| ||||||
走水貨，睇落好搵，無奈入貨成本、人力物力，甚至責貨風險極高。但只要動一動腦筋，把傳統的水貨模式轉變一下，慳水慳力一樣可以搵銀。二十七歲的朱威霖（William），今年初投資四十多萬，研發水貨平台app「Buy for Me」，買家可隨時隨地，與身處在地球另一方的賣家聯繫，託他們買入心頭好。只要雙方交易成功，William幾乎什麼都不用做，就能收取百分之五佣金。這個app上架三個月，累積三千多個會員，每月營業額有六萬元。扣除成本，雖與收支平衡還有距離，但William深信：「只要愈來愈多人用，一年後就可以回本！」記者找來不同界別組成的評判團指，香港什麼都有得賣，擔心程式難有普及性，建議William要盡快打入內地市場。 應用程式「Buy for Me」的圖案，由兩個對話泡泡組成，泡泡上有隻飛機，William指，這是象徵世界各地的人，都能在咫尺間溝通。一身西裝筆挺，外表木訥的他謂自己在美國讀書時，就因為「走水貨」而賺了不少「外快」，他憶述：「我同班朋友一齊排隊購買絕版波鞋，再放上eBay拍賣，暑假時又帶返香港賣，每對賺成五百蚊！」這令他意識到走水貨大有可為。不過，六年前畢業回港，應父親要求幫手打理屋企的木薯出口生意，根本沒有時間創業。常要往不同地方出差的他，亦有應朋友要求往outlet掃平貨，他發現：「喺香港叫做中高檔次的品牌，如Givenchy、Burberry等，喺外國買唔算太貴。我試過幫人買Crabtree & Evelyn潤手膏，一英鎊一支咋（約十二港元）！」他興奮地說。去年William終於想到不如搞個app，「唔使我請買手同入貨，係完全C to C，即Customer to Customer，你可以係賣方，亦都可以係買方，我只係中間人。」他借用屋企的辦公室做大本營，節省租金成本，最大的投資是花廿多萬元請人寫程式，另每月約花五萬元聘請三名IT職員做管理。而他知道，這盤生意最大問題，是要找到第一批用家。為此，他定出三個步驟： 第一步：自設貨物刺激用家 「因為免費下載，唔擔心無人download，但就無人願意做第一個買貨或售貨的人。無人行第一步，我就自己行。」William說。於是，他透過朋友主動邀請多個經常往返歐洲、美國的空姐率先加入做賣家，出售貨物。長期往返倫敦和香港的空姐Tina指，她常由倫敦買入如Marc Jacobs袋、Kiehl's或其他牌子的護膚品，「我一星期飛一、兩次左右，帶返嚟都擺上去賣，好小量，唔會好辛苦，就算賣唔出都可以自己用。」這個app的好處是，定價全由賣家話事，而Tina就把貨品買入價調高百分之五出售。William亦與Octoget、Susweet、Meso Beauty等團購公司合作；亦與不少品牌如Montblanc、CK合作，請對方以同樣價錢放在其平台出售。貨品成功出售，William才收取百分之五佣金。有了這班固定的賣家撐場，app上架三個月，已吸引了另外三十名活躍賣家常常出售貨物。William指，賣、買家最初都比較保守，出售的多是護膚品、手袋等，「但近來已開始出現一些品種較特別的貨物，如來自荷蘭的梵高畫作、餐巾。哈哈，不過仍然未有人買。」他憶述，試過有買家要求一種來自印度、有人臉印在酒樽上的酒，竟然有一個剛巧去印度旅行的賣家替他找到，「其實賣家搵唔到一模一樣嘅酒，只係差不多款，但買家都願意接受。」事實上，亦有人「搏大霧」放一些二手及普通貨色上app，「我哋有人不斷睇住，發現件貨有問題，會要求賣家移走。」William未來會把app優化，要求賣家的貨品要有來源地認證。 第二步：力谷宣傳搶佔市場 下一步，就是要力谷知名度，「必須要在其他類同的應用程式出現前，先佔據市場，要令人哋諗起外遊代購，就諗起『Buy for Me』，所以最緊要打響名堂。」早在開幕當日，他們搞了一場大型開幕典禮，並請來藝人連詩雅做嘉賓，當日有空姐朋友做模特兒，教人安裝及使用程式，更有十件最抵產品搶賣。