心有所屬 馬國明禁阿佘埋身放電
1 :
GS(14)@2016-06-12 03:03:112016-05-25 EW
去年因續約問題被無綫雪藏並只拍一劇的馬國明，有傳已傾掂數加簽五年，即時解凍並獲安排於重頭劇《賭城群英會》及《愛情來的時候2》擔正做男主角，與視后佘詩曼（阿佘）飾演情侶。
連月與阿佘留在深圳為《賭》劇開工，雖然二人至今已第三度飾演情侶，縱使朝夕相對也不過電，因馬國明心繫阿妹唐詩詠，就連網民也激讚他們相襯。為在阿妹面前加分，他鏡頭後跟阿佘保持距離，避免惹「佘」纏身！
點到即止
日前馬國明跟阿佘到深圳觀瀾湖新城拍攝一場拍拖戲，演技精湛的視后阿佘一埋位即七情上面，他亦配合地從後攬實阿佘腰肢大晒煙韌，鏡頭前狀甚甜蜜，有講有笑，不過一停機，他便自動彈開。而鏡頭後除對對白外，二人閒聊不多，他寧願玩手機自娛，免傳緋聞。其實心有所屬的他，對阿妹唐詩詠一條心，女方一日未結婚，依然有得爭，故他落力守行為，開工期間對身邊女拍檔皆視而不見。
另一日，劇組到深圳龍崗區的小村開工，對手換上全男班的楊明、何浩文、黃浩然等，馬國明態度明顯放輕得多，不但跟他們雞啄唔斷，還不時互攬影相，十分搞鬼。當日有粉絲要求簽名，一向順得人的他無托手踭，相當合作。
劃清界線
對男女拍檔兩個樣，馬國明跟唐詩詠主持的《有乜好過去Camping》上月出街後，被網民大讚他倆是絕配，二人既有兄妹和緋聞之情，錯綜複雜，搞到洪永城也酸溜溜說︰「我同詩詠都好襯㗎！」即使阿妹已跟洪永城拍拖，他仍不時叮嚀女方「睇定啲」，更成功令唐詩詠打消跟洪永城同居的念頭。
至於跟惹火的阿佘合作，馬國明一早表明只視對方為女神，「可以同阿佘合作喎，梗係開心啦，我係好欣賞佢演技，仲係我心目中女神！」即使《賭》劇是二人第三度合作，也未有擦出愛火花。據知情者透露馬國明要做絕緣體，「之前佢被公司雪咗一排，跟住又想阿妹對佢增加好感，咪好落力保護形象，所以同女演員冇乜交流，相反同男演員就玩得癲好多。」馬國明用心良苦，未知唐詩詠收到未？
撰文、採訪☆娛樂組 攝影☆娛樂攝影組 設計☆黎志堅