我Q你答問會：Sammi日日見豬髀 想翻唱安仔《爛泥》
1 :
GS(14)@2015-06-10 08:39:56■鄭秀文指keep fit靠恒心同自律。攝影：郭賢興
為慶祝《蘋果日報》創刊20周年，將連續一星期刊登《我Q你答問會》，首日邀請到榮升人妻的鄭秀文（Sammi）作客！她接受記者於銅鑼灣找來的13名市民的提問，鬼馬的她暗笑屋企已有兩條豬髀，所以自己鍾意食牛脷多些。採訪：皓騫、魏嘉琳
■Sammi透露去太平館，除了食牛脷，還愛梳乎厘，明言會再去，未知安仔會否同行。
■Sammi愛短髮，但長髮可以有更多形象上的變化。
1.林小姐：你點解keep得咁fit，可以share餐單嗎？
Sammi：要就得㗎啦，keep fit首要條件係你要夠想fit，咁你就會搵到方法去做，我嘅方法其實好簡單，食要自律，做運動要自律，好似每日set半個鐘做運動，風雨不改完成，事業、愛情、幸福都唔係公式，但減肥真係純粹公式，用多過食一定會瘦，一個字恒心。
2.馬先生：假如你唔係artist，仲會唔會keep fit？
Sammi：其實我唔係因為做artist keep fit，最初嘅原動力真係純為減肥，而家唔係好多減肥需要，但我鍾意自己健康同體能好，因為工作需要大量體能；如果唔係做呢行都會㗎，去到而家40幾歲更加會做運動，因為呢個係唯一可以令自己身體好嘅方式。
3.金小姐：仲多唔多去太平館食嘢？有乜其他特別推介？
Sammi：最近要keep fit冇去太平館食嘢，但去親就好鬼鍾意佢嘅牛脷，因為整得好腍，除咗牛脷仲有好多嘢好食，好似焗到頭咁大嘅梳乎厘，每次捧埋嚟都好開心，食極都唔完，遲啲會再去，因為老闆好好人，會畀折頭我食嘢。
4.王先生：你會考慮同邊個開crossover演唱會？
Sammi：其實過去一年有諗過一啲人選，上年做Touch Mi演唱會時衍生過呢種諗法，但好似有啲人選但唔係好啱，諗到再話你聽，不過絕對有可能做。
5.盧小姐：你通常禮拜六定禮拜日去教會？安仔有冇陪你？
Sammi：我係星期日嘅，不過有啲教會星期六嘅6點幾都有，最近一次返教會就係星期六，仲聽埋一堂好好嘅道㖭。
6.廖小姐：你最重時幾多磅？最輕時幾多磅？
Sammi：最重讀書時候138磅，最輕時候拍緊《高海拔之戀II》，大概95、6磅，每個人上到咁高海拔自然會瘦，當然我會繼續keep fit，我係瘦得比較厲害嗰個，以我差唔多5呎6，嗰時係好瘦，凍到着8層底衫、6條褲都唔覺大隻，就知自己瘦到太離奇，有少少病態瘦。
7.林小姐：你鍾意長頭髮定短頭髮嘅自己？
Sammi：長頭髮嘅自己摟休啲，短頭髮就輕鬆啲，如果論個性絕對覺得自己係短頭髮，但有時做嘢嘅變化就長頭髮多啲嘢玩，見我而家摟摟休休，就知道我留緊長頭髮啦，其實我內心好鍾意短頭髮，唔知點解留長頭髮。
8.鄧先生：平時跑步跑開邊一頭？好想捕獲你！
Sammi：啊！平時我就跑開……長洲啦、離島啦，哈哈哈！油麻地啦、深水埗啦，你咪得閒去撞吓我囉，你好彩嘅話，睇你信唔信啦，嘻嘻嘻！
9.廖先生：你鍾意食牛脷定豬髀呀？
Sammi：我鍾意食你呀，問埋啲咁嘢，嚴格嚟講我鍾意牛脷多啲，因為豬髀肥得滯冇本事食，同埋成日喺屋企都對住兩條豬髀，哈哈哈。
10.余先生：如果你一定要翻唱許志安嘅歌，你揀邊一首？
Sammi：其實好多隻試唱都幾好聽，《爛泥》囉，女仔唱感覺幾得意。
來源:
http://hk.apple.nextmedia.com/entertainment/art/20150609/19177034
我Q你答問會：人人問Sammi 點分安仔與Alex
1 :
GS(14)@2015-06-10 08:40:17■網友認錯杜德偉（左）是安仔，Sammi笑言：「如果我分唔到就枉為人。」
