📖 ZKIZ Archives

直踩長實苦主埋身擊

2013-05-23  NM

長實單方面一句「取消交易」，令「劃時代地產投資項目」雍澄軒，極速變成劃時代的爛尾盤。買家不滿長實只連息帶本退款及只賠一萬元，不少強烈要求發展商遵守地產市場慣例：「撻訂賠雙」，甚或賠償一切融資損失。本週一，記者跟隨買家馮女士及香先生，直踩長實總部，見證長實如何以「人肉錄音機」，繼續狂耍買家。 本週一早上，雍澄軒買家馮女士與香先生，在沒有預約下，直踩長江中心，要求了解雍澄軒取消交易的最新賠償情況。兩人在地下大堂及八樓大本營等了足足半小時，長實一名黃姓職員才現身。一來到，他隨即展示手上的錄音機，按下開關，施施然坐下。兩名買家還未開始講有何賠償要求，該職員已搶先「人肉播帶」：「為咗更統一，我哋已交晒俾胡關李羅律師行的鄭律師處理，你哋或你哋嘅代表律師，可以打去同鄭律師傾。」兩名買家申明不想與律師「交手」，因為，「佢哋係專業人士，我哋唔係，邊拗得過佢呀！」該職員只重複「人肉播帶」，並伸伸手指着錄音機示意，所有對答都已錄低。買家香先生遂直接望着錄音機說：「最好叫李老闆出嚟，對住電視講，賠番雙倍訂俾所有買家！咁就唔使傾咁多，博到七百萬人掌聲添呀，希望李老闆聽到我哋的聲音、要求啦！」 買家：「唔會就咁算！」 半小時的會面在長實職員不斷重複「搵律師」下完結，其後買家之一馮女士，依照該長實職員所言，先後兩次跟胡關李羅的鄭律師電話對話，馮女士事後氣沖沖向記者大呻：「佢幾寸呀，同我講：『我哋唔會賠o架，你有證據就叫律師嚟索償啦！』即係耍我哋啦，我啲錢唔等住使o架，一定唔會就咁算！」做運輸生意的馮女士，近月被李家玩得團團轉，其本業被HIT工潮拖累，交收貨櫃已搞到一頭煙，今年二月買下雍澄軒高層單位，更讓她煩足多個月，「最初聽到話買咗就有人打理，永無租霸，諗住收租退休；點知，長實話肯造按揭嗰三間銀行，都唔願意借嘅！」為滿足銀行要求，她先以四萬元的雙倍價錢，要會計師樓加班趕起其公司賬目，但銀行仍以其要供兩部車為由拒借。為免最終不夠錢完成交易，她把在內地的人民幣定息提早提走，「原本六十萬人仔有四釐四息，提早攞番得一千七百幾蚊息咋！少咗九成，仲有匯率呢，人仔升值呢，分幾次運番香港呢，頻頻撲撲，呢啲數我點同佢計！」最激心是上週一她剛於銀行提早贖回兩架拖頭，以應付銀行借貸要求，「哎！三點五十分俾咗錢，轉過頭四點（長實）就話取消交易。」她拿出銀行存款單證明，贖回入數時間，的確是上週一下午三時五十一分。 損失「潛力」無限 開跌打館的香生當初搵銀行造按揭亦處處碰壁，最終把自住及收租物業加按，打算「full pay」雍澄軒單位，本月九號簽下加按合約，「唔知使唔使罰息，筆錢唔用就要俾估價費。總之現在係佢提取消成交，唔退訂加賠訂嘅，我咪堅持成交囉！」而以六百多萬買下雍澄軒唯一「總統套房」的陳先生，亦強烈要求賠雙倍訂，「買時話個單位連一百六十萬裝修，我諗住收樓後住番幾晚享受吓。又係當初趙國雄話可以自住，電視條片有晒o架，呢啲係欺詐，刑事嚟o架！」做貿易公司的陳老闆原來亦為「好戰」一族，「如果要計損失可以好多，好似長實退番錢俾我，我用來買番一樣價錢嘅物業，印花稅都因政府出招而加倍啦。如果其他買家話要搵消委會搞集體訴訟，搞大聯盟，要夾錢嘅我即刻俾！」據知現時已有不少買家互相聯繫，尋求傳媒、議員、律師等幫忙向長實索償，雍澄軒買家與長實「鬥智鬥力」的第一波已然展開，其他行動將陸續有來。

