| ||||||
四叔李兆基添乖孫好歡喜,香江首富李嘉誠亦不讓其專美,長子Victor李澤鉅噚日獲加拿大西安大略省大學,頒授榮譽法學博士學位。據講今次係Victor首個博士學位。 首次做博士只得保鑣傍住 「第 一次」的確係好寶貴,咁啱遇着狂風兼黃雨,更加令人難忘。唔知係咪貴人出門招風雨,又或者超人忙於公務,搵商機抗通脹,抑或怕搶咗個仔風頭,所以並冇現身 力挺乖仔;更奇怪嘅係,超人媳婦、小超人老婆王儷橋依舊低調,冇帶仔女一齊嚟同老公分享喜悅,只見兩名長實(001)公關同兩名保鑣傍住,場面好似爭咁 啲。不過Victor都喺台上坐足全程,差唔多個幾兩粒鐘,睇埋學位頒授典禮先至鬆人。咁難得着住件博士袍,Victor臨走前拉埋兩位企足全程嘅保鑣、 長實公關大員,同埋一位拖篋叔叔一齊合照留念,仲笑到見牙唔見眼。之但係,Victor可能趕時間返屋企同家人共敍天倫、同爸爸加餸慶祝,冇接受傳媒訪 問,不帶走一片雲彩就走咗。其實Victor喺美國史丹福大學攞到土木工程學士同埋結構工程碩士學位,今次獲加拿大嘅大學頒授榮譽博士學位,可能係佢同加 拿大有一定淵源,皆因長和系公司,尤其係Victor做主席嘅長江基建(1038),一直有投資加拿大。李華華 [email protected] |
| ||||||
霸王集團(1338)旗下洗頭水嘅致癌疑雲搞咗成兩個星期,最後要出動埋國家食品藥品監管局,嚟力撐產品唔會影響健康,之不過投資者似乎唔係太領情。上星期好多長線基金好似富達、未來資產咁,都排住隊沽霸王,所以霸王股價雖然已經累計跌咗兩成,但大家依然唔太敢撈底。 不過,凡事都有例外,除咗霸王老闆陳啟源身先士卒增持股份之外,霸王大名鼎鼎嘅代言人成龍……個仔房祖名,原來都有趁霸王股價暴瀉時,低吸霸王股份! 房祖名日前喺內地一個公開場合話,覺得霸王呢單嘢係因為有名人代言,引起大家關注,先至特別容易受到攻擊,所以佢喺霸王股票狂跌時就掃咗好多貨。 咁o依家批貨賺定蝕呢?祖名就好坦白咁承認做咗大閘蟹喇,不過佢堅稱睇好霸王長線行情,仲話股價一反彈,佢就會變有錢人o忝!投資銀行德銀似乎都同祖名一樣,覺得係時候博反彈,總共用咗成3億銀掃貨。 雖然祖名力撐老竇代言產品冇問題,但有內地網友就好有心機,總結咗成龍咁多年來代言產品嘅表現,例如小霸王遊戲機,公司最後倒閉;愛多VCD,老闆坐監;汾湟可樂,成個品牌銷聲匿迹;開迪汽車,全國賣900幾部……所以喺網上成龍又多咗個新綽號:「廣告殺手」! 李華華 | ||||||
| ||||||
珠光寶氣大團圓結局!唔係講無記套劇,而係講謝瑞麟(417)兩父子恩怨錄!謝瑞麟噚日透過謝瑞麟珠寶出通告,話唔再告佢個仔仔謝達峰,兼唔附帶何條件咁話。雖然未知係咪真係父子情仇一朝了,但肯定謝家上下,包括做夾心人多年嘅新抱,謝瑞麟珠寶主席謝邱安儀最開心。 珠 寶大亨謝瑞麟兩父子嘅恩怨,講起真係幾峯迴路轉!早年阿仔爆老竇大鑊,話老頭子2008年非法提供回佣畀旅行社同虧空公款,最後搞到自己同阿爸同埋個高層 齊齊鋃鐺入獄,而老謝舊年底出冊後,又走去告坐緊監嘅阿仔,話佢趁自己破產嗰陣,侵吞抵押畀瑞士銀行嘅謝瑞麟珠寶股權……總之兩仔爺實行有你無我。 豪門恩怨反高潮 查 實豪門恩怨近呢幾年華華見唔少,新地(016)兄弟鬩牆、華懋千億爭產、新鮮熱辣仲有單南豐媽媽告南豐囡囡,老謝父子呢單,華華其實都係擔定凳仔等睇戲 咋,點知有和解呢個反高潮,證明塵世間冇嘢係拆唔掂嘅。總之,冇父子係冇隔夜仇嘅,始終血濃於水,家和萬事興,家衰「告」不停,希望老謝父子從此拍檔,將 盤生意做好,回饋吓班小股東啦! 李華華 |
| ||||||
「老竇豬」陳振 聰同「女朋友」「豬豬」龔如心屋企人爭產單官司,呢幾日審緊,作為男主角,理應好唔得閒,但係原來佢仲有時間打理自己檔宏霸數碼(802),而且近排仲動 作多多,上星期呢頭宣佈配股集資,又賣埋資訊科技產品銷售業務,噚日就話入股美國採礦公司做咗「採礦豬」,似乎有啲不務正業噃。 據宏霸通告 講,集團向投資公司Avalon買入喺美國場外交易議價板上市嘅Spartan Gold(SPAG)6.1%股份,呢間SPAG主要喺美國從事採礦及勘探業務,同做開射頻識別(RFID)產品嘅宏霸九唔搭八,但宏霸就撐話,可以為 SPAG提供RFID技術,應用喺採礦方面,總之有協同效應啦! 持股跌至17%疑似散水前奏 咁買個礦又要使幾銀呢?呢次入股總代價5070萬蚊,雖然宏霸上星期先至集咗資,但係今次就用每股3.25蚊發行1560萬股宏霸新股支付收購,咁即係間接引入Avalon做股東,佔擴大後股本4.82%。 話時話,宏霸舊年下半年配過兩次股,加埋上星期嗰次同埋今次發新股收購,單一大股東華懋集團所持龔如心遺產股權,會由舊年年中嘅23%攤薄到20.3%,陳振聰就由22.25%降到落17.38%……咁多嘢搞,唔通係散水嘅前奏? |