📖 ZKIZ Archives

青姐又講邊間名店呀?

1 : GS(14)@2012-05-17 22:58:22

http://www.sharpdaily.hk/article/news/20120517/91097
成功故事聽得多，今日講一個真人真事趕錢出門口的反面教材。
自由行之後，好多本地消費者都領教過名店銷屎嘴臉。查實，狗眼看人低，又豈用等到自由行。小女子曾於一家名店的兩間分店，貼錢買難受。上世紀九十年代香港回歸前，另一半陪我到某牌子銅鑼灣分店，買個我早就睇中的漆皮銀包做生日禮物。銷屎似嫌飛來蜢不夠肥美，唔太願意攞件貨給客人過目。攞出嚟，又好似嫌阻佢時間。以為幾千蚊貨仔，費事驗來驗去，爽快直接碌卡找數。點知條勁寸兼眼厲厲嘅銷屎玩嘢，話簽名唔似，再碌再簽，到第五次才收貨。諗住息事寧人忍氣吞聲算數，不過以後就冇幫襯。
之後，又自作賤，見一個款式簡單的包包減價至三千，諗住見客或出席飯局之用。中環分店的那位銷屎，又嗌多次才從貨架上攞個包包下來。最終買了回去，但每次見到那包包，總會諗起不愉快經歷。如今那兩件垃圾也不知丟到哪裡去了，小女子更未再回頭這家慈姑店，連櫥窗都費事望多眼。
一、兩個銷屎之行為，破壞整個品牌的形象。品牌叫慈姑，裡面班銷屎阿姑一點也不慈祥。細水長流好客唔要，今天內地同胞大款以為有錢大晒，要求多多，脾氣大，聲音更大，說話如鬧交，尤其是人家趕住送禮，但想要嘅款式缺貨，銷屎就算賺到都要受一肚氣。如今我的包包和高踭鞋，都幫襯另一家以手工質料優質見稱的品牌。失去我這種細客，名店銷屎不會視為損失。但發生在小女子一位富三代朋友身上的事件，卻令人拍案叫絕。一心博釣金龜的銷屎妹妹，要引以為戒。究竟發生乜事？下星期開估。

胡孟青
專欄電郵：SharpHK.Women＠gmail.com
facebook專頁：www.facebook.com/SharpHK.Women
2 : barryruger(14987)@2012-05-17 23:02:22

慈姑,姑慈?
3 : 亞力士(1473)@2012-05-17 23:03:01

慈姑店<----- 姑慈?
PermaLink: https://articles.zkiz.com/?id=279438

金手指：青姐滴淚夠煞食 孫柏文

1 : GS(14)@2013-05-10 01:39:33

http://hk.apple.nextmedia.com/financeestate/art/20130509/18253981

                  今日，首先要多謝大家支持，信孫柏文對上兩篇睇好安莉芳（1388）嘅文。我亦承諾，繼續努力睇吓邊隻股份價格不反映價值時，叫大家「一注獨贏」！
噚日，本報報道話友報精神領袖林行止話碼頭工潮一役係資本家嘅蒙羞。咁有次幾年前我去到間中學度，有學生問我呢啲階級鬥爭嘢時，我就講咗一個真人真事。

費格遜最憎邊個

                我同學生話：「有間公司嘅話事人，佢個花名叫風筒，以形容鬧前線員工時嘅刻薄。有一次，佢喺員工嘅休息時間，用口鬧一位員工之餘，仲要一腳踢落隻鞋到，隻鞋一飛打中佢鬧緊嘅員工，該名員工即時爆缸流血。呢個話事人係咪就係最典型仇恨勞動階級、普羅大眾嘅管理層呢？」
咁因為o依家啲細路好鬼醒，當然唔答我啦，知我跣佢哋。咁我再話：「大家知唔知呢個話事人同前線員工係邊個？個員工就係碧咸，個話事人就係費格遜。你估費格遜最仇恨邊個？最想隊冧邊個？」後面有個後生仔諗都唔諗就嗌：「梗係摩連奴同車路士啦！」我笑一笑問：「咁有冇人覺得係碧咸呀？舉手。」冇人舉。大家自己諗諗佢。
不過當和黃（013）持有新加坡上市嘅碼頭股份少到得兩成時，真係唔知終極碼頭方案，即碼頭地轉土地用途，變住宅或酒店項目嘅機會有幾高。如果轉到，佢新加坡上市嘅碼頭就真係買得過。
噚日，我見到隔籬李華華，講我偶像胡孟青青姐幫大家樂（341）拍嘅廣告，仲話青姐「喊樣再現」。大家可能淨係記得佢當日因為滙控（005）賣33蚊股而落淚，不過我相信佢滴淚之所以重要同歷史會記載，就係因為劈死咗神憎鬼厭嘅收市競價（勁假）時段。呢把「青淚劍」，保衞股場秩序啊。