【埋身擊】展《鑽石花》首天剪報　贈倪匡「有字天書」 書展賀衛斯理50歲

1 : GS(14)@2013-06-25 01:37:00

http://hk.apple.nextmedia.com/news/art/20130624/18310240

董橋為展覽題字

                                    由讀者成為好友，施與倪飯局時獲悉衛已推出50年，「我哋成班讀者話要搞展覽，佢笑話唔好煩到佢就得」。七個自稱江南七怪的讀者，上天下海找資料，透過淘寶找到《鑽石花》於《明報》首天刊載剪報。商台在1988年曾製作衛斯理廣播劇，但錄音檔案已失；不過「我哋有」，結果他們反將檔案送予商台。衛斯理早期作品封面由台灣畫家徐秀美繪，對方允借出原畫。
展覽會推紀念冊，有倪匡生活足迹和讀者構思的衛斯理病歷表（因他常遇險受傷）、與白素舉行婚禮情況等。買得頭100本的可獲倪匡為今次寫的「給讀者的信」和由他手稿製的衛斯理小說，施笑說：「係有字天書，因佢寫嘅字好難睇得到。」
董橋為展覽題字，紀念冊書名「倪學」由蔡瀾所題，好友徐克錄影訴說對衛斯理的感受，蔡瀾、陶傑等也輪流在鏡頭前讀一段衛斯理故事。

睇3D莫高窟壁畫

                                    文藝廊又設專區，展示由城大互動視覺及體現應用研究室（ALiVE）等製作的「人間淨土──走進敦煌莫高窟」。360度環迴巨型圓柱型投影屏幕，以立體、高清呈現莫高窟第220石窟，內有藥師佛、仙女飛舞等壁畫。
ALiVE總監邵志飛稱，室內會模擬石窟的漆黑，觀眾透過3D眼鏡和微弱燈光觀賞洞穴及壁畫，部份以動畫展現，包括為書展新增的點燈，侍女會將燈輪上的蠟燭逐盞點亮，直至全室光明。市民須於本周三起於書展網頁預約。

---

【埋身擊】低調好老闆　撐員工行善 捐三文魚頭　讓貧苦食好啲

1 : GS(14)@2013-06-29 17:11:12

http://hk.apple.nextmedia.com/news/art/20130628/18315353

                  捐出三文魚的，是本港一間大型日本食品批發公司，主力售賣刺身和壽司；為免被指博宣傳，不願公開公司名字，老闆也拒絕出鏡。
該公司物流部經理盧樹堅，負責管理冷凍貨倉的存貨。他指出，公司每周開近百條三文魚，但只選用最靚的部位做刺身；剩下的魚頭和魚骨，會放在凍倉冷藏等候運往堆填區，平均每兩周「清倉」一次；每次約丟200份魚頭魚骨，但魚骨還黏着很多肉。他皺着眉嘆道：「雖然係下欄貨，但仲食得，就咁丟咗真係好嘥！」

效法明哥派飯善舉

                早前，盧看到《蘋果》報道明哥派飯的善舉，深受感動，「我真係好敬仰佢！想學佢咁，對社會做啲嘢！」便想到效法明哥捐食物，膽粗粗找老闆商量，獲老闆支持。「我哋連運輸、送貨都包埋，諗住幫呢啲慈善機構慳番回收成本！」盧滿意地笑着說。
但原來，「你想捐，都要有人肯要㗎！」他原意將三文魚交給明哥，但未能聯絡對方。他再致電數家機構，竟惹人懷疑另有企圖。「有啲說話好難聽，問我『咁你想點？』可能佢哋覺得世上冇呢啲儍人啩！」其後本報記者協助他聯繫，有些機構表示「不收凍肉」、有些「沒有廚房」、有些「沒有人手」，但專門回收過剩食物捐給有需要人士的惜食堂，卻大表歡迎。
記者隨惜食堂參觀該公司的凍倉，在零下20℃翻開盧口中的「下欄貨」：每個三文魚頭獨立包裝，三文魚骨「幾乎見肉不見骨」，色澤紅潤、脂肪分佈平均，看似比超市賣的更優質。但該公司表明不賣下欄貨。