William說又設立了一些不定期促銷活動，如Blue Monday，即限時售出名牌貨品，如一個Montblanc的錢包，只售港幣九十九元。用銀彈政策，果然有效，迅即被搶購。每次推出限購優惠，download app的下載又多百多個。除了買賣外，app中亦有一項叫Discover的項目，William打算找人撰寫一些外地購物的資訊及貼士，「好似《來自星星的你》中千頌伊嘅唇膏喺邊度買呢？」他與廣告公司的朋友參照當年澳洲最筍工概念，構思了「香港最筍工」，他們將公開招聘一名員工，負責環遊世界一年，到不同地點發掘購物資訊，亦可順手採購一些平價貨品，而旅遊的費用則全數由公司支付，活動與電台合作，將在下月公開招聘。 第三步：尋同路人出錢出力 這個app上架三個月，已累積三千多個會員，每月營業額有六萬元。但William知道搞app與一般生意不同，「回本期較慢，我預計至少要燒錢一年先回本。」除了自己投放近五十萬外，亦着手找投資者。由於「Buy for Me」以女性化妝品及皮袋等奢侈品居多，William找到同樣喜歡購物的老友Celine。「大家在香港青年聯會認識，Celine鍾意網上shopping，佢都係幫屋企做生意，大家想法差不多，游說咗幾次，佢就願意加入成為股東。」Celine再為「Buy for Me」注資三十萬，可再加大宣傳力度，她說：「呢次係第一次投資app，咁香港一直都無一個託外國人買貨而設的app，如果宣傳得宜，我認為有潛力o架。」 貨品選擇少 為了令買家安心，買家列出想要的貨後，並定出最高接受價，等候有賣家認頭後，才透過PayPal付款。在買家收到貨前，金錢會被扣留在PayPal賬戶，不會過戶；直到交易成功，買家滿意貨品質素後，賣方才能成功收款，而William才從買家出價金額當中扣除百分之五的手續費。而買賣雙方可自行約定地點交收，或放在「Buy for Me」位於尖沙咀的辦公室交收，如出現產品款式等的紛爭，公司亦會初步協助調解，「我哋有律師，會擔當顧問，如果件貨真係唔滿意，我哋可以調停，或者叫賣家賣平啲。如果真係唔得，雙方就要循民事途徑自己解決。」William指，由於至今買賣的多是小型奢侈品，三個月來未出現過類似紛爭。但按記者觀察，現時「Buy for Me」最大的問題是，出售的貨品種類十分少，多是名牌袋、化妝品。William被問到有什麼特別貨品的時候，都顯得有點尷尬，「我哋都努力緊令貨源更廣同多元化。」看來「Buy for Me」要跳出女性市場的局限，仍要多下功夫。 app用法 評判團 Koziness創辦人Gary（透過網頁及應用程式，為顧客提供食物速遞，月賺逾十萬）喺香港好多嘢有得賣，好難成日有託人買嘢的需求。唔可以話無生存空間，而家係無乜競爭，但business model做唔大。而且貨物傾向個人化，個人化就會易出錯，好多歐美衫褲鞋襪都不是為亞洲人而設，size和款式都好易錯。如果係呢類平台，係咪內地市場仲有得做？內地透明度低，但消費力強，比起香港更有潛力。 GoGo Van創辦人Steven（手機應用程式提供客貨車Call車服務）聽過不少身邊朋友要託人到外國買嘢，但點樣令到好多有呢個需求的人，由託朋友，變做用佢個app？佢要搵到自己班客，要好大力度去push，有幾common，就決定呢個生意的成敗。而且個平台最好乜嘢hot items都有得賣，愈多愈好，有wild effect，先會引嚟更多人用。 時昌迷你倉創辦人時景恒（全港逾百個迷你倉地點）手機平台，能夠移動係呢個app最大優點，但scale唔夠大，如果要慢慢儲客，呢個時間人哋一個唔該抄咗你就煩。老闆可以考慮盡快與一些大平台合作，如淘寶及阿里巴巴，人哋放喺你個app的東西，喺其他平台都會見到，借用人哋咁大個平台。個客量愈多，個佣金先可以愈來愈平，保持競爭力。 William回應 我都知道擴大規模係現階段最需要做嘅嘢，我哋都同We Chat或淘寶一些做代購嘅賣家傾緊，希望可以叫佢哋加入我哋個app。 | ||||||