為慶祝《蘋果日報》創刊20周年，將連續一星期刊登《我Q你答問會》，首日邀請到榮升人妻的鄭秀文（Sammi）作客！對於曾有網友認錯杜德偉是許志安，Sammi抵死地說：「夜晚返嚟嗰個係邊位，我都分唔出，就真係枉為人囉！」採訪：皓騫、魏嘉琳
11.李小姐：你覺得許志安同杜德偉似唔似樣？
Sammi：嘩！如果我連佢哋都認唔到，就真係枉為人囉，夜晚返嚟嗰個係邊位，我都分唔出就好大件事，所以對我嚟講係冇困難。
12.王小姐：如果你可以隱形，最想做乜？
Sammi：我會潛入人哋屋企，睇吓人哋喺廁所做乜，係咪每個人嘅步驟都一樣，尤其啲大人物，因為我越大越覺得每個人都係平等，無論幾高幾有錢幾靚，入到廁所做嘅都係一樣，可能好雍容嘅女士，去到廁所有鮮為人知嘅一面，棟高隻腳唔知點，好想睇吓人哋呢啲私密狀態，係咪好八卦呢！
13.暨小姐和陳小姐：許志安做過令你最感動嘅事係乜？你做過令許志安最感動嘅事係乜？
Sammi：冇喎，如果你識得欣賞一個人，其實佢做少少嘢都好感動，可能煮杯奶茶或學識整一樣嘢，對方就覺得好開心。
來源:
http://hk.apple.nextmedia.com/entertainment/art/20150609/19177663
我們的20年：陪《蘋果》齊突破Sammi讚安仔易教
1 :
GS(14)@2015-06-18 08:37:08■Sammi接受本報專訪時自爆鍾意洗碗，而且現在已懂得煮好多菜式。 攝影：郭賢興
天后鄭秀文（Sammi）過去20年來登上《蘋果日報》娛樂頭版不計其數，但讀者最開心始終是她與許志安復合嘆豬髀的新聞，更為她帶來牛脷文的新花名。突破從來是《蘋果》的宗旨，近年很少做專訪的Sammi為慶祝《蘋果》20周年，也來一次突破自己框框，試試面對不一樣的問題，拋出不一樣的答案。結果她在BIG FOUR四子中選最佳老公，竟然沒有許志安份！還認為大男人杜琪峯可挑戰同志角色，跟古天樂玩斷背山。撰文：余燕儀
記者：記 鄭秀文：Sammi記：有人出錢搵你做導演，杜琪峯係男主角，你會搵佢做乜角色？
Sammi：我想佢飾演同志，因為杜琪峯喺我認知世界裏面，大男人得好緊要，電影應該完全搣甩佢呢樣嘢，飾演好深情、對愛情好忠貞嘅男同志，最好佢身邊伴侶由古天樂去做，古仔簡直係後生版杜Sir，無論處事、背影，去到片場講嘢方式，咦！點解成個杜Sir咁！所以飾演一對同志伴侶都幾有趣，唔需要加《春光乍洩》親熱戲，呢啲點到即止啦，希望呢部戲帶出對愛嘅一種意味，唔需要太過激情。
■2011年Sammi與安仔復合嘆豬髀的新聞，是讀者最開心見到的，更為她帶來牛脷文的新花名。
■Sammi指BIG FOUR中張衞健最愛家庭，最適合做老公。
重選老公揀健仔
記：BIG FOUR邊個最適合做情人、老公、朋友、囝囝？
Sammi：嘩！好難講喎，真心話又唔講得，講啲假話啦！老公揀Dicky（張衞健），因為佢好鍾意家庭，放工就一支箭飆返屋企，佢唔鍾意玩，有時去卡拉OK都唔願意，佢好愛佢嘅家庭同媽媽，呢樣嘢好難得，相信如果同佢結婚，都會好愛我嘅爸爸同媽媽。情人我覺得Edmond（梁漢文）幾好呀，因為佢好鍾意玩嘛，喺朋友裏面佢好帶到歡樂畀大家，我覺得情人某程度上要有一種funny，好識得搞情趣好幽默，我覺得Edmond幾做到情人，同埋佢body shape好，做情人body shape要講究。朋友會揀康仔（蘇永康），因為康仔人緣好好，雖然講嘢好率直，但感覺完全冇機心，頂到佢率直就冇事，佢個人好善良，好鍾意佢善良呢part。囝囝揀許志安，因為佢個人好簡單，食飽飯就好開心，仔都係整飽佢就搞掂啦，我觀察佢唔係有反叛個性，都幾尊師重道同念舊，個性又比較平衡，唔會活潑好動到不得了，又唔會好靜到不得了，作為一個細路仔會易教。記：最後一餐想食乜，自己煮定出街食？