鼓勵同業捐出食物

                                    盧說，還有「貴價貨」俄羅斯蟹腳及甜蝦，甚至鯛魚、油甘魚、煙肉、雜菜等，老闆都願意捐出。以甜蝦為例，食用期限9個月，但蝦頭位置儲存3個月開始變黑，「唔係變壞，只係唔靚仔啫！」日本餐廳不會收貨，「啲魚放耐咗，都係變垃圾，而家社會資源咁缺乏，不如捐畀有需要嘅人！」
他透露，不少批發商都有丟掉食物的情況，盼望是次捐物行動，能鼓勵更多同業捐出食物。
受惠的惜食堂營運經理周頌文表示，第一批接收到的三文魚頭和骨腩，重750公斤，最保守估計市值五、六千元，夠煮500個飯盒，若被丟到堆填區，實在十分可惜；以後每兩、三星期就會接收一次，而且捐贈者包送貨，可大大減輕惜食堂開支。
惜食堂現時每日煮2,000個飯盒免費送給有需要人士，包括長者、露宿者、貧童等；周指，現雖有40多家機構送贈食物，但份量仍然不夠，尤其在暑假，一星期要用數以萬元來購買食物。

---

2 : GS(14)@2013-06-29 17:11:29

http://hk.apple.nextmedia.com/news/art/20130628/18315356
【特稿】
惜食堂接收了三文魚頭和骨腩後，廚師全哥說：「我咁嘴刁都覺得好食呀！」他以前是五星級酒店的熱爐部主管，「魚鰭腩位最好食，又香又爽口，啲脂肪喺晒度」。

惜食堂行政總廚陸其君也說：「啲三文魚肉通透鮮紅，質素同喺街買冇分別，唔似要丟嘅貨色。」他以往是比利時駐港總領事館的餐飲部總管。昨日他們把魚腩炸了、把魚尾煎了，再配以南瓜椰汁，記者試食也認為非常美味；魚頭和魚骨則留作日後煲湯。
路德會富欣花園長者中心是受惠機構之一，昨日接收了65個免費三文魚飯盒，派給區內長者。73歲的歐婆婆即場試食後大讚：「三文魚魚腩啱晒我，又甘香，有少少骨！」75歲的劉婆婆也說：「三文魚好好味！」
惜食堂營運經理周頌文表示，三文魚處理簡單，又有營養，而且很多婆婆不吃牛肉，魚類很受歡迎。
《蘋果》記者

---

【埋身擊】愛心食肆免費派食物　 待用飯券響應者眾　各區都有明哥

1 : GS(14)@2013-07-14 11:33:34

http://hk.apple.nextmedia.com/news/art/20130714/18334017

深水埗　阿伯任食唔收錢

                在深水埗北河燒臘飯店，76歲的退休水手申伯，從口袋裏掏出10元，「畀碗白飯我就得」。飯堂女工說白飯不能堂食，瘦骨嶙峋的申伯沒多餘錢，老闆陳灼明（明哥）見狀，「畀個三餸佢，唔收錢，白飯你自己拎，食到飽為止」。申伯接過熱騰騰的飯菜，第一件事竟是主動打掃飯堂。女工說飯菜快涼了，着申伯快點吃，他卻說：「唔怕，人哋畀飯我食，我幫番佢做嘢。」用膳完畢，又再打掃半小時。
明哥說：「呢種就係互助精神。」原來申伯是熟客，像他這種三餐不繼的人，在深水埗有很多。明哥推出價值22元的三餸飯券，其中社區組織會捐出15元；明哥捐2元，有需要人士只需付5元購買；明哥會鼓勵獲助的人做義工，回饋社區，例如幫獨居長者打掃家居，或者到老人院派水果。他盼望互助模式能推廣到全港，「受過幫助嘅學生哥拎利是錢來買一張飯券，有時仲好過有錢佬捐一億，最重要係心意，社區有好多人需要人關心，佢哋有人幫完又可以幫番人，社會就和諧啦！」

善舉獲同區店舖支持

                每天早上10時許，愛心飯堂已坐無虛席，明哥傳餐、清潔「一腳踢」，又扶拿着枴杖的老人家入座，不時就說「請你食啦」。明哥的最大心願，是區區都有社區飯堂。「我哋好一枝獨秀，好多人諗起派飯捐嘢，就諗起我哋」。記者訪問當日，明哥便收到35箱紅酒，「棉胎、棉被、糖水乜嘢都收過」。
受到明哥感染，深水埗區內的麵包店和糖水店老闆，都響應過明哥的派發行動，「派飯去老人院之餘，都會派糖水、生果、麵包，大家一齊做」。早前桂林街有派米活動，「《蘋果》都話，原來深水埗唔止一個明哥」。明哥還經常受到不同辦學團體及教會聯絡派飯，「試過派足一星期」。
有做社區服務的商店不賺錢，明哥有一套經營妙法，經營到「22蚊3個餸，仲有蟹食」，還能賺取微利。「蟹要幾十蚊一斤好貴，我就同蟹販講，將甩手甩腳嘅賣畀我，10蚊一斤，就有新鮮蟹」。

