ZKIZ Archives


自成一格:廁紙貴過銀紙的國度

1 : GS(14)@2016-05-21 18:23:58

「打劫!咪郁!拎晒你身上嘅廁紙出來!」你以為睇緊cult片?現實情況比cult片來得荒謬。講緊嘅係委內瑞拉,自從油價從100美元回落後,委內瑞拉的超級通脹就更加失控。除了廁紙外,其他日常用品包括食物、藥物、甚至避孕套等入口貨品通通缺貨,排足幾個鐘都有機會空手而回,城內兵荒馬亂,周圍有人搶鹽、搶米甚至搶洗頭水。去年委內瑞拉的經濟收縮已經達到5.7%,通脹飆升至180%,為全球通脹最高的國家。據國際貨幣基金組織(IMF)估計,2016年委內瑞拉的通脹有機會達720%!一年前1美元可以兌換約82玻利瓦爾,今日黑市價1美元換1075玻利瓦爾,加上物價急漲,搞到廁紙仲貴過銀紙。更荒謬在後頭,為了慳電,總統馬杜羅下令公務員一周工作兩天,上周末亦延長了經濟緊急狀態60日,並指責是美國煽動政變。雖然今年油價從低位每桶30美元已反彈至近50美元,但對委內瑞拉而言,要達到財政收支平衡,油價起碼要回升至110美元,認真難過登天。委內瑞拉癱瘓性經濟衰退將整個國家推到崖邊,政變一觸即發,這隻黑天鵝不能不防。越野兔本欄逢周五刊出





來源: http://hk.apple.nextmedia.com/financeestate/art/20160520/19619345
自成一格 自成 一格 廁紙 貴過 過銀 銀紙 紙的 國度
PermaLink: https://articles.zkiz.com/?id=300803

自成一格:榴槤寶寶好危險

1 : GS(14)@2016-06-06 02:53:00

自2015年下半年開始,極端天氣一直困擾世界各地,仲記得上年平安夜加拿大有成9度,全球齊齊過熱辣辣聖誕,真係諗起都覺得黐線。點解會搞成咁?除了溫室效應外,厄爾尼諾亦功不可沒,呢個聖嬰推高全球氣溫,擾亂氣候規律,令2015年成為有紀錄以來最暖一年,不少熱帶國家面臨極乾旱情況。而天氣往往與農產品期貨息息相關,例如紐約期糖就受巴西失收影響,由去年8月低位每磅10.5美仙,升至現時17.5美仙水平。但越野兔最着緊,當然唔會係糖價,而是最愛的果王榴槤價格。厄爾尼諾令榴槤產地之一的馬來西亞檳城嚴重乾旱,年初生果業界估計今年會減產一半,仲要捱貴榴槤。不過越野兔今日去油麻地果欄睇過,馬來西亞貓山王最平68蚊磅,老細話上個月都無貓山王賣,今個月先返貨,旺季雖然較去年遲咗成個月,不過今年來貨價反而平咗,平時賣開120蚊磅,所以好抵食。美國國家海洋和大氣管理局已預測,今年6月厄爾尼諾將會終止,接着出現另一個相反的天氣現象拉尼娜,到時馬來西亞分分鐘有水災,榴槤寶寶仍然好危險,所以有得食好食喇!



越野兔本欄逢周五刊出





來源: http://hk.apple.nextmedia.com/financeestate/art/20160603/19638591
自成一格 自成 一格 榴槤 寶寶 危險
PermaLink: https://articles.zkiz.com/?id=301752

自成一格:拉筋唔使15萬嘅!

1 : GS(14)@2016-07-09 06:46:18

California Fitness最近風頭一時無兩,又清盤又欠租,搞搞下仲有個苦主大聯盟,其中最好笑一定係有個24歲嘅哥哥仔向傳媒表示,簽咗15萬蚊教練堂,但係無晒啲女教練幫佢拉筋,轉頭要去破產。嗱!我又唔會質疑呢個哥哥仔想做多啲「尖」的決心,咁畀得錢梗係要自己揀下教練架啦,人之常情啫!越野兔以前都係California會員,眼見好多師奶唔識用健身器材又想郁下,就會買好多教練堂,一來有個靚仔教練幫佢操下,同時又多個人關心自己……啲飲食習慣和健康,身心都得到滿足,抵晒!不過,咁大間連鎖gym都搞成咁,好多人對於會籍制的健身室冇咩信心。雖然市面上多咗好多小型健身室係逐個月俾錢玩,但對於貪心的香港人而言,淨係去間細嘅又好似唔太夠喉。其實近年香港新興一種健身通行證,將香港大大小小的健身室組成一個社群,只要一「pass」在手,可以試勻晒城中不同健身室、瑜珈班、游水、打拳、強度訓練、普拉提、舞蹈和武術等等,仲有得拉筋㖭!通常10日前就開放預約,最遲在課堂開始前一個鐘報名就得。收費方面亦非常彈性,每個月畀錢,隨時可以唔玩。例如Guava Pass咁,手頭上就有210間不同的健身室,衰衰哋就算執一成,都仲有差不多200間任你揀,最正係去其他亞洲國家都用得。無啦啦有日係杜拜做緊瑜珈打卡,都咪話唔型!所以話,拉筋又邊使15萬呢?隻腳可以放上頭的越野兔越野兔
https://www.facebook.com/Sailorrabbit/本欄逢周五刊出





