三英戰呂布？
1 :
GS(14)@2016-08-08 00:18:17兩位JT有意欲競選特首，如果有一人一票普選特首嘅話，呢兩位先生嘅民望都高於CY，尤其是美國JT嘅民望超過60，比CY高好多，理論上在真選舉中，CY冇可能贏。唔好話民意調查唔科學，兩三人競選場合，如果三人叮噹馬頭，某人頂多領先五個百分點嘅話，最後輸咗，唔算爆冷，因為在數學統計誤差之內，但如果某人民望超出其他多過十個百分點，就多數會順利勝出嘅，故此如果有特首普選，美國JT贏硬CY。不過2017年特首選舉仍然係選委小圈子選舉，內裏大把北京可以指揮嘅選委，故此JT們即使入到閘，如無中央力挺，當選機率都幾低，故此深梁粉絲此一刻夠膽開出兩人當選賠率係99倍，之後嘅賠率就唔敢講，遲啲英國博彩公司（外來勢力）可能為CY、JT1號、JT2號、CL、YL開出賠率都唔定，走地盤隨時有變，不排除在開閘之前，有馬着啡燈！照各人言論睇，老JT（70歲）大概唔會真係入閘，只係首先發話，刺激其他「合適人選」表態而已，美國JT（MIT及哈佛校友，競選美國總統都有資格）已經表咗態，民建聯啲立法會候選人又即刻有咗模範答案──挺曾主席，避免咗支唔支持梁振英嘅尷尬問題。曾主席可謂達到一箭雙鵰嘅目的，唔怪得人人都話老JT（曾鈺成吖嘛）係有計之人。一位睇相師傅對左丁山講過，曾鈺成個相貌、談吐及過往表現，橫睇掂睇都係古老師爺款，粵語殘片嘅師爺專家周吉都冇佢咁似樣。以現代術語講，曾鈺成係最佳幕僚長（Chief of Staff），佢嘅最佳位置係做「曾俊華特首嘅行政會議首席召集人」，曾師爺係根正苗紅老愛國，北京唔會懷疑佢，就如過往委任曾蔭權為特首，就派梁振英做行政會議首席一樣。反而曾師爺缺乏統領公務人員經驗，做政務司司長就未必掂！如果CY順利連任，兩位JT都會從政壇消失嘅嘞，雙曾應有心理準備，事實上，美國曾做咗十年司長，夠晒皮，退隱亦無妨。至於愛國曾，睇得出佢細佬被離職後，態度大變，好似拚死無大害咁，年來對CY單單打打，從隱喻到開口牌，愈來愈唔客氣，即使西環不悅，亦一於不理，有必死一戰嘅決心，一於ABC。信報自8月1日改版，送走練乙錚，迎來曾德成，明年特首戰，信報必定捧姓曾嘅，你信唔信？林鄭假如真係有心出馬嘅話，應加快進度，失了先機，便難搵傳媒陣營撐場咯！
來源:
http://hk.apple.nextmedia.com/su ... t/20160807/19725722