【馮仁昭四圍超】細龜孖如花幫ViuTV派錢
1 :
GS(14)@2017-05-18 02:08:19■如花李健仁（右）拉攏細龜黃一山為ViuTV主持派錢節目《街頭派錢黨》，如果加埋黃一飛（中）就更熱鬧。
曾經拍過唔少周星馳電影嘅李健仁（如花）、黃一山（細龜）、鄭文輝（甜筒輝）、以及喺電影《少林足球》飾演唏噓豬肉佬嘅楊能，原來喺嚟緊8月會幫ViuTV主持遊戲節目《街頭派錢黨》，佢哋會喺香港大街小巷同市民玩一啲小遊戲，每次挑戰成功，市民就可以獲得現金1,000元，就算失敗都會有一個紀念金幣，預計每次出動會即場派5,000元至10,000萬元不等。
■黃一山（右）經常喺內地同星爺舊拍檔豬肉佬楊能（左），仲有「大軍」程東見面。
「過關畀一千蚊」
離開香港電視圈10幾年嘅細龜，將再次回歸，噚日問佢點解返嚟做電視？佢透過微信話：「因為佢肯畀錢，我哋要賺錢吖嘛。另一方面話個節目可以自由發揮，冇乜稿，我最鍾意冇乜稿，唔使記咁多台詞，又可以派錢畀啲觀眾，要考吓佢哋（觀眾）嘅，咁過到關就畀一千蚊，相信觀眾會好開心，我哋又可以帶歡樂畀觀眾。」細龜話好多時返香港，啲市民都話好耐冇見佢，所以返嚟見吓觀眾。細龜仲講笑：「第一證明自己仲未死，第二證明自己仲拍得嘢，畢竟我喺香港長大，希望可以重溫番當年開心嘅嘢。今次係如花牽頭，所以亦都要多謝如花，可以聚集埋我哋一齊，拍番個電視節目畀香港觀眾睇。」撰文：馮仁昭
來源:
http://hk.apple.nextmedia.com/entertainment/art/20170516/20022316