來源: http://hk.apple.nextmedia.com/financeestate/art/20160708/19685986
自成一格 自成 一格 拉筋 筋唔 唔使 15 萬嘅
PermaLink: https://articles.zkiz.com/?id=302970

自成一格:嫁去汶萊嘆世界!

1 : GS(14)@2016-07-15 05:13:19

最近Viu TV有個新節目叫「價值連城」(Barter Game),主持人用以物易物的形式去古巴、茶馬古道以及汶萊。對比起停留在60年代的古巴,越野兔對於近近哋的東南亞富國汶萊興趣更大。汶萊面積大香港五倍多,不過人口只有40萬人,大概係一個沙田區咁多啦!以前汶萊只是一個農業小國,60、70年代發現地底有豐富的石油及天然氣,自此淨係靠賣油,國家都已「發過豬頭」。雖然汶萊君主立憲制立國,蘇丹獨攬大權,不過國家福利好到痴線,政府會包晒所有醫療費用,由感冒到生cancer,國內醫唔好,送埋你出國醫;讀書亦完全唔使錢,大學生仲有生活費津貼;住屋就更加唔使講,個個都住洋房養番狗,豪宅仲有30年免息房貸,一個月少少哋1,000蚊供樓就得喇!福利好到咁,你以為好似北歐咁重稅?又錯了,汶萊蘇丹有的是錢,國民唔使交稅,公共開支象徵性放低1蚊,其餘蘇丹包底!對比起香港啲膠官膠政策,成個月人工都買唔起一呎的痴線樓價,汶萊簡直就好似天堂,生活無憂,與世無爭,仲有好多靚仔㖭!(好似係!你睇下吳尊)如果外地人嫁過去,生咗仔一年之後就可以成為居民;男人的話就要等15年。已經FF緊喇係咪?嗱呢個世界好公平,有辣有唔辣,除了經濟上受累油價大跌外,汶萊亦係伊斯蘭教國家,民風勁保守,無夜生活、無酒飲、無豬肉食、唔可以有婚前性行為……犯規的話有機會遭受鞭刑之苦,所以如果乖乖哋,嫁去汶萊可能都係一條出路!越野兔
https://www.facebook.com/Sailorrabbit/本欄逢周五刊出





來源: http://hk.apple.nextmedia.com/financeestate/art/20160715/19695389
自成一格 自成 一格 嫁去 去汶 汶萊 萊嘆 世界
PermaLink: https://articles.zkiz.com/?id=303777

自成一格:做外賣仔會發達!

1 : GS(14)@2016-08-07 01:57:25

香港夏天天氣真係好難頂!一係又熱又焗,一係橫風橫雨,搞到街都唔想落,但留在家中又會餓死,又唔想叫麥麥送同茶餐廳……最近見到有外賣公司寄咗張傳單,終於試咗第一次用App叫外賣喇!用App揀好食乜嘢之後直接畀埋錢。雖然寫明要32分鐘先送到,實際時間只需20分鐘左右,送貨哥哥着住制服奉上靚紙袋,拎到嚟仲熱辣辣,足不出戶有好西食,正!其實現時香港主要有兩間外賣公司,分別係2014年抵港、來自德國的熊貓先生Foodpanda,以及去年底才加入的後起之秀英國袋鼠先生Deliveroo,兩者營運方式大同小異。
Foodpanda主要收商家錢,所以部份餐廳外賣價錢會貴過堂食,不過唔會額外收運送費用,又可以揀貨到付款、PayPal或網上付款。而Deliveroo就收晒商家顧客兩邊錢,食物定價大多與堂食一樣,不過要收送餐服務費,定單超過120蚊會收番你20蚊,同埋只可以用信用卡網上付款。至於餐廳數目方面,越野兔住筲箕灣,Foodpanda搞咗兩年都淨係得兩間餐廳揀,仲要由鰂魚涌送過黎,起碼成個鐘喎……Deliveroo反而覆蓋到好多平民地道餐廳,例如東大街嘅民聲冰室、甚至泰國菜、甜品糖水都有,有得揀先係老闆,等佢送上門仲快過落街買外賣!不過,餐廳多寡都係視乎地區,又唔能夠一概而論。近年Startup的外賣公司吸金力非常強,Foodpanda於2012年創辦至今,已經經過幾輪融資,籌集到超過3.1億美元;而Deliveroo由2013年至今亦已經獲得四輪融資,合共吸金近2億美元。其實美國已經有一間外賣公司Grubhub成功上市,市值逾32億美元;所以話,今時今日做外賣仔都有機會發圍,睇吓未來係袋鼠跑得快啲,抑或熊貓戰鬥力強啲喇!越野兔
https://www.facebook.com/Sailorrabbit/本欄逢周五刊出





