中環在線：兄弟內訌羅康瑞感同身受 李華華
2008-05-29 Appledaily
家有9兄弟姊妹嘅瑞安房地產（272）主席兼行政總裁羅康瑞，同樣經歷過兄弟爭拗，噚日佢好有同感咁話，香港好多家族式管理嘅企業，好有問題。雖然佢冇開名話講邊間，但新地（016）三兄弟決裂咁熱爆嘅新聞，好難唔令華華將佢嘅說話，同「郭家大事」對號入座嘅。
羅 康瑞噚日係應邀為香港上市公司商會任演講嘉賓講企業管治，呢位「上海姑爺」一開口就話父傳子、子傳孫嘅家族管理模式，有好多問題，搞到身為商會副主席嘅主 人家胡文新，面有尷尬之色。心水清嘅都知，胡文新都係接老竇胡應湘棒，喺合和（054）幫手。好彩羅康瑞補充話，家族管理都有好處。
人多爭拗多
羅 康瑞又話，人多就梗係多爭拗，尤其係當創辦人過咗身，更加難控制。華華問佢對新地郭家有乜意見？佢話唔方便評論。咁點先可以做好「公司管治呢又？」佢話： 「最好就梗係監、管分家，同埋令到員工對公司有歸屬感，好似瑞房茶水部連個阿嬸，都有認股權，而我就下放權力，支票都唔簽，公司有幾錢我都唔知o架！」咁 自己荷包有幾錢應該知喇啩。電郵：[email protected]
Next Page
ZKIZ Archives @ 2019
|