ZKIZ Archives


東亞銀行嫌依家嘅業績未夠牙煙? 中環客

來源: http://hkcitizensmedia.com/2016/08/19/%e6%9d%b1%e4%ba%9e%e9%8a%80%e8%a1%8c%e5%ab%8c%e4%be%9d%e5%ae%b6%e5%98%85%e6%a5%ad%e7%b8%be%e6%9c%aa%e5%a4%a0%e7%89%99%e7%85%99%ef%bc%9f/

醜婦終須見家翁,東亞銀行喺8月19日交易時段公布成績表,業績倒退三成七,東亞中國嘅壞帳比率升到2.8%。

雖然東亞中國聲稱近期批嘅貸款因為改咗風險模式,穩健咗好多,仲聲稱有九成四貸款有抵押品跟。只不過,中環客對近一兩年批嘅貸款質素好懷疑,中國越嚟越多廠執笠走佬,地產又做唔起,中環客好懷疑果批抵押品嘅價值,而近一兩年批出嘅貸款係唔係更穩陣,東亞中國要提供更多資料,否則好難信佢囉。

但最嚇親中環人係,東亞銀行夠薑話要同微眾銀行合作,加快發展流動平臺,進一步拓展金融市場同個人金融業務。以上呢堆業務係乜嚟?微眾銀行之前都講過,肯定係個人消費市場業務,實係無抵押貸款多。個人金融業務,更加唔駛講,唔通你覺得班土豪會存錢喺東亞中國?係都落嚟香港存喺東亞銀行香港喇,甚至搵外資銀行算喇。金融市場業務,係咪提供更多孖展俾散戶炒股?東亞中國同東亞銀行本身都唔係強於投資銀行業務,唔通你覺得佢地會大搞IPO咩?

換言之,東亞銀行管理層似乎嫌東亞銀行業務未夠牙煙,一於富貴險中求,向更牙煙嘅業務進發,依家美國聯儲局加息如箭在弦,一旦美國加息搞出乜出嚟,中環客都唔敢估,東亞銀行班大孖沙勇成咁,作為東亞銀行投資者就真係祝你好運嘞。

所以公布完業績後,東亞銀行股價即跌百分之二以上,好正常,俾著中環客都三十六著,走為上著,投資喺啲咁勇嘅銀行管理層身上,不如留定彈藥,得閒賭嚇英超,甚至留番下個月賭嚇馬仔,都分分鐘賺得多之餘無咁大風險。

 

相片來源:www.seniorliving.org

PermaLink: https://articles.zkiz.com/?id=211318

Next Page

ZKIZ Archives @ 2019