自學水電維修慳成本

                                    愛心飯堂以廉價飯聞名，每日中午及傍晚時間，就有數十款餸菜供應。明哥更自學水電維修，既是老闆，又做通渠佬。他接受訪問時，一邊維修發熱爐，一邊說：「呢度慳500蚊，嗰度慳300蚊，盡量控制成本。」
今年4月碼頭罷工，DBC聽眾陳小姐向明哥買飯盒，支持碼頭工人。明哥以8折賣出，「有時訂50盒我都照送，1,000蚊仲要包百幾蚊車費，剛夠打和；訂得多，我哋就有得執幾百蚊，拉上補下」。他認為良心商店的路向，是小店在地產霸權盛行下的一種生存方式。「我見過有舖頭賣3、40蚊一個飯，晚晚賣唔晒要倒，都唔畀窮人食，自己又蝕錢，何必？」
明哥的善心獲全城掌聲，但卻試過被受助的露宿者大罵「點解你派飯唔係派錢呀？」明哥笑稱，這是他最難忘的派飯經歷。「唔會擺上心，最緊要幫人」。每月僅支萬多元人工，又經常派免費飯，受訪當日，明哥穿着破爛的衣服，「洗乾淨就得」。身旁的女工答：「老闆好好人，好少使錢，最多係派飯。」
明哥成為深水埗區內名人，亦是年輕人拍照放上社交網站的紅人。明哥沒因而驕傲，反而希望社區不需要有太多明哥。「我做？係幫低下階層，做得幾多得幾多，政府都幫唔晒佢哋」。他認為保民生的責任在政府，不在市民。「我做緊政府做唔到嘅嘢，希望政府多啲推動基層福利，等社區唔使咁多明哥，唔好淨係掛住有錢佬」。孟子游說梁惠王時說過：「黎民不飢不寒，然而不王者，未之有也。」現今香港，仍等待許多個明哥。

---

2 : GS(14)@2013-07-14 11:33:57

http://hk.apple.nextmedia.com/news/art/20130714/18334019



【特稿】
社會企業面對種種經營困難，明哥眼見社企或良心商店一間一間倒閉，連累了基層和露宿者。他正考慮與社區組織聯手推動「區區有社會飯堂」的計劃，第一站試點為深水埗，希望無家者及低下階層嚐到一口溫暖的飯，明哥亦提倡使用天橋底的空間做社區飯堂。
盼政府象徵式收一蚊租

明哥希望「將愛心推而廣之，各區嘅人都可以受惠」。他會以義務顧問身份參與，向社區組織提供經營愛心飯堂的經驗，如「邊度入到平貨、點樣控制成本、點一次過煮咁多人嘅飯」。第一站試點是明哥的「主場」深水埗，但尋找其他地區的地點則存在一定困難，「搵舖位好艱難，出面租舖非常貴，好多商家利字當頭」。
明哥早前向扶貧委員會提議，利用天橋底的空間做社區飯堂。「天橋底好多空置地方，可以有實際用途，想政府畀我用一蚊象徵式去租」。
明哥認為市民最重要的是「有兩餐食」，故希望政府能出手，為有需要的人士送暖。但他表示不會參與經營各區飯堂，認為最大的責任應該留給政府及社區組織。
《蘋果》記者

---

3 : GS(14)@2013-07-14 11:34:13

http://hk.apple.nextmedia.com/news/art/20130714/18334021


上月推出「$12.8餐蛋飯」的銅鑼灣心燒食堂，成功幽了$128的天價餐蛋飯一默，負責人Aska笑言只屬「抽水」，心燒食堂真正要落實的善心搞作，是推出待用飯券，派給有需要人士。
心燒食堂更廣邀區內食肆參與，計劃名為「Happy Friday」，讓貧困及獨居長者老有所「食」，已開始首階段籌款及派飯，期望在未來3個月，參與的食肆在門口張貼「膳有善報」貼紙，長者憑飯券可入內用膳；終極目標是愛心食肆遍地開花，「唔係心燒獨有，亦唔使記得心燒係第一間」。
心燒食堂於大半年前開業，負責人阮浩裕（Aska）與龍家輝（Paul）一硬一軟，Aska火爆，Paul眼淺。Aska心願是「當餐廳有盈利，就要做慈善」。善有善報，心燒得演藝界黃偉文、徐濠縈、黃耀明及盧覓雪等人支持，成為名人飯堂，生意漸上軌道。Aska君子一言，隨即與Paul聯絡聖雅各福群會合作，展開待用飯券計劃。
已籌得七千多元善款