Sammi：最後一餐即係臨死前，仲煮，出街食啦，同鍾意食嘅人一齊食日本嘢，臨死都要瘦嘛，食啲唔好咁油嘅嘢。係咪同安仔食？全部我愛嘅人，同知道佢錫我嘅人，越多人越好。記：想同20年前嘅自己講乜？
Sammi：一早叫你減肥囉，唔使食到自己138磅出咗事先減肥。記：想同20年後自己講乜？
Sammi：一早叫你唔好減肥啦，20年後咪又係肥到咁，減嚟做乜呢，哈哈哈。
■Sammi認為極大男人的杜琪峯可挑戰同志角色，同古天樂玩斷背。
■拍電影《長恨歌》的經歷，令Sammi體會到快樂及身體健康的重要。
拍《長恨歌》啟發人生
記：覺得自己婚前婚後有乜唔同？
Sammi：而家識煮嘢食好多，因為有咁嘅需要，對方要食惟有自己識煮，因為識煮嘅工人好少，一係你就有錢到請大廚，而且廚房嘢我會爭住做，我特別鍾意洗碗，我哋有分工，燈油火蠟嘅嘢就佢管，好似單據。記：你認為一對夫婦生兒育女係咪好重要？
Sammi：睇吓呢個係咪佢哋人生目標？係咪透過做爸爸媽媽角色畀到自己價值？所以人人唔同，生育係好重要，但我唔係嗰批人。記：睇番以前嘅作品，有冇邊部想轉台？
Sammi：咁樣講會得罪導演喎……冇！部部睇完都百看不厭。記：睇番自己部電影《長恨歌》，而家有乜嘢感覺？
Sammi：好好，都係一個人生歷程，冇《長恨歌》都可能冇而家嘅自己，如果冇嗰段經歷，睇唔到快樂嘅重要性，身體健康嘅重要性。記：揀一首自己嘅歌曲，希望全世界都記得，會揀邊首歌？
Sammi：《上帝早已預備》，因為我覺得呢個係我而家唱歌或者工作嘅使命，就係將我認識上帝一樣咁好嘅嘢同人分享。服裝提供：Flea Madonna絲質上衣
Black Orchid褲、Jimmy Choo靴造型：Tang Lai化妝：Ricky Lau from Aing Makeup School髮型：Joey from Hair Culture
蘋果20年 企硬我敢言
http://20.appledaily.com
來源:
http://hk.apple.nextmedia.com/entertainment/art/20150618/19188007
Sammi巡迴騷唔敢加場
1 :
GS(14)@2015-07-01 09:45:27■鄭秀文見有幾日空檔，即要求昨日開簽名會。
鄭秀文（Sammi）昨日在荃灣為演唱會DVD舉行簽名會，簽名會派了500個籌，現場有近200人圍觀，逼爆商場地下一樓。身穿連身裙、背部透視上陣的Sammi，與現場fans玩遊戲兼答問題，最後即場與fans玩自拍。司儀在台上爆今次簽名會是Sammi主動要求，事後Sammi說：「係呀，我啱啱喺廣州拍完戲，有幾日空檔，所以咪決定舉行簽名會。」
■現場逼爆Sammi的粉絲，難得更可上台見偶像。
怕粉絲撲飛
Sammi坦言有意在香港舉行巡迴尾站，但具體時間暫不透露以免令fans要去撲飛。問會否破紀錄？她笑說：「上次開12場，反應好好，其實都可以開多啲，不過近呢幾年重質素多過場數，希望每場都可以唱到最好，相信咁樣大家會睇得開心。」之後Sammi又說：「其實感覺好矛盾，佢哋用成萬蚊買飛，但另一方面我又好開心，見到佢哋咁錫自己，所以都希望自己喺每一方面都可以做到最好畀大家。」採訪：馬建華
來源:
http://hk.apple.nextmedia.com/entertainment/art/20150701/19203858
Sammi喊住寫減肥書
1 :
GS(14)@2015-11-02 08:22:01■Sammi昨晚換上deep V綠色裙做演唱嘉賓。