來源: http://hk.apple.nextmedia.com/financeestate/art/20160805/19723058
自成一格 自成 一格 外賣 仔會 發達
PermaLink: https://articles.zkiz.com/?id=304537

自成一格:執輸行頭慘過敗家

1 : GS(14)@2016-08-19 06:53:25

如果你問我,香港人最叻係咩,我會答你,肯肯定係排隊。由排隊食碗拉麵、排隊買演唱會、排隊買iPhone、排隊入書展買雞扒妹寫真。總之有條隊就好想排,大家都買我就要買。以今日為例,中午經過金鐘太古廣場,Nutella有推廣活動,可以即場整有自己名字的榛子醬,商場中庭有條長長的人龍,越野兔上去食完個lunch,嗰班人都仲排緊隊,據聞起碼要排兩個鐘。你以為只係排隊黨?錯晒!人龍中大部份都是西裝友及OL,點解佢哋公司咁好,由得佢地食兩三個鐘lunch嘅?點解嘅?點解嘅?到下午仲離譜,新地(016)推出元朗新盤Grand Yoho,折實平均呎價近萬二蚊,平過同區新盤及二手樓,首日開放示範單位,大批想「平買新地樓」嘅市民下午2點去到ICC睇樓。不過呢,明明2點鐘lunch都過埋,大部份打工仔正常都要返公司繼續做奴隸,但偏偏今日睇樓條人龍排到落電梯大堂,再由電梯大堂排到落樓下一層,人山人海好不熱鬧。喂,而家只係睇示範單位,一來唔會畀人睇蝕,二來早啲睇又唔一定買得到,仲要入票再抽籤先有得揀樓,點解有咁多人返工時間咁得閒,走去睇示位嘅?點解嘅?點解嘅?香港人怕執輸之心昭然若揭,最近樓市又再升溫,大家又再陷入「唔買樓遲啲會更貴」嘅迷思,所以有買錯無放過,530萬元上車盤照衝,未有得買都要睇下個示位!望住發展商個120%按揭計劃,又有30個月免息供款……越野兔唔係食屎的樓市專家,只希望衝入去買Grand Yoho嘅買家唔係「執輸行頭慘過敗家」。越野兔
https://www.facebook.com/Sailorrabbit/本欄逢周五刊出




來源: http://hk.apple.nextmedia.com/financeestate/art/20160819/19741670
自成一格 自成 一格 執輸 行頭 慘過 敗家
PermaLink: https://articles.zkiz.com/?id=306469

自成一格:成吉思汗都搞唔掂的危機

1 : GS(14)@2016-09-02 05:49:04

全球經濟好似穩定番,其實內裏暗藏危機,除了以委內瑞拉為首的產油國在破產邊緣外,其實仲有一個近在眼前的國家,亦都面臨緊重大經濟危機。講緊嘅就係同我地隔住個中國,兼係一帶一路成員國之一的蒙古國喇!上月18日,蒙古國新任財政部長巴圖高科食咗誠實豆沙包咁,坦白地承認蒙古國正處於經濟危機,政府各部門運營成本及工資已無法支付,料今年蒙古政府債務佔GDP比重將達到78%;當地央行亦將基準利率從10.5%升至15%。市場反應就最現實,蒙古國政府債券當時即刻插晒水,主權信用評級亦由B下調至B-的垃圾級別。據悉淨外滙存底僅剩下4.29億美元,所以全國上下要勒緊褲頭過日子,總統等高層人工大減三成,基層政府開支則減少20%,聽聞奧運選手糧都無得出。此外,蒙古國貨幣圖格里克(Tugrik)亦於8月中創下歷史新低,每美元兌2,197圖格里克,成為全球貶值最多的貨幣,較2011年最高位約1,200圖格里克大挫近五成!點解會搞成咁呢?原本蒙古國資源非常豐富,加上與中俄關係友好,煤、銅、甚至黃金礦產源源不絕向外輸,就好似東亞版的沙地阿拉伯咁,越養越強大,經濟增長一日千里,2011年經濟增幅甚至高達17.3%,跑贏大市幾條街。有咁多資源做靠山,財源滾滾來,有錢途又有前途,蒙古國就好似富二代咁有潛力。可惜,2012年突然推出條《限制外國投資法》,覺得自己好威啦有寶咁,企圖囤積居奇,處處刁難海外投資者,嚇走咗好多外資公司。條例實施前(2011年),蒙古全年外資流入達46.2億美元,到2016年上半年,得番3,500萬美元;單是今年計,當地註冊的13萬多家企業,有逾6萬家企業停業呀陰公!外資大減都算喇,再加上中國經濟增長放緩影響商品需求,全球大宗商品價格大挫,直接影響蒙古國生計,經濟雪上加霜;蒙古國經濟嚴峻程度就好似委內瑞拉咁,認真無眼睇,成吉思汗翻生都搞唔掂,睇吓今次IMF會唔會出手救國啦!越野兔
https://www.facebook.com/Sailorrabbit/本欄逢周五刊出




