ZKIZ Archives


魚樂無窮:翻身不失霸氣股

1 : GS(14)@2016-05-08 01:53:22

生意淡薄不如賣殼,世界華文媒體(685)旗下萬華媒體(426)賣盤事宜,延遲至6月底始有分曉,相信嚟緊個幾月,走勢會悶過TVB膠劇,有揸貨嘅戰友,宜有心理準備,可以分分秒秒睇實嘅,不妨吼位炒上落,務求降低成本。子公司業務形同雞肋嘅,還有載通(062)旗下嘅路訊通(888),公司主打九巴roadshow媒體業務,雖有靠山,但業務表現卻不似預期,最新全年業績轉盈為虧,連股息都唔派,為沙士以來第一次,環境有幾惡劣可想而知。如何翻身而不失霸氣?賣盤似乎係唯一出路。路訊通市值只得六億元,剛好與殼價一致,但當中有三億元係現兜兜「茄殊」,意味實際價值打咗五折,名副其實超值之選。大股東載通揸貨七成,贏在起跑線,仲有一點要注意,雖香港撈唔掂,但多媒體廣告業務,喺內地非常吃香,路訊通如獲相中,爆發力難以想像。近日明顯有資金追捧,話唔定隨時轉身射個三分波,刀仔鋸大樹佳品也!唐牛
http://www.facebook.com/tongcow88本欄逢周二、四刊出





來源: http://hk.apple.nextmedia.com/financeestate/art/20160505/19598191
魚樂 無窮 翻身 不失 霸氣
PermaLink: https://articles.zkiz.com/?id=299821

魚樂無窮:應跌不跌有「景轟」

1 : GS(14)@2016-06-06 03:00:05

經濟學第一課講過,假設需求不變,供應增加,價格自然下跌。甚麼情況下,供應增加但價格依然向上?就係需求增加幅度較供應更勁!新威(058)2月份宣佈「2供3」集資2.1億銀,供股價0.08元,較當時市價折讓逾半。天量新股本周一出籠,股價理應受壓,但離奇的事就在此時發生︰大成交瘋狂炒上,三日合計炒高近兩成,成交創一年新高。應跌不跌,究竟甚麼葫蘆賣甚麼藥?供股結果似乎有啟示︰供股截止時正股較供股價高出一倍,但最後只得19份有效接納,相當於16.6億股或63.4%股權,當中包括原大股東,餘下9.6億股或36.6%股權,則由包銷商金利豐分配予認購人,其中一名認購人持股達19.89%,較原大股東高出4個百分點,變相易手。再睇睇CCASS,金利豐最新持倉由原來14.2%大增至53.6%,可推斷為友好人士持倉,實力強橫之餘,貨源亦進一步歸邊。最重要一點係,雖較供股價高出一倍,但股價依然扶搖直上,回應文首,幕後人士對股份需求極大吧,大執位後市值只得8億銀,絕對係逢低吸納佳品!唐牛
http://www.facebook.com/tongcow88本欄逢周二、四刊出





來源: http://hk.apple.nextmedia.com/financeestate/art/20160602/19637228
魚樂 無窮 應跌 跌不 不跌 跌有 景轟
PermaLink: https://articles.zkiz.com/?id=301874

魚樂無窮:睇NBA學炒股票

1 : GS(14)@2016-06-21 07:37:28

NBA總決賽,騎士戲劇性KO勇士,奪得首個NBA冠軍之餘,更是首支能夠在總決賽落後1比3逆轉勝的球隊,氣勢一時無兩。唐牛對NBA認識不多,騎士只識LBJ,勇士就係浪花兄弟,後者更係我今季追看NBA的主要原因。能夠在三分線外任何位置起手皆中,欣賞嘅除咗係球技,仲有超強嘅藝術成份。還記得對上一次狂追NBA,已經係波神佐敦領軍嘅公牛王朝年代,當年常規賽72勝10負嘅霸氣紀錄,竟然俾勇士喺今季打破,打82場波,只係輸咗9場,得勝率接近九成。唔知有趣定可悲,勇士季後賽只係打咗24場波,竟同樣輸咗9場,得勝率急降至六成,更因此失掉冠軍指環,咁樣臨尾香,傷盡粉絲心。炒股日日炒,密食當三番固然高興,但一個浪湧埋嚟,如果坐貨太多,可以輸到底褲都冇埋。NBA今季唔得,可以下季再打過,炒股呢?輸晒本金還可以慢慢搵番,東山再起,如果欠落一身債,有排還之餘,隨時miss咗幾個大浪,感覺比死更難受。戰友們記住,投資乃長途賽,未到最後都唔知邊個嘴角含春,埋單做騎士定勇士,可能只係一念之差。