鄭秀文（Sammi）、鄭希怡、范姜、周汶錡及何超儀等昨晚現身H& M銅鑼灣旗艦店開幕，Sammi先以一身黑色jumpsuits密實示人，其後換上另一件deep V綠色歌衫在台上獻唱時，險被男舞蹈員撞落台。問Sammi會否幫老公許志安買貼身衣物如T-back，她表示：「仲未爛。」Sammi透露正籌備出減肥書及烹飪書：「減肥書想寫好多年，我出減肥書有說服力，日日唔食嘢冇用，要適量飲食加適量運動，寫嗰時心路歷程似血淚史，邊寫邊流淚。安仔唔會寫序，佢為咗有啖好食，一定會讚，自己拿手煮台式滷肉，紅燒炆牛腩。」
■靚媽周汶錡一身閃爆螢光粉紅裙現身。
同場的范姜承認溫拿有意想解散：「佢哋想陪多啲屋企人，不過我梗唔想，The Rolling Stones都唱到70幾歲，阿B喺溫拿最細，冇話事權。」採訪：馬建華攝影：陳志嵐
來源:
http://hk.apple.nextmedia.com/entertainment/art/20151030/19352807
Sammi戲院度過初戀
1 :
GS(14)@2016-01-22 01:49:41鄭秀文（Sammi）、任賢齊、杜琪峯及林建岳，昨日於中環出席「影院．娛樂全方位爆發新動力」記者會，席上大會宣佈MCL院線將有多項革新，包括在戲院內轉播演唱會及歌劇等。Sammi自爆當年初戀是於戲院內萌芽：「喺碧麗宮，但已經拆咗，嗰陣同男同學偷偷摸摸入去睇戲。」她又爆曾有男同事於戲院內被另一男生非禮摸大髀，如自己遇到類似情況必會出聲逮捕加以嚴懲。
■林建岳獲六嬸方逸華現身撐場。
小齊有份主演的電影《樹大招風》入圍柏林影展，小齊開心謂：「導演話因為套戲題材敏感，好多打劫同黑社會，所以內地上唔到，當然想去柏林影展，希望唔好再撞演唱會期，因為之前幾次有機會去外地影展都撞期。」採訪：譚倩宜攝影：陳順禎
來源:
http://hk.apple.nextmedia.com/entertainment/art/20160121/19459781
安仔請Sammi去旅行
1 :
GS(14)@2016-02-24 07:28:22許志安昨日在W酒店出席樂視體育項目記者會，前晚有份在澳門出席太陽娛樂春茗的安仔，提到老闆洗米華與洗米嫂陳慧玲婚變後，首度公開合體兼同枱合照，問安仔有否見到老闆及老闆娘同坐，安仔說：「好似見唔到喎，呢啲嘢問番老闆喇，我唔識答。佢咁大紅人，紅過晒我哋所有藝人，自己簽自己搞掂。」問到會否覺得老闆生活多姿多采？安仔亦只說：「我唔識答呀，不如你哋問番老闆。」安仔又坦言忘記了前日的元宵節，但稍後會和太太鄭秀文（Sammi）補祝：「我會請Sammi食嘢同去旅行，今次唔會去熱帶地方，改去天氣凍嘅地方。」採訪、攝影：卓寶花
來源:
http://hk.apple.nextmedia.com/entertainment/art/20160224/19502868
Sammi愛碌卡掃家品
1 :
GS(14)@2016-03-16 14:28:11鄭秀文（Sammi）昨日以代言人身份現身麗嘉酒店舉行信用卡記招，並成為首位市民獲得此卡。以往最瘋狂時，每季曾花過百萬添新裝，亦試過忘記換取飛行里數，結果儲了足夠換取一家人機票的里數。講到信用卡，問她有沒有擁有老公許志安附屬卡？她說：「附屬卡唔怕有，女性有經濟能力，有時買自己嘢都用自己張卡，開心時或買家居用品咪用吓附屬卡，作為男性見到另一半用附屬卡都有滿足感。」Sammi又指會接納大家提議，將來以銀碼來決定何時簽附屬卡。提到安仔腳傷，Sammi有為他搽按摩膏兼陪睇醫生，又笑指養傷期間要控制安仔飲食，每日飲兩杯清水便可。採訪：馬建華攝影：沈健程
來源:
http://hk.apple.nextmedia.com/entertainment/art/20160316/19530741
Next Page