品: 混合芳烴。

話說,中石油旗下公司中聯油,早前進口四千噸混合芳烴,總額四千萬人民幣,五月憑單提貨時,貨不見了!!

中聯油驚慌下報警,揭發事件原來涉及重複單據。

四千萬人民幣小數目,但再次意味內地原材料相關抵押融資出神入化。而且範圍廣泛,唔係你我可以想像。

行內人話,內地基本上咩都可以抵押,尤其以原材料同商品最普及,但基於考慮可存放時間,大豆、糖、麵粉等,相對無咁普及。

基於實際需求有限,但抵押能力極高,原材料相關融資誘因極大。

假設廠家或進口商有意玩抵押融資。
一,先鎖定進口原材料、
二,聯絡銀行,透過訂單申請購進原料融資,並由銀行代為支付交易。
三,原料抵步後,進口商既可以將進口單,出售予另一間銀行,賺中間息差,甚至用單據作為抵押,獲取另一筆貸款,而筆錢可以買理財產品,亦可以提供高利貸。

屈指一算,扣除大概六釐利息成本,可以收回息差回報,由八至數十釐不等。

瞭解流程嘅話,觸發原材料抵押融資出事,源頭未必係商品價格,而係背後資金鏈有阻滯,例如理財產品拖數、中小企債仔走佬或跳樓,於是問題就開始由龍尾,燒到龍頭。

原材料抵押融資,由於接連有重複單據,虛假文件,錯的可以是銀行、進口商及商家,但亦不排除是港口本身。

有跟內地港口分析員指,近年生意淡靜,原材料按基本因素的實際需求根本有限,碼頭多多,但真正進口少少,變相令碼頭之間競爭更激。

於是為搏廠家或進口商一笑,內地幾乎所有港口有提供一站式抵押融資服務,而濫做之後問題就越滾越大。

高盛估,內地相關原材料抵押融資,涉及規模高達千六億美元,數目唔大亦唔細。

但高盛無計算、亦無法計算嘅係,千六億美元以外嘅假單、重複單據係咪更多,數字會否更大,以及被抵押的範圍!
PermaLink: https://articles.zkiz.com/?id=105393

Next Page

ZKIZ Archives @ 2019