唐牛
http://www.fb.com/tongcow88本欄逢周二、四刊出





來源: http://hk.apple.nextmedia.com/financeestate/art/20160621/19662340
魚樂 無窮 NBA 炒股
PermaLink: https://articles.zkiz.com/?id=302335

魚樂無窮:股市的巴基之星

1 : GS(14)@2016-07-06 07:47:38

現今馬壇熱話,非巴基之星莫屬,無他,上周新馬賽一鳴驚人,一開波大漏閘落後十幾個馬位,但入直路展現強勁爆發力,最後奇迹反勝,被喻為一代馬王翠河嘅翻版。如果要搵一隻股票好似巴基之星咁勁,我會揀大快活(052)。大快活以往無論食物、服務、口碑,均不及一哥大家樂(341),加上翠華(1314)異軍突起,故一直活在他倆陰影之下。不過,正所謂知恥近乎勇,近年大快活大打翻身戰,新近推出送餐服務,唔使食客拎住個盤周圍搵位,配合杜汶澤做代言人,成功追回不少失地。食物質素呢?由業績話你知︰最新全年盈利增長四成,毛利率升一個百分點。為慶祝上市25周年,除末期息0.55元,另宣佈派特別息0.45元,連同中期息0.4元,全年共派1.4元,最新股息率接近5厘,完美將大家樂及翠華KO,難怪股價創出23年新高。後市點睇?大快活市盈率19倍,大家樂及翠華平均26倍,大快活足足折讓兩成有多,如果追到平頭,潛在升幅37%,股價講緊見4字頭。有冇可能?自己重溫多次巴基之星點贏,你就會知道答案!唐牛
http://fb.com/tongcow88本欄逢周二、四刊出





來源: http://hk.apple.nextmedia.com/financeestate/art/20160705/19681501
魚樂 無窮 股市 巴基 之星
PermaLink: https://articles.zkiz.com/?id=302526

魚樂無窮:翻兜高息精選股

1 : GS(14)@2016-09-17 16:11:28

第三季精選股嘉利國際(1050),連股息回報最多達48%,其後獲利盤湧現,最新較高位回落逾兩成,從估值及前景睇,皆值得重新入場。再簡單講講嘉利背景,老牌工業股,主打五金塑膠及電子專業代工業務,當中以伺服器外殼最標青,全球四大伺服器供應商,有三個都係嘉利嘅客,自動化運作成熟,生產成本越來越低,另外,餐飲業虧損未見擴大,賺錢指日可待。集團嘅最新動態亦係翻兜關鍵︰公司與主席合作發展鳳崗住宅項目,日前終發出通函,只待下月初股東特別大會通過,即可上馬。該項目總樓面面積約6.1萬平方米,以當地住宅每平米售1.9萬人仔嚟計,項目總值11.6億人仔。但要留意,呢個只係餐前小吃,主菜在於嘉利同時持有該項目毗鄰已補地價住宅地,總樓面面積達11萬平方米,項目總值21億人仔,相當於集團市值兩倍,而補地價僅涉資5,200萬人仔,可謂啖啖肉,與主席合作項目共同發展,1+1威力肯定大過2!無限風光在眼前,現價市盈率卻只得10倍,更有近6厘息打底,有唔買的理由嗎?唐牛
http://www.fb.com/tongcow88本欄逢周二、四刊出




來源: http://hk.apple.nextmedia.com/financeestate/art/20160915/19770921
魚樂 無窮 翻兜 高息 精選
PermaLink: https://articles.zkiz.com/?id=309194

