廁所滲水到主人房 地板須重換4,400萬豪宅變發霉屋
1 :
GS(14)@2017-10-09 03:24:03■主人房廁所滲漏令主人房地板發霉報銷。 讀者提供
【周末專題】曾經貴絕馬鞍山、成交價高達4,400萬元的迎海5期（迎海．御峰）特色單位上月入伙，但業主僅住一星期，單位就出事。主人房廁所滲漏令主人房地板發霉報銷，又噏又臭，弄得有房睡不得，無廁可沖涼，業主不滿執修工程拖拖拉拉，馬虎了事，整啲唔整啲，嬲到眼火爆！記者：陳家雄
業主去年花約4,400萬元購入恒地（012）馬鞍山迎海5期一個特色單位，實用1,929方呎，呎價22,876萬元，呎價一度貴絕馬鞍山。上個月收樓後一星期，他坦言，惡夢就開始……
■迎海5期
■發展商職員曾指浴缸底地台未有滲漏現象。 讀者提供
迎海業主轟執修拖拉
「初時見到主人房靠近廁所牆身地腳線撬起，以為小事，打算釘返就算。沒理會，十日八日後見到有水滲出來，滲到地板有兩灘水，整條地腳線甚至完全翹起。地板開始發霉，當時聞到一陣霉味，點瞓呢！最驚係吽蟲！」要求發展商起地板，卻拖拖拉拉，唯有自行委聘裝修師傅起地板，「再吽，怕吽出蟲！」地板起掉，近200呎主人房價值近460萬元，相當於一個沙田第一城兩房單位，卻不能使用。現場所見，亂七八糟，儼如廢墟。主人房的雙人床搬到客廳，業主無奈道，瞓廳、瞓書房、瞓梳化，全屋周圍瞓，瞓到周身骨痛，沖涼就要用工人房廁所。他稱：「當時覺得有少少抑鬱，好辛苦，有啲唔抵，唔係計較，係想佢快啲同我搞掂。真是冇諗過，冇諗過會漏水，嗰下，我係好驚訝，點解會係咁！」及後發展商派員檢查，並書面回覆業主指「經檢測後，確認企缸地台為滲漏之水源，需於主人房浴室企缸位置進行執修工程。」，而浴缸底地台未有滲漏現象。業主不滿，批評發展商「整啲唔整啲」，希望整個浴室防水層全面維修，無後顧之憂。他嬲爆地說：「不承認防水層，工程一拖再拖。好似講到我要claim嘢，要擸佢嘢咁，嗰種感覺好差，一句對唔住都冇。」
■主人房的雙人床需搬到客廳。
■業主沖涼要用工人廁所。
恒地：盡力配合
本報向恒地查詢，發言人回覆指，一直盡力配合業主要求進行一切修繕工作，是業主要求及雙方同意下進行。對於浴室按摩缸，根據檢測，並沒有出現滲漏，缸底亦沒任何滲漏迹象，已向業主解釋，但業主仍憂慮，並要求拆除按摩缸，因此順應業主決定而作出安排，唯因該按摩缸在拆除過程中，將難免有損毀而不能重裝，在得到業主的同意後，客戶服務組遂提供確認書供業主簽署作實，而該拆除工程亦已在得到業主的書面同意後展開。發言人重申，一直盡力處理和配合客戶收樓後的要求。
來源:
http://hk.apple.nextmedia.com/financeestate/art/20170930/20168854