ZKIZ Archives


[獨家專訪]香港發展需靠內地 曾蔭權籲互相多包容 2016年09月08日

1 : GS(14)@2016-09-09 04:46:16

http://www.am730.com.hk/article-328704


回歸後歷屆特區政府致力推動中港融合,但兩地交流近年衍生不少矛盾,前特首曾蔭權認為,香港發展一定要靠內地,否則本港各方面發展會落後於人。他又說,由於兩地分隔逾百年,雙方原有差異在融合過程中會產生一些問題,最重要是互相更多包容。


對於中港融合的長遠發展,曾蔭權抱持樂觀態度。他在訪問中明言,香港發展一定要靠內地,「依家國家發展速度咁好,係全世界差唔多去到第一、第二大經濟體系,而且發展一定向前,更加開放、更加自由、更加相像一個國際化路線,咁情況嘅時候,香港如果失咗機會,我覺得好差!」
他多番強調融合過程中必須更大包容,「要內地人包容我哋,我哋都要包容內地人,咁先能夠作為國家一分子……」他自言對此相當堅持,「因為如果唔係咁嘅時候,好快不單俾人經濟追上,而且(香港)喺社會發展、政治發展方面,你都發覺自己落後。」


憂港人包容能力低
中港經濟融合為香港帶來好處,但兩地因文化差異而產生不少問題,曾蔭權坦言,「大家分開咗隔離母體成百年,行埋一齊時梗有少少唔同,但係一定要互相知道,互相包容。」曾蔭權退休後經常到內地旅遊,他以自身經驗指內地人普遍很友善,「我覺得內地對我哋嘅包容能力,係多過我哋小部分人對內地人嘅包容能力,呢個係我擔心嘅地方。」但他說,「可能香港亦都係少數,經過媒體鏡頭攞出來,角度可能有少少歪變都未定,變咗唔得清清楚楚知道,香港亦都未必係咁都未定,我哋真係要互相多啲包容先得!」
2 : GS(14)@2016-09-09 04:46:38

http://www.am730.com.hk/article-328703


2017年將是香港回歸20年,惟不時仍有人嘆「人心未回歸」,近來「港獨」意識更有抬頭之勢。前特首曾蔭權接受本報專訪時,首次回應這個火辣議題,他認為,「有啲嘢係真嘅呢,你點消滅都消滅唔到嘅;有啲嘢係假嘅、係虛浮嘅呢,你唔使做咩佢都會自動消滅」,他認為大家應以放懷心態看待問題。
採訪:馮振超 鄭秀韻
攝影:黃文山 鍾式明 陳奕釗


「港獨」議題近期鬧得沸拂揚揚,有政團打正旗號宣揚「港獨」,中大傳播與民意調查中心於7月公布的調查,更顯示有近四成年輕人支持「港獨」。前特首曾蔭權管治香港7年,期間鮮有「港獨」爭議,是甚麼促使這股思潮出現?他接受本報專訪時,無迴避這個火辣議題,並指有一些個人看法,「我自己有啲意見嘅,但唔得成熟」,他並無具體說明。但他說:「有啲嘢係真嘅呢,你點消滅都消滅唔到嘅;有啲嘢係假嘅、係虛浮嘅呢,你唔使做咩佢都會自動消滅。」


籲放懷態度看問題
本身是虔誠天主教徒的曾蔭權,以宗教作例子,「好似兩千幾年前啲人對住基督教嘅滋長,當時猶太教一個長老話:『你唔使緊張㗎,我哋見到好多邪教出現,你唔使理一陣間佢自己自動消滅』;如果真係真理嘅時候,你撳都撳佢唔住,佢自己走出嚟,所以咁嘅態度睇,放懷啲睇呢個問題。」
他指現時社會有些走向極端,「但唔好睇少香港人,佢哋亦睇通,唔理報紙有時特別吹噓某啲言論、唔理吹噓某種嘢、特別專注睇啲負面嘅嘢,香港人睇清楚都唔係咁吖,如果唔係,你見到香港人都返嚟呢個地方最開心。」


極端言論是社會當前挑戰
提及社會上的極端言論,曾蔭權認為這是社會目前面對的挑戰。他任內曾企圖以大局著眼作溝通,與不同陣營包括與泛民主派良性互動。他認為交流溝通有助香港發展,「我諗好多人都會覺得係要咁樣啦!」但他說,「有時(溝通)都唔係容易㗎,需要有客觀條件同環境先可以做到。」他解釋,「你就算溝通都好,冇一個好極端嘅人倡扯(拉埋)中間派拉去極端位置時,比較容易傾啲,但當社會出現好極端言論,不理係左、係右、係對內、對外,一『掹』開時,政治中立同中間位置一路扯開,一扯開時溝通上愈嚟愈困難,我諗我哋依家社會面對嘅挑戰就喺呢度。」
對於是否擔心現時社會兩極化,他說,「我只係覺得香港係福地,香港人係聰明人,佢自己會做好選擇,唔好批評佢話會走去某個位置,如果(去到)某個位置發覺對長遠利益唔得好時,佢自己會走番返個位置,我諗最緊要係,任何人都要對呢個土地啲人,不止要投入去,要相信佢,一定會做番好。」
曾蔭權任內與各方「傾到偈」,被問及是否因個人包容度較高而有優勢?他即說,「唔好用相對字眼」,以免與任何人比較。他指出,每人都有特質及特性,「如果特性運用得好時,會做得好;如果運用得唔好時,或自己唔係專長做第樣嘢,可能做得冇咁好未定,但最後要接受冇一個人係完美,都有瑕疵。」他續說,「我自己嘅要求就係每個參政(從政)人士,都要面對香港市民、香港社會、香港地位、國家情懷,我哋需要成日記住,如果做公務個個懷住呢個心時,而且能夠有機會發展所長時,個個都會做得好好。」


政治環境不同 拒與現屆比較
多年未有公開發表言論的曾蔭權,接受本報訪問時隨和友善,一點架子也沒有,有問必答,唯一是不評論現屆政府及特首的處事方法,「我掌握唔到咁多事實,唔好立亂評論,而且我亦覺得唔係幾公道。」他不慍不火稱,每人做事方式均有不同,他指任內只要認為當時環境需要,便會努力爭取,當中不乏爭議極大的議題,但亦「好彩做得到」。例如在政制方面,爭取到普選時間表,他自言當時是很大的里程碑;社會福利方面亦有不少成果,「有人唔記得囉!但有啲人就好記得嘅,譬如最低工資,老人家坐車兩元,當時政治環境容許你做到啲嘢,尤其最低工資咁爭議性,但依家政治環境,如果要做,要不同方法先做到,呢個係事實,但我再講一次,我唔想做任何比較,自己對於人哋對我做啲嘢話做得好嘅,我好感恩,如果有啲批評我亦覺得好自然。」 (另有訪問內容見A4)
PermaLink: https://articles.zkiz.com/?id=308100

Next Page

ZKIZ Archives @ 2019