魚樂無窮:吼實世界級批股

1 : GS(14)@2016-09-27 08:01:10

橫洲事件越演越烈,下屆特首暗戰亦正式浮面,以為CY喺記者會全程笑騎騎,臨尾以哽咽作結好利害?鬍鬚曾以世界級表情回應,劇力萬鈞,才是技術性擊倒對手的王者。世界級表情令人回味,股票市場上,批股也有世界級,同樣讓人嘖嘖稱奇。乜意思?即刻批股後股價不但冇散,仲要以洪荒之力抽高,好似中國飛機租賃(1848),放榜後宣佈抽水,股價短短一個月狂升三成,數十億市值照炒,接貨人士實力不容忽視。今日推介愛德新能源(2623),有異曲同工之妙,8月底宣佈批股,每股0.11元,佔擴大後已發行股本2.7%,往後一個月搶高七成。原因一,開車前市值只得7億,最新亦只得11億,容易舞上。原因二,剛宣佈收購山東省風電項目,預計明春可投產,公司表明會借大型央企,進入國家電網的入網規劃許可和清潔新能源業務拓展,相信好消息陸續有來。批股接貨者賬面利潤雖達一倍,但從圖表睇橫行超過一年,幕後人士應儲足子彈,唔似咁快收手,用一成水位作止蝕入場,大茶飯就在眼前!



唐牛
http://www.fb.com/tongcow88本欄逢周二、四刊出




來源: http://hk.apple.nextmedia.com/financeestate/art/20160927/19782766
魚樂 無窮 吼實 世界級 世界 批股
PermaLink: https://articles.zkiz.com/?id=310227

魚樂無窮:畫龍點睛的藝術

1 : GS(14)@2016-10-13 08:07:22

成語畫龍點睛,意指在關鍵位置補上一筆,整件事情即可更傳神。同樣情況可套用在股票市場,先在資本市場操作,再於消息層面上落功夫,多管齊下,炒上動力更有層次,今日推介錦興集團(275),正積極示範呢個玩法。錦興年初時宣佈十合一再一供八,每股作價0.25元,最後僅約一半股權接納,大股東葉家海持股剛好增至29.9%,剛好不須提全購,貨乾程度可想而知。同一時間,好消息亦開始接連出現︰公司7月宣佈,將易名為凱華集團,股東會亦已開綠燈,只待手續完成,沿用多年的名稱也放棄,革新決心不用懷疑。上月中戲肉來了,公司委任華訊方舟副董事長及總經理吳光勝出任執董,呢間喺深圳上市嘅科技股,乃專注高速移動下寬帶通信技術研發及應用嘅國家級高新技術企業,當中包括衞星WiFi技術,重中之重係,華訊方舟董事長呂向陽,乃比亞迪(1211)主席王傳福表哥,亦為比亞迪創始人,聽到呢度,你應該要抹一抹流緊嘅口水。噚日一棍突破0.5元阻力,如果補回0.6元嘅下跌裂口,潛在升幅難以估計,趁低吸納勝算高。唐牛
http://www.fb.com/tongcow88本欄逢周二、四刊出




來源: http://hk.apple.nextmedia.com/financeestate/art/20161013/19798944
魚樂 無窮 畫龍 點睛 藝術
PermaLink: https://articles.zkiz.com/?id=311798

魚樂無窮:吼實賣盤回馬槍

1 : GS(14)@2016-10-18 08:14:04

已賣殼兼易名嘅香港國際建投(687),股價三日升五成,最大關鍵在於街貨不足4%,兩個字總結︰任舞!要揀下隻飛升股,我睇好高雅光學(907)。高雅光學4月時披露,有潛在買家洽購不少於51%權益,帶動股價一度高見3.25元,經過近半年磋商,最後無疾而終,股價由天堂重回凡間。以為個棚會散晒?望一望CCASS,剛剛好相反!首十大券商持股由4月時嘅不足七成,飆升至最新超過九成,貨乾程度由三粒星變成十粒星。弔詭嘅係,兩批原本不在CCASS嘅大貨(分別佔43.6%及18.54%),於8月及本月存入凱基及金利豐證券,如此勞師動眾,莫非賣盤有後着?上周五,公司宣佈向大股東許亮華出售位於龍崗嘅廠房及宿舍,總代價1.87億銀,並會採用售後租回模式,公司表示,由於市場不景氣,加上持續虧損,故唯有割愛,從賣盤角度出發,甚有淨身味道。還有一點要注意,早前賣盤嘅通告中,除「潛在買家」外,還有「其他潛在投資者」嘅身影,不排除今次單刁,就係為佢哋服務。無論如何,聰明錢已經進場,信好戲會再上演嘅,不妨小試牛刀!



