急減腩肉 57歲吳岱融 踢波狂操
1 :
GS(14)@2016-10-05 05:31:222016-09-21 EW
因為大奸角「高天鷲」，令吳岱融成為《巨輪II》的亮點，事實上，他自去年回歸參演《刀下留人》後，便劇接劇未停過手，但畢竟已年屆五十七歲，又曾經發福至一百八十磅，要長拍長有，惟有努力keep fit。
日前，他便與明星足球隊成員到馬鞍山足球場操波，雖然跑足全場狂追波，但球衣濕透之際，豐厚的腩肉仍隱約可見，要保持型佬樣貌與身形，明顯還有進步空間。
落場爆腩
去年回歸無綫拍劇的吳岱融，雖然已由當年靚仔小生，變成五十七歲銀髮蒼蒼的熟男，但熱愛足球的他，日前仍與一眾明星足球隊成員到馬鞍山足球場操波。負責踢中場位置的他，當日與前鋒黃日華，跟梁漢文和劉浩龍等人對疊，每逢看見對家球員帶波到不遠處，即跑上前搶波，相當落力。
踢至中段時間，雨勢忽然變大，然而吳岱融卻跟大夥兒愈踢愈起勁，衣衫盡濕，令發福的腩肉現形。球賽最終在雙方沒有入波下完場，興致勃勃的他即走到黃日華身旁，談論賽事，又拿着水壺跟對方「碰杯」，似乎十分滿意剛才表現。
斷食收身
其實，在《巨輪II》中飾演大奸角「高天鷲」的吳岱融，九十年代中離開香港幕前後，體重曾試過一百八十磅。「嗰陣我喺星馬搞製作公司，成日要同老闆應酬，又冇做運動，搞吓搞吓，我連行兩級樓梯都氣喘，就開始踢波當做運動。 家每個禮拜都有四場波踢：明星隊、視藝隊、晨㬢，仲有一班我喺大陸住嗰陣踢開嘅波友，另外又會游水、踩單車，流吓汗，真係爭好遠！」
踢波後，他的體重已長期維持在一百六十磅以下，但為了在幕前演出時，能減低福氣十足的肚皮搶鏡程度，踢波以外，他更會進行辟穀斷食來收身。「我試過成個禮拜淨係食生果，唔食其他嘢，又或者七日都唔食任何嘢，淨係飲水，一次可以輕到廿幾磅！對我嚟講，辟穀除咗可以收身減磅，仲可以清理埋身體裏面啲毒素，我覺得好健康。」
心中有火
相比當日同樣是八十年代小生，又年過五十的隊友，關禮傑的鋼條身形比黃日華還要fit。主力前鋒的他，由落場開始，幾乎未見有笑容，視線和身體全程投入在足球上，即使要跟比自己年輕九歲的對家梁漢文搶波，仍見他猶如足球小將上身般，只顧衝呀衝。
操波時表現勇猛，就連完場後，關禮傑仍坐在球場旁邊，繼續做體能練習，提起雙腿狂操腹部運動，其後又張開雙腿成大字馬拉筋，看來十分注重自己的體形。
五十四歲的他，樣貌如吃了防腐劑，身形比年輕時顯得更結實，除了靠踢波keep住，平日閒時亦會經常到健身室做gym，且甚注重飲食，戒吃澱粉質。「我喺呢個圈仲有團火，仲想有代表作，就係呢團火推動我去keep fit同保持健康。」心中有火，做人確係積極啲。
撰文、採訪☆娛樂組 攝影☆何國豪 設計☆李浩然