ZKIZ Archives


【白雪真係好難聽】惡搞配音始祖復出! 陳夕:唔恨紅只求開心

1 : GS(14)@2016-12-10 13:30:13

十年前憑住惡搞卡通配音而紅嘅陳夕,可謂香港惡搞配音始祖



「白雪……白雪呢個名真係好難聽,好難聽呀!」一睇到呢句係咪即刻有聲有畫面先?相信8、90後讀者細個一定會睇過《新白雪公主》呢條惡搞配音片。你哋除咗記得王子好嘴賤,小矮人啲假音真係好假,又知唔知邊個整呢條片出嚟呢?其實呢個又扮王子又扮小矮人嘅「幕後玩家」就係—陳夕。記者:余傲芝、黃浩晉 攝影:馮峰、Neo



新白雪公主係他嘅代表作,其中一句「白雪個名真係好難聽好難聽」更加係深入民心,點擊接近三百萬

陳夕當初開始惡搞只係因為無聊,加上鍾意思考,紅唔紅並唔係佢嘅考慮

陳夕笑言自己真人說話都係幾mean,朋友都叫佢話題終結者

叫陳夕做香港「網上惡搞配音始祖」一啲都唔過份,10年前就惡搞《新白雪公主》,仲有《新美女與野獸》、《新灰姑娘》等等。當年YouTube仲未流行,而呢三條片點擊率都超過二百萬,真係一啲都唔簡單。咁點解好玩唔玩,係都要玩童話喎?俾番少少童真我哋都得啩……陳夕話:「童話故事本身好夢幻,只要扭轉佢,變成一啲好現實嘅嘢,咁件事就好笑喇!」唔怪得心底善良嘅灰姑娘,明明同王子有美滿嘅愛情故事;喺陳夕口中就變成一個「八婆」,不單止收王子做兵,仲要準時十二點鬆人走數。不過,就係夠荒謬先至夠好笑,更何況現實比惡搞更瘋狂呢。



記者考驗他即興配音,佢一次過扮咗三把聲,果然難佢唔到

他指自己唔怕因惡搞而得罪人,而創作亦唔應受到掣肘,否則就唔過癮啦

陳夕認為現今環境雖然冇咩好笑,但更應該要笑,希望自己嘅作品可以比人正能量

明明惡搞片咁收得,點解陳夕當初唔食住上,仲停產成10年?無他嘅,因為唔再好玩囉。「我出發點係為咗玩,當呢件事唔好玩就會停。其實呢段時間我一直都搵緊o依家大家嘅笑點係咩,一搵到新嘢就會俾大家睇。」嘩!大師,我彷彿參透到啲嘢,唔怪得上個月陳夕開咗Facebook page,仲揚言夠10,000 Like就出新片,o依家有預告睇o添啦!
o依家好多人自稱YouTuber,仲靠拍片出名搵到食,陳夕會唔會好葡萄班「後輩」㗎?點知佢係冇睇開「後輩」嘅片,仲話:「我當初做呢件事唔係為咗有人識,或者要紅;純粹因為好無聊想玩下嘢,所以紅唔紅冇咩所謂」



雖然陳夕冇諗過要靠惡搞片爆紅,但係佢有冇一刻諗過會出樣呢?「冇!」佢斬釘截鐵咁講。「呢個係我嘅特色嚟,冇人知我係邊個先好玩。」咁咪同《爆粗Band友》一樣?估唔到陳夕就係嚮往呢種生活:「當我化晒妝打緊Band嗰陣就好多fans擁住自己;返到後台落咗妝嗰陣就冇人認得,就算係fans都會當自己係「薯仔」咁推開。」講到咁邊夠你玩呀!學《新灰姑娘》個仙子咁講:「好啦!俾你兇到喇!」希望陳夕會做「找數真漢子」,夠10,000 Like就出新片。雖然惡搞童話講唔出啲咩大道理,但能夠令大家開心笑番幾分鐘都好足夠啦,係咪呀哈姆太郎?




來源: http://hk.apple.nextmedia.com/entertainment/art/20161210/19860789
白雪 真係 係好 難聽 惡搞 配音 始祖 復出 陳夕 唔恨 恨紅 只求 開心
PermaLink: https://articles.zkiz.com/?id=319080

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019