唐牛
http://www.fb.com/tongcow88本欄逢周二、四刊出




來源: http://hk.apple.nextmedia.com/financeestate/art/20161018/19803965
魚樂 無窮 吼實 實賣 賣盤 回馬槍
PermaLink: https://articles.zkiz.com/?id=312520

魚樂無窮:一單刁掀爆升潮

1 : GS(14)@2016-10-20 08:04:02

YGM貿易(375)擬出售Aquascutum品牌,代價9.3億銀,帶動股價單日爆升六成,無他,YGM原先市值只得6億銀,一單刁完美釋放整間公司價值。市場上仲有邊隻股份具備同等爆炸力?我即時想起合豐集團(2320)。合豐2014年11月宣佈,以總代價4.8億銀,出售位於鳳崗嘅廠房,並錄得特殊收益4.4億銀,由於當時市值只得3.1億銀,收益較市值還要高,股價於半年內爆升2倍,變得理所當然。經過一輪沉寂後,合豐近日再次蠢動,升近一年高位,究竟所謂何事?原來單刁分兩次進行,第一次於2014年12月完成,第二次則於第一次完成後兩年內完成,即最遲在未來兩個月搞掂。完成今次交易後,合豐仍有五個廠房在手,繼續出貨絕對唔出奇,無他,賣一個廠房賺4.4億銀,相當於2015年全年盈利12倍,做生意都係求財,食髓知味,你係大老闆會點做?睇番基本因素,合豐主要產銷箱板紙及瓦楞包裝業務,年年有錢賺,市值卻只得6億銀,每股NAV1.9元,現價0.79元入場等好消息,抵到爛!唐牛
http://www.fb.com/tongcow88本欄逢周二、四刊出




來源: http://hk.apple.nextmedia.com/financeestate/art/20161020/19806133
魚樂 無窮 一單 單刁 刁掀 掀爆 爆升 升潮
PermaLink: https://articles.zkiz.com/?id=312831

魚樂無窮:通告尋寶潮再現

1 : GS(14)@2016-10-27 06:01:16

用四個字形容近期指數表現,我會揀乏善足陳,而細價股呢?唔使講,一定係百花齊放!消息更係四方八面淹至,最勁嘅當然要數威華達(622),爆升七成後再發通告證實搞緊合資證券行,呢隻三馬概念股,有排炒了。睇睇通告亦有唔少好嘢,嘉瑞(822)同橙天嘉禾(1132)齊齊賣產,爆升後整固中,吼實第二輪攻勢。近期披露易常客還有偉祿(1196),周一宣佈擬將深圳寶安區工業用地,轉作辦公及公寓用途,總面積7,141平方米,翌日又與廣東華興銀行深圳分行訂立戰略合作框架協議,為期三年,規模達50億人仔,未來搞物業產業投資、收購合併、融資服務等,夠晒銀彈。偉祿前身昌明投資,轉型後瓣數多多,地產、證券、廢料業務都有。咁多動作為乜?原來公司最新市值60億銀,說穿了又係深港通概念股要員之一,為通車做熱身運動,合情合理。提多你一句,去年9月公司兩度出手回購,當時作價約2.5元,之後股價一升無回頭,事隔一年,股價升足一倍!公司上月食過番尋味,以5.03元回購,與現價相若,能否歷史重演?拭目以待!唐牛
http://www.fb.com/tongcow88本欄逢周二、四刊出




來源: http://hk.apple.nextmedia.com/financeestate/art/20161027/19813094
魚樂 無窮 通告 尋寶 寶潮 再現
PermaLink: https://articles.zkiz.com/?id=313635