                                                                                                                                                             孫柏文
PermaLink: https://articles.zkiz.com/?id=282762

中環在線： 青姐眼大　「使乜黐假睫毛」

1 : GS(14)@2013-07-19 00:36:12

http://hk.apple.nextmedia.com/financeestate/art/20130718/18338823


■12年前的青姐都眉清目秀　《壹週刊》圖片

                噚日隔籬再隔籬版，有篇「錯愛胡孟青」，作者葉朗程話有位女性朋友跌落水，甩咗假眼睫毛，上水後由佘詩曼變成胡孟青，青姐粉絲睇完當然反感，認為有侮辱之嫌。青姐反而冇乜反應，笑言從冇用假眼睫毛，仲寸對方只係借佢個名谷收視。

指專欄伺機谷收視

                鬧慣人嘅青姐強調自己百毒不侵，話「我對眼咁大，使乜黐（假眼睫毛），不過中環有好多女人戴假眼睫毛返工㗎！」暗示作者隨時得罪好多中環女人。佢又寸對方未夠班，未曾以真面目示人，只係想借佢個名谷收視。
查實青姐後生嗰陣，素顏都樣子甜美，只係生仔之後，冇乜點修身啫，咁唔係個個女人生完仔之後，都可以好似陳慧琳、李嘉欣，瘦到好似冇生過一樣咁吖嘛。
葉朗程可能亦知衰，噚日即刻喺本報網站慎重道歉。                                                        
PermaLink: https://articles.zkiz.com/?id=283483

【財圈花生－青龍之戰】陳承龍炮轟青姐：我不嬲臭朵　有冇錢唔關佢事

1 : GS(14)@2017-10-09 02:59:38

股票市場波譎雲詭，財演界嘅戰事亦冇一刻停過。最新一場戰事，係港股策略王社長陳承龍，決戰「青姐」胡孟青，史稱「青龍之戰」。戰事嘅始末，要數到公元2017年9月18日，「青姐」喺嘅一篇專欄《股玩你人亦會玩你》。內容主要係講「有人」自稱上個月賺千萬，令到「青姐」喺文章連環放箭！第一箭，先係質疑錢咁易賺，點解仲要出力宣傳。呢一箭唔到肉？再來一箭，話有老行尊直言，「此人正欠他寶號的股票孖展融資。」暗示呢個人吹水，仲話佢「搵傻仔墊屍底」。至於「青姐」講嘅人係邊個，根據形容，係「自誇食得招積、住得舒適、超跑遊艇代步、O靚模成群。」根據種種明示暗示，就觸動咗陳承龍嘅神經線。佢主動向「青姐」WhatsApp，問「你係咪講緊我？」青姐就回覆，叫陳承龍唔好對號入座。去到呢個Moment，戰事真係一觸即發！勢估唔到，導火線竟然係來自一個WhatsApp！原來兜兜轉轉，陳承龍收朋友Forward，青姐原來將佢哋兩人之間嘅對話Cap圖Send出去！結果遍地花生！去到呢個Moment，陳承龍爆了，最新喺Facebook出Post，指名道姓話要《給青姐的信》，直斥文章影射佢之餘，仲「周圍傳我口訊給別人看」，「反正我一向在行內聲名狼籍，不過我最失望是你莫視我對你的尊重和信任。」陳承龍接受《蘋果》訪問時表示，就覺得文章影射佢，「佢話我輸多贏少咪失實囉…最大問題係，其實你每朝都會見到我，如果想寫我，點解唔兜口兜面問我，你就成日鬧記者做得差，點解你自己都唔問？」佢話最失望係，青姐周圍Send佢嘅WhatsApp出去，「我係好客氣問佢，漠視我對佢的尊重和信任，你咁小家周圍Send咁辛苦，不如我公開左佢啦……我臭朵就不嬲，但真係，我光明磊落，寧做真小人，莫做偽君子，呢個通行都知。去到呢個Moment，我不如將佢公開，等大家知邊個錯……你咪問我係咪欠人街數囉，我有冇錢其實都唔關佢事。」佢仲話，「我結婚都搵佢，我唔知佢嬲我乜嘢。」本報曾嘗試聯絡青姐，但冇人聽電話。




來源: http://hk.apple.nextmedia.com/financeestate/art/20170920/20158675
PermaLink: https://articles.zkiz.com/?id=341943
Next Page
ZKIZ Archives @ 2019