亞視呢間早已爛晒嘅公司,因為大陸佬司榮彬堅持唔熄機,愈搞愈肉酸。多路人馬各懷鬼胎,口口聲聲話要收購亞視,舔盡亞視呢塊「招牌」嘅剩餘價值。亞視臨時清盤人德勤裡面,亦有人因亞視而扶搖直上。 其中一個負責處理亞視盤數嘅德勤合夥人,叫葉華明(Ben Yip)。佢本身係做開收購合併(M & A),涉足嘅行業廣泛,包括製造、電訊、零售及賭業等,喺呢行已有近二十年經驗。一四年德勤做咗亞視清盤人,Ben Yip亦調咗去幫手跟進頗為政治敏感嘅亞視。Ben Yip嘅出身,確係根正苗紅。佢曾喺漢華中學讀書,畢業後入咗中大工商管理系。但咁多年佢仍積極參與漢華校友活動,仲做埋校友會名譽會長。據聞佢生日,葉國謙同葉國華都會俾面出席。Ben Yip涉足亞視清盤後,亦平步青雲,而家已經係德勤企業重組服務嘅合夥人。唉,真係同人唔同命,可鄰亞視嘅員工出份糧都咁辛苦,陰功! 復星老闆ICBC耍太極 復星老闆郭廣昌舊年失聯幾日,記者早幾日問佢去咗邊?佢同大家講:「多謝關心!」要喺佢身上套到真嗰句,似乎幾難。佢出晒名「耍太極」了得,係講緊真•太極。復星總部喺中國工商銀行大廈八樓,但郭廣昌幾年前,用六十幾萬喺二十一樓租多大半層,一半用嚟做辦公室。另外一個地方,神神秘秘,無乜裝修,只係打通咗幾間房,據聞就係俾佢耍太極,有傳佢每日中午食飯之前,都會耍一轉添。 中環寸嘴:銷魂飯拆佢嘅局 工廈大王楊耀松長子,游走高級酒店、銀行,及知名食肆,與各路人士打交道,透過美酒佳餚,察看人生百態,讓讀者「嗒」落有味。 上個禮拜六睇對家週刊有個專欄,講六國酒店入面間粵軒,研究咗個「黯然銷魂」叉燒蛋飯,啲米係泰國青靈芝香米,隻蛋由日本廣島嚟,豉油又成兩蚊雞一滴,講到咁「神化」,但已經俾圍內人士預訂一空,「超」!咁不如做私人俱樂部,唔好開檔喇。寫到咁引人入勝,點知都食唔到嘅,講咗等於冇講,呢個咩梁家權都算敗筆。我工廈小王子識人都唔少,特登託個飲食業界「鉅子」幫我賣個人情,睇吓食唔食到,吖,條友話容乜易我寫衰六國酒店,話晒佢親戚有股份喎;哈!反正都要食飯,我就幫佢考察吓業務,呢個世界要當機立斷,要食就即刻去,一於去踢場!呢個黯然銷魂飯,叉燒同荷包蛋先係主角,其他配料都係錦上添花嘅啫!睇吓餐牌,一碟叉燒$118,我再柯打兩隻荷包蛋,再叫兩碗白飯,自製黯然銷魂飯囉!無可否認,睇佢煎嘅荷包蛋都有啲技術,好過我煎嘅,碟叉燒分量好足,個portion double咁滯,咁樣叫法都係$140,仲抵食過叫兩碗叉燒蛋飯(每碗九十元),呢個世界最緊要實際同抵食!仔時,喺中環食鰻魚飯便當,以為鰻魚飯就係咁,點知大個咗去高級日本餐廳,發覺原來高級嘢要叫A La Carte嘅,咁咪叫條鰻魚,加個白飯囉,呢啲叫臨場執生,做人要識變通! 911支參堅•哽 洋參大王楊永仁前年上市要sell客,送咗堆野生洋參俾中環啲機構投資者。本來收埋唔記得咗,直至早排見到911股價暴跌,先記起有支咁嘅嘢。躁躁哋,諗住煲嚟飲吓清清熱,點知飲完仲咳到黐肺!小宗搵洋參大王喺上環海味街班老行尊補吓課,先知只有來自美國威斯康辛州、最貴價嘅花旗參,先有清虛火的作用,恒發嗰支野生人參,係補血嘅!所以飲完個人上晒火。所以話呢,股票唔好亂買,參都唔可以亂食。 再泊一會 小宗同老友,上個月經過機鐵香港站個停車場,見到喺正中心位置,泊咗架黑色瑪沙拉蒂「For Sale」,仲有個電話冧巴。老友話見到呢架車已經泊咗喺度好耐,小宗為求真,打電話去問吓,對方話幫朋友放,開價14萬5,到今日依然未賣出。架車04年出廠,開價比同類二手車差唔多,不過最難搞係依家好多大企業裁員又cut budget,個個中環友都留多個錢傍身,相信呢架車要「再泊一會」。 | ||||