魚樂無窮:邊隻地產股值博

1 : GS(14)@2016-11-08 05:40:35

政府再出招樓市,地產股插到七個一皮,從炒股角度出發卻非壞事,因為機會是跌出來的。撈底首選長實地產(1113),頻頻傳出賣產消息,加上講明會轉型,受辣招影響程度最低,怕接貨嘅戰友,不妨用期權Short Put入市,增加靈活度,即月行使價50蚊期權金有5毫幾子,回報率超過1厘,有一定吸引力。細價股方面可留意新昌管理(2340),去年9月曾洽商賣盤,三扒兩撥炒上兩蚊樓上,可惜最後鎩羽而歸,股價亦打回原形。不過,集團最近再見異動,原因有兩個︰第一,公司宣佈擬出售室內裝飾及特殊項目業務51%股權,總代價1.79億銀,需知道該業務錄得中期溢利1,703萬銀,佔比超過六成,如此割愛難免惹來淨身憧憬。第二,近日有批大貨(48.59%股權)由實名持有存入至金利豐證券,數量與大股東新昌(404)持股幾近相同,如此勞師動眾搬倉,係咪好事近?自己加點想像力吧。客觀事實係,轉倉後股價連爆兩日,逼近今年高位後,只要有消息配合,破旗再上只係時間問題。現價最新市值5億銀,較上次賣盤高位平三成,to bet or not to bet,自己計數吧。唐牛
http://www.fb.com/tongcow88本欄逢周二、四刊出




來源: http://hk.apple.nextmedia.com/financeestate/art/20161108/19825952
魚樂 無窮 邊隻 地產 股值
PermaLink: https://articles.zkiz.com/?id=314396

魚樂無窮:誰是大選真贏家

1 : GS(14)@2016-11-10 08:01:27

「知否世事常變,變幻原是永恒!」唔知籮記當年唱呢首歌時,估唔估到今年咁多變。特朗普入主白宮,重演英國脫歐變天劇本。不過,這是真的黑天鵝嗎?學欄友高明話齋,公投票有得揀脫歐不脫歐,同樣大選票亦有得揀特朗普與希拉莉,所以極其量只能說是爆冷(根據民調),甚麼是黑天鵝?樓價只跌不升、梁振英撐港獨、劉德華做特首……「朝頭早玩海盜船,晏晝先玩過山車,黃昏再玩多次海盜船!」周星馳喺《回魂夜》咁樣解釋畀莫文蔚知,自己點解咁大膽。其實香港股民膽子亦越來越大︰年初有A股熔斷,跟住輪到脫歐,而家又有特朗普,真係冇乜風浪未見過。亦因如此,短炒功力亦越來越強,噚日恒指最多跌唔夠千點,收市跌幅減半,執筆之時夜期仲升緊100點,比起脫歐時彈得更快更狠,心理質素差啲或者膽量唔夠,已經冇份坐順風車。冇人估到特朗普下一步棋會點行,令不明朗因素增加,後市易跌難升,橫行局面有望打破,尋常股民早就已經蟹貨纏身,惟有有錢人有無限彈藥掃貨,最終又會上演一場財富轉移遊戲,講到呢度,大孖沙們已經開緊香檳慶祝了。唐牛
http://www.fb.com/tongcow88本欄逢周二、四刊出




來源: http://hk.apple.nextmedia.com/financeestate/art/20161110/19828338
魚樂 無窮 誰是 大選 贏家
PermaLink: https://articles.zkiz.com/?id=314864

魚樂無窮:殼股半年鑄一劍

1 : GS(14)@2016-11-15 08:12:13

5月底曾經推介廸生創建(113),當時造2.3元(除息後計),最高見2.93元,累升27%,輕鬆升抵目標價,昨日收報2.78元,仍然升21%。當時睇中大股東潘廸生及家族成員,有權於半年時間增持股份五個百分點至54.95%,而獲豁免提出強制性收購,對股價有支持作用。潘廸生亦身體力行,其持股量由消息公佈前嘅49.95%,增加至51.83%(截至上周五),涉及股數712萬股。增持活動將於本月底完結,究竟有乜後着?從基本因素睇,廸生手頭淨現金達13.2億銀,以發行股數3.8億股計,每股現金達3.47元,較現價還要多出7毫子,超值兩個字都唔足夠形容那種抵買法,增持乃無可厚非。所以除咗增持之外,公司近年亦密密進行回購,變相令含金量更高。再加多少少想像力,最新市值10億銀,業務簡單,說穿了又係賣殼嘅好材料,大股東刻意將持股增至超過五成,係咪為此鋪路?望真啲,每股NAV達5.3元,相當於五折大平賣,如果先作特別派送再賣,爆炸力肯定大到你唔信。究竟會否由虛幻變成現實,相信即將公佈嘅中期業績會有所分曉。