計劃分四階段進行，第一階段會先落區派飯，了解貧困長者的膳食口味，第二階段是廣邀區內食肆參與，由心燒食堂籌款，愛心食肆會在門口張貼標誌，長者憑券用膳，食肆憑券到聖雅各福群會換錢；第三階段為客人自行向食肆購買飯券；第四階段是各區都有愛心食肆。
Paul表示，待用飯券的概念，是參考意大利及台灣的待用咖啡文化，及深水埗明哥的飯券模式，希望客人光顧餐廳之餘，向餐廳捐款，令有需要人士憑待用飯券，到愛心食肆用膳。「當你食餐飯食得開心，不妨諗吓可以平等分享，畀低25蚊，讓有需要人士都有得食」，心燒食堂現已籌得七千多元善款。
心燒食堂日前在聖雅各福群會，為30位長者提供免費的粟米斑腩飯，了解到長者「鍾意多餸，可以分兩餐食」的需要。Paul認為最大的困難是說服食肆參加，「要畀佢哋知道，可以喺飯券寫明繁忙時段提供外賣，非繁忙時間或者落場先招呼堂食，唔會阻住做生意」。灣仔的財記辣蟹一口答應，提供午膳「碟頭飯」。
老闆直言向明哥致敬

聖雅各福群會高級經理郭偉生表示，「老人家有自尊心，要佢哋問人拎飯食會好難受，但有張券喺手，感覺似有畀錢，唔係白食」。他又指灣仔及銅鑼灣區的食肆偏貴，「冇40蚊都好難有飯食」，但食肆於星期日中午人流比較少，不妨利用這段時間照顧貧困的長者。
Aska說，推待用飯券是要向深水埗明哥致敬，亦希望市民養成習慣，「唔係心燒獨有，亦唔使記得係心燒搞出嚟」。計劃以長者為對象，初為人父的Aska表示，有次在藥房門口看見一位老婆婆孤苦無依，他反思：「點解我個女就萬千寵愛，但個老婆婆由細路女變成老人家之後，就無人錫？」他指一頓飯雖是小恩小惠，「有人關心老人家，意義遠多於一盒飯」。
「『家．香港』係做騷」

Paul表示，社會上仍有許多長者未有溫飽，「政府畀3,000幾蚊佢哋，大半數錢都用作交租，每餐得10蚊8蚊食飯」，他認為政府「幫唔晒長者」，「搞乜嘢『家．香港』都係洗太平地做騷」。他謙稱自己不偉大，又指「如果每人都願意多做細微細眼嘅好事，世界會靚好多」。

---

4 : GS(14)@2013-07-14 11:34:40

http://hk.apple.nextmedia.com/news/art/20130714/18334025


熱情冷卻僅日售數張

Maia's Box的待用券面值六元，顧客購買以後，可以轉贈有需要人士，或交店方放置在店面，供人索取及換領麵包。推出初期，反應熱烈，有人一口氣買下數十張。但一個月後，熱情冷卻，現時平均每天只售出數張。
店東趙孝津（Alex）跟區議員了解過，認為該店看來比較高檔，露宿者或拾荒者會「唔夠膽入去，覺得呢啲地方唔啱佢哋」。反而Alex發現，索取待用麵包券的人一半沒有經濟困難：「試過有個着住西裝嘅男士入嚟，又試過有人攞住幾十張待用券。」
為防待用券被濫用，店員曾限制使用者每次只准換領一份，但引起其他顧客批評店方欺負弱小。Alex感到心灰意冷，覺得好人難做。「我哋考慮緊停止，以後將賣剩嘅麵包捐畀食物銀行，咁樣可以更有效咁幫到窮人。」
記者採訪Maia's Box當日，碰巧有一名顧客前來買待用券。她得悉老闆打算停止計劃，表示惋惜。陳小姐希望Alex堅持下去：「做每樣嘢都會有困難，開舖頭唔可以淨係為賺錢，畀多少少愛心，幫到多啲人，嗰種滿足感係用錢買唔到。」

---