ZKIZ Archives


趁你病,攞你命 老狐狸

來源: http://hkcitizensmedia.com/2015/01/05/%E8%B6%81%E4%BD%A0%E7%97%85%EF%BC%8C%E6%94%9E%E4%BD%A0%E5%91%BD/

老狐貍在休假十多天後終於要重回工作崗位,但一開個OUTLOOK 當堂被D Email 嚇了一跳,基本上要用上一整天至睇得曬,其實每次小弟最怕的就係老細話你行開咁耐都無野發生,以後都係唔駛你番呢句,好彩暫時仲頂得住。

小弟在聖誕期間除了到廣州幾天跟朋友飲飲食食外,就係在家日日瞓到自然醒,但駛錢速度並未因此停下來,幸好手持的股票都升番d,頂得住。每次小弟去任何地方雖然話就話吃喝玩樂,但都會留意下當地經濟,同埋當地d「土著」傾下計,睇下有無咩投資機會。

係今次旅程中,我多次經過廣州市天河體育中心附近,見到一座外貌似北京央視,又似我地個「門常開」的大樓,問一問身旁的老廣州,原來呢座係佳兆業廣場,令老狐貍想起近期「被停牌」的佳兆業會否就此一命嗚呼?

老狐貍:「作為廣東五虎之一既佳兆業,近期被深圳市政府禁售其下深圳樓盤,仲俾匯豐追數,你覺得會唔會玩完?」

友人(抽一抽其下跌中的褲頭)答:「摺就唔會摺,佢D樓今日唔俾賣,唔會以後都唔俾賣,佢搞掂番D大哥就得啦,不過如果我要買就買富力吧。」

老狐貍聽到呢句後,有兩個想法湧上腦袋:

1. 呢條友仔靠賣樓發達,打滾咁多年對國內樓市既分析都應該OK既,但點解d國內人成日都叫我買富力既?(我另一個在北京工作的朋友都係咁講)

2. 雖然佳兆業已經停牌,但爛船都有三斤釘,反正佢宜家被人追數,如果復牌再隊一隊,只要佢唔死得,會唔會又係機會呢?

佳兆業事件簿:

1. 十二月初,市場傳出佳兆業位於龍崗和大鵬新區的多個樓盤被封鎖,更一度傳出集團創辦人郭英成「失聯」,外界普遍認為和10月份涉嚴重違紀的深圳市委常委蔣尊玉牽連。

2. 其後郭英成向生命人壽出售11.21%舊股,套現16.68億元人民幣,反映生命人壽是次入股價高達$2.89元,即溢價10.19%入股。出售後郭氏家族持有49.25%股權,生命人壽持股29.94%,稍低於30% GO綫。

3. 一周後再辭任主席及執行董事。上月初公佈將調任非執董的郭英智亦於去年12月31日宣告辭掉,加上另一名獨董霍羲禹同日亦「跳船」,整個董事局幾乎已由第二大股東生命人壽接管。

4. 由於郭氏辭職,匯豐按規定向佳兆業提前追討一筆5,200萬美元的貸款。

5. 就公司被停牌,佳兆業集團的離岸債券價格週五大幅下跌,債券收益率被推升至50%以上,反映市場認為其債券的違約風險甚高。

6. 佳兆業集團為籌資金,把其於去年8月以11.55億元人仔購入的上海土地權益售予萬科,作價12億元人仔。

7. 截至2014年6月底止: (如果數字屬實而公司仍可正常運作下)
- 總資產: 1056.4億人民幣
- 現金及銀行存款賬面值: 93.8億元人民幣
- 資產總額減流動負債: 537億元人民幣
- 股東資金: 182.84億人民幣
- 現市值:(已停牌) 81.6億元港幣

1417513538_2f25

總結:

老狐貍同意呢間公司應該唔會倒閉,但醫都有排醫,請註意其家族在香港仲有另一門經營證券的大生意(名稱大家可以上網查),故其底子都好厚下,所以都同意友人所講爛船有三斤釘,小弟就用3斤釘的角度去秤一秤佢,如果d數係屬實,現價都幾吸引。

當然,大家都會趁佢病,攞佢命啦,如果佢有機會復牌,我都覺得會跌一跌既,至於跌幾多老狐貍都唔敢估,但以個d價買到,你已經比佢第二大股東的「入股價」低好多了,唔好忘記呢間公司d樓只係「唔賣得住」,就算被斬倉,都要係市場搵人接貨,第一間出黎執平野的萬科已先「幫」左佢12億人民幣啦,而佳兆業仲有好多商業物業架,會唔會仲有d大孖沙呢?

近期內房股股價開始上番黎,國內亦多次傳出降息降準,對樓市有刺激作用,而且d股票升番咁多,財富效應下d樓價都可以好番d既,當然,大家要睇下佢停牌公佈d乜啦。

老狐貍估計,佢最終俾間內房龍頭或央企併購的機會不低,近期的綠城已是一例,

小弟睇完公告後或者係佢復牌之際都會睇下價做下收買佬,當然係要小註啦。

如大家有興趣,歡迎大家加老狐貍的FANPAGE交流下啦

https://www.facebook.com/oldfoxfanclub

老狐貍

PermaLink: https://articles.zkiz.com/?id=126154

Next Page

ZKIZ Archives @ 2019