唐牛
http://www.fb.com/tongcow88本欄逢周二、四刊出




來源: http://hk.apple.nextmedia.com/financeestate/art/20161115/19833654
魚樂 無窮 殼股 半年 一劍
PermaLink: https://articles.zkiz.com/?id=315496

魚樂無窮:太平地氈變飛氈

1 : GS(14)@2016-11-24 07:35:10

太平地氈(146)昨早發通告,委任Evercore Asia Limited就公司商業地氈生產、分銷及銷售業務進行戰略審查,旨在為股東實現價值最大化。消息一出,太平地氈變飛氈,全日大升25%,收報2.31元,創逾一年高,成交仲勁過舊年大時代。整份通告,最值錢係「價值最大化」五粒字,暗示現價未能反映公司真實價值。太平地氈大股東為米高嘉道理,即中電(002)及大酒店(045)主席,屬名門望族。雖然太平地氈名聲明顯不及後兩者,但絕非池中物。經過噚日一棍後,最新市值仍未夠5億銀,每股NAV達3元,市賬率只得0.8倍,兼有淨現金揸手,雖然近年業績麻麻,但以殼股角度去秤,肯定嚴重低水,管理層搞改革不無道理。太平地氈另一個優勢是貨源歸邊,首十大券商持股超過八成,一個消息即大腳踢起,未來改革上軌道,只會衝得更高更遠。順帶一提,大酒店昨日有7,288萬股大手上板,相當於已發行股本4.7%,每股作價8.8元,帶動大酒店舞高15%,而系內股份齊齊異動,1+1威力肯定大過2,值得期待!唐牛
http://www.fb.com/tongcow88本欄逢周二、四刊出




來源: http://hk.apple.nextmedia.com/financeestate/art/20161124/19843531
魚樂 無窮 太平 地氈 氈變 變飛 飛氈
PermaLink: https://articles.zkiz.com/?id=316780

魚樂無窮:六合彩必勝法?

1 : GS(14)@2016-11-29 07:51:54

■六合彩開獎結果不會因上次而改變,研究走勢其實是自欺欺人。 資料圖片





剛過去的周末,六合彩開出1、2、3、4、7、10這個少見的細冧巴組合,結果造就23.5個頭獎幸運兒,三獎(中五個字)中獎注數更達1,334.9注,證明順序買1至7七個數字嘅人不在少數,更令馬會倒貼近1,000萬,屬近年罕見。坊間有不少六合彩秘笈,透過旺盲門、玄學、顏色等精選心水冧巴,家家有求,但其實六合彩屬獨立事件,今次開獎結果不會因上次而改變,所以研究走勢其實有點自欺欺人。但真係冇方法增加勝算?唐牛睇過一個研究,在此分享一下︰根據大數據法則,經過天量開彩後,每個組合出現的次數也會均等,以賭大細為例,雖然不時出現連開五鋪大或細嘅情況,但長遠計,大細出現機會率均為一半一半,由此推斷,避開投注已出現的頭獎組合,應可提高命中率,有興趣嘅戰友,不妨研究一下。發完橫財夢,不如講番實戰市場。愛股之一的嘉利國際(1050)公佈完中期業績,雖然生意有所減少,但係,盈利照升近三成。無他,皆因成本控制得宜也,中期息更大增七成,加上房地產項目明年將有收成,拾級而上格局不變!唐牛
http://www.fb.com/tongcow88本欄逢周二、四刊出




來源: http://hk.apple.nextmedia.com/financeestate/art/20161129/19848487
魚樂 無窮 六合彩 六合 必勝
PermaLink: https://articles.zkiz.com/?id=317464

