ZKIZ Archives


中策組變打手 劉細良:邵善波真心膠

1 : GS(14)@2017-06-18 21:39:16

【本報訊】人稱「左王」的邵善波,一向被指是梁振英愛將,自梁特上任後獲委任為中央政策組首席顧問,卻因多次出位言論令人嘩然,包括「香港的政治制度不是三權分立」、「(建制派)40幾個人各自搞搞震」,同時得罪民主及建制兩派。曾與邵善波共事的中策組成員形容他「成日衝出嚟X」,令中策組由政策參謀變成政治打手的角色,大學講師亦批評他「由目標正當性到成敗論英雄,邵善波都不能說是成功」。記者:梁佩珊



「如果用一句話形容邵善波:真心膠」,曾任中策組全職顧問的劉細良如此形容邵,「真心膠」是指言行真正發自內心的「膠人」。



■中央政策組首席顧問邵善波

■蔡子強指若以成敗論英雄,「梁振英喺輿論戰下,民望都可以咁低,都證明邵善波相當失敗」。王子俊攝


毫不忌諱稱梁為老闆


回顧邵善波10年間在中策組的工作,由2007年起出任中策組全職顧問,至2012年獲委任為首席顧問至本月底任期屆滿,有「梁粉」專業人士透露,邵慣性稱呼梁為老闆,與人交流時,也毫不忌諱這種「家臣」表現,「佢會問人同唔同意『老闆』嘅講法,好似唔係做緊公職,而係幫CY打工」。一名企業高層也有同感,「CY係你(邵善波)老闆啫,唔係我老闆,我唔係奉旨挺梁喎」。劉細良指邵善波是「衝出嚟X嘅左王」,較文雅的說法則會用「Odd Man」形容,「類似小學同班,有位同學講咗個笑話但其實唔好笑,全部人望住佢自己講完自己笑」,「香港有好多左王,以往都比較審慎,位高權重的話唔會咁易衝出嚟講嘢,因為內容好有爭議性」。2009年邵善波曾被維基解密披露北京對香港政改底線、曾蔭權承諾任內解決雙普選未獲中央授意等消息。劉指,外國領事館與意見領袖見面是常態,但問題在於對話內容,「呢樣唔係朋友傾偈,朋友傾偈可以好坦白,但對方係做政治工作,作為喺政府工作嘅人,說話要好審慎,人哋就係收集情報寫完報告,你啲說話先會喺維基解密出現」。


蔡子強指輿論戰失敗


中策組原意是反映民情,為政府提供政策方向參考。2012年剛出任首席顧問的邵明言打輿論戰,「(中策組)一定係政府嘅工具,唔止係政治工具,係政府嘅籌劃或者係諗嘢嘅一個工具」,坦言若政府不發聲只會捱打。中大政治系高級講師蔡子強指梁特以鬥爭為綱領,邵這些公開言論「企喺梁振英嗰邊」,他指若以成敗論英雄,「其實都應該落台好耐,梁振英喺輿論戰下,民望都可以咁低,都證明邵善波相當失敗」。2014年,邵善波公開指「你話『西環』,即係中聯辦,又或者港澳辦完全不沾手香港事務,呢個唔係事實」;去年於梁頌恆、游蕙禎被阻宣誓時為政府解畫,撰文「香港的政治制度不是三權分立,從來不是,現在也不是」。「邵善波領導下嘅中策組,係由政策參謀走去扮演政治角色,成為北京喉舌,喪失原本功能,當你要探測不同意見,唔應該衝出來參與政治爭論」,劉細良用前中策組首席顧問劉兆佳與現任的邵善波作比較,他指兩者都是親中陣營,劉兆佳是扮演中央政策解說的角色,而非與民主派辯論。


「梁粉中好多Odd Man」


邵善波可說是建制及民主兩派不討好,4年前曾轟建制派議員各自搞搞震,「唔好講撐唔撐政府,你自己負責嘅嘢,每月出10萬蚊糧你都唔嚟」,反指泛民雖亦各有山頭,但協調不俗。劉細良笑言此言論是事實,但不能視自己是時事評論員,「有冇留意呢個唔只係邵善波嘅問題,梁粉中總會出現好多Odd Man,問題不是政見,而是作風,包括梁振英本人都係,建制派中嘅陳婉嫻同曾鈺成講起梁振英嗰時,態度都唔係好好」。蔡子強指,這與其說話火爆的個性有關,「即使邵善波要搵不同派別嘅人聽意見,惟對方會認為實際上斥責嘅元素更多,不利其工作」。候任特首林鄭月娥於選舉前後皆曾提出中策組要大換血,現任首席顧問邵善波表明要打輿論戰,但林鄭要求中策組重返政策工作,邵善波亦應會跟隨「主子」梁振英離任官職。蔡認為林鄭如何實行尚且是未知之數,但從言行可見已否定過去5年中策組的工作。



97年主權移交至今,香港前進還是倒退?「蘋果」與你細數廿載風雨。【回歸二十年】專頁:http://hksar20.appledaily.com.hk




來源: http://hk.apple.nextmedia.com/news/art/20170616/20058033
PermaLink: https://articles.zkiz.com/?id=335827

Next Page

ZKIZ Archives @ 2019