魚樂無窮:殼股企硬有玄機

1 : GS(14)@2016-12-01 08:01:47

上周推介嘅太平地氈(146),與同系的大酒店(045)一樣,股價大升後齊齊處於唞氣mode,整固後預料會有新一輪攻勢,繼續坐定定。今日打孖上講兩隻股票,分別係太陽世紀(1383)及聯太工業(176),同樣同聲同氣。先講一講太陽世紀,由綽號「洗米華」嘅周焯華打骰,最近宣佈一供三,供股價0.2元,集資最多9.6億銀,主要用作償還貸款,公司通告更不諱言,融資成本嚴重侵蝕盈利能力,所以今次供股可視為真抽水多於收乾貨源。如何令街外人乖乖供股?當然就係將股價炒上,下周二截止供股前,或有一輪升勢,以供股價作計數位入場,有一定值博率。聯太工業方面,最新獲楊素麗及李志成提出以每股0.493元全購,要約人最終要持有不少於50%股權才能達成,而聯太兩名主要股東已接納要約,涉及股份約34%。楊素麗不是別人,正正係太陽世紀執行董事,同系同時間有資本動作,值得憧憬。講番聯太,NAV達4.6億銀,大部份更為現金,以0.493元計,殼價2億唔夠,難怪全購雖屬有條件,但從未跌穿全購價,憧憬加價嘛,挨近5毫子上車,抵玩!



唐牛
http://www.fb.com/tongcow88本欄逢周二、四刊出




來源: http://hk.apple.nextmedia.com/financeestate/art/20161201/19850908
魚樂 無窮 殼股 股企 企硬 硬有 玄機
PermaLink: https://articles.zkiz.com/?id=317787

魚樂無窮:德國股神好波!

1 : GS(14)@2016-12-08 08:15:26

德國股神科斯托蘭尼講過,趨勢=資金+信心,後生一輩會覺得佢吹水,但經過噚日半新股喪炒一役,唔少人都信服到五體投地。「越南河」股膳源(1632)連升七日,累積升幅超過七倍,最終激發全體半新股的小宇宙,升幅榜頭五大全屬半新股,其中做卷煙包裝紙嘅盟科(1629),單日曾經狂升1.4倍,成交超過3億銀,打入二十大成交榜,勁過唔少藍籌。事實上,相關股份基本因素,唔會在上市後短時間180度轉變,說穿了大家見到膳源爆升,對半新股信心增加,繼而真金白銀搶貨,結果構成百花齊放嘅美麗圖畫。炒新股有乜秘技?記住,炒股係心理遊戲,當大家都相信同一條方程式,股價就會升,贏人哋嘅方法只得一個,就係快人一步。好似今朝咁,小部份新股開始發癲,你就要即刻搶入未炒起嘅半新股,要贏錢冇難度,現今資訊發達,上網㩒個掣就會睇到。當然,事後孔明好易,如果走勢不似預期又點?所以掃貨時要計定數,自己可承受風險有幾大,前輩教落,入場時唔係諗贏幾多,而係諗可以輸幾多,呢個理論終生受用,共勉之!唐牛
http://www.fb.com/tongcow88本欄逢周二、四刊出




來源: http://hk.apple.nextmedia.com/financeestate/art/20161208/19858167
魚樂 無窮 德國 股神 神好 好波
PermaLink: https://articles.zkiz.com/?id=318715

魚樂無窮:2016年最大得着

1 : GS(14)@2016-12-30 02:05:20

2016年將盡,全年贏錢或輸錢已成定局,斷估呢兩個交易日唔會有奇迹出現,與其死纏難打,倒不如養精蓄銳,留待明年再戰。還記得海通證券對今年的投資展望係「慢就是快」,如果演繹為博公用股高息股跑贏大市,百分之百正確,就算近期加息升溫令股價回落,埋單依然有不俗進賬。講真金白銀落場,今年投資概念比想像中多︰年初濠賭股回勇、年中滙控(005)炒回購、年尾炒資源股翻身,再加上年中無休嘅殼股、科網股同IPO,只要食中一兩個升浪,回報必定好過你每日炒出炒入,等運到有錢贏,同樣係「慢就是快」嘅體現。我自己好怕做預測,事關乜都畀你估到,就唔使捱窮,史提芬周亦都唔係食神,所以專欄推介甚少提及目標價及止蝕價。我深信每個人心目中,對每隻股票都有一個價,硬將我個價套在你身上,同強姦冇分別,大家亦唔會暢快,投資嘅嘢好個人化,升嘅覺得賺夠就走,輸嘅就睇持貨能力吧。今年最大得着,係對投資心理學有進一步認識,股價係人與人之間互動嘅結果,你掌握到大部份人嘅心理,勝算自然增加,在此預祝戰友們來年得心應手!



唐牛
http://www.fb.com/tongcow88本欄逢周二、四刊出




來源: http://hk.apple.nextmedia.com/financeestate/art/20161229/19879687
魚樂 無窮 2016 最大 得著
PermaLink: https://articles.zkiz.com/?id=320449

魚樂無窮:欣宜擸獎的啟示

1 : GS(14)@2017-01-05 07:59:39

2017年第一次同大家見面,祝戰友們要乜有乜、樣樣都得!每年1月1日,我例牌會捧叱吒樂壇頒獎禮嘅場,不是甚麼最具代表性、最催淚嘅因素,而是我每天都會聽903,睇埋全年成績表變得理所當然。今年爆個小冷門,由欣宜成為大贏家,靠一首「女神」,讓她連續奪得「我最喜愛女歌手」及「我最喜愛歌曲」兩個大獎,名副其實白雪公主升呢做女神。睇網上留言,好多人都話佢消費肥姐,誰對誰錯,不是今日的討論範圍。點解女神可以突然彈出?一個字講晒︰timing!我自己十分喜歡方皓玟嘅「你是你本身的傳奇」,曲詞優美兼有深層意義,實屬奪獎大熱,不過呢首歌年初已登場,距離頒獎禮差不多一年,熱爆程度難免減退。相反,女神遲幾個月才派台,在樂迷心目中肯定較新鮮,贏在起跑線。頒獎禮當晚,更有不少行家幫欣宜拉票,成功牽引現場觀眾情緒,王者因此誕生。上述情況是否似層相識?冇錯,只要有催化劑,醜股也可大翻身,市場唔就嘅話,買騰訊(700)都可以輸鑊甘,說穿了,贏錢輸錢都係timing主宰。希望大家今年在股市,都搵到自己嘅女神!唐牛
http://www.fb.com/tongcow88本欄逢周二、四刊出




來源: http://hk.apple.nextmedia.com/financeestate/art/20170103/19884559
魚樂 無窮 欣宜 宜擸 擸獎 獎的 啟示
PermaLink: https://articles.zkiz.com/?id=321200

魚樂無窮:殼股馬房生力軍

1 : GS(14)@2017-01-12 08:07:26

炒開殼股嘅戰友,都會有本秘笈。甚麼秘笈?派系秘笈是也!強國企業南下搶殼,往往兩三隻甚至更多,通常同系一隻炒起,資金便跟勢追逐姊妹公司,情況好似跑馬咁,告東尼贏咗頭兩場,馬迷之後便會追住佢馬房嚟買。殼股馬房最近多咗個新練馬師,冇錯,講緊嘅就係噚日B1頭條主人翁陸東,睇睇佢最新披露嘅殼股持倉,噚日七隻有五隻升,平均升幅達一成,旗下組合靠殼股去年勁贏46%,羨煞旁人。你話基金炒殼股唔合情理,我就話搵到錢就係贏家,君不見好多人玩藍籌輸到喊嗎?講殼股講到咁開心,今日當然要搵隻好殼股推介一吓。路訊通(888)早前宣佈,委任資深傳媒人燦哥羅燦做董事總經理。消息公佈後,股價升極都有,噚日仲破旗而上。燦哥魅力固然利害,但更引人入勝嘅係,路訊通阿媽載通(062)同期宣佈,委任高丰做雷禮權嘅替任董事。高丰何許人也?投行及私募基金出身,做過大摩同KKR,再睇番路訊通,7億元市值中有一半係cash,無論變身定賣盤都大把空間,兩大高手同時坐鎮,淨係炒憧憬都唔止呢個價啦!唐牛
http://www.fb.com/tongcow88本欄逢周二、四刊出




來源: http://hk.apple.nextmedia.com/financeestate/art/20170112/19893783
魚樂 無窮 殼股 馬房 生力軍 生力
PermaLink: https://articles.zkiz.com/?id=322272

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019