來源: http://hk.apple.nextmedia.com/financeestate/art/20160902/19756888
自成一格 自成 一格 成吉思 成吉 汗都 都搞 搞唔 唔掂 掂的 危機
PermaLink: https://articles.zkiz.com/?id=307147

自成一格:iPhone 7出了,但想不出換機的理由

1 : GS(14)@2016-09-09 05:33:19

唔知有幾多人周三晚捱眼瞓等睇Apple公佈新iPhone呢?說真的,今次發佈會的網上討論比過去幾回發佈會來得冷淡,除咗研究下仲有冇得炒、鬧下冇咗3.5mm耳機插口,同埋新出的airpods好肉酸之外,身邊唔見得有好多朋友雀躍表示要換電話。到底係咪無教主的蘋果光芒日漸減退呢?我們這一代人,見證着由黑白屏幕的Nokia,到彩色屏幕3G的Sony Erisson,再去到又簿又型的Motorola,然後曇花一現的黑莓手機;去到智能手機年代,HTC、Samsung、iPhone,每一年各大廠商推出的新機都有獨家新功能,每一次換電話總有一個很好的理由,影相200萬像素升級到500萬像素,再換部1,200萬像素;然後由2gb內存到4gb再到16gb、32gb……仲有屏幕質素由LCD到LED再到高清4K、處理器由單核到雙核、四核、八核等等。但是近一、兩年推出的新機,慢慢開始睇唔出個分別,廠商當然話新機「好呀,靚呀,正呀」,但大家望一望手上的電話,同新款相差無幾的時候,就會諗點解要畀多幾千蚊去追嗰少少差別呢?結果都係等到用壞咗先換,所以iPhone7的買家好大可能就係現時iPhone5的用家,一部電話閒閒地用兩至三年,產品周期延長了,市場對於新機需求逐漸減少,當年的PC效應正式出現在手機市場上。
iPhone自2007年推出後,銷售一直有增無減;今年第二季神話都破滅,期內iPhone銷售量減少超過16%;第三季iPhone銷售亦按年下跌15%。你估淨係iPhone銷售差?根據調查機構IDC在7月底的數據顯示,今年第二季全球智能手機銷售量為3.43億部,與去年幾乎持平;而第一季銷售增長亦只有0.2%,市場似乎如PC般接近飽和;加上華為、OPPO等國產品牌出貨量大增,市場競爭者越來越多,亦都更加白熱化了。越野兔
https://www.facebook.com/Sailorrabbit/本欄逢周五刊出




來源: http://hk.apple.nextmedia.com/financeestate/art/20160909/19764646
自成一格 自成 一格 iPhone 出了 但想 想不 不出 換機 理由
PermaLink: https://articles.zkiz.com/?id=308303

自成一格:泡菜國黑仔事件簿

1 : GS(14)@2016-09-17 17:29:45

適逢今日又中秋,除咗兩岸三地會慶祝中秋節之外,深受中國傳統文化影響的韓國亦都將中秋訂為三大重要節日之一;不過,最近泡菜國國民就過得不太好,因為今年對他們來說,絕對稱得上是多事之秋。南韓最近真係唔知行緊咩衰運,衰嘢一浪接一浪,由最大企業三星講起。三星最新旗艦手機Galaxy Note7公佈時大受好評,為咗同蘋果公司嘅新iPhone決一高下,趕住8月底開賣。只不過短短幾日,Note7變成流動炸彈,接二連三爆炸事件搞到連航空公司都唔畀帶上飛機,認真「揚威國際」,品牌形象插水,股價當然跟住跌,9月以來股價已挫近6%!除了Note7爆炸嚇親人,隔離北韓亦都亂咁炸,嚇到大家腳仔軟。上周五北韓領袖金正恩趁住國慶進行第五次核試,威力算得上是歷來最大,搞到大家以為地震。雖然美、韓、日以至中國齊齊譴責北韓,南韓總統朴槿惠更加要引進美國薩德飛彈防禦系統,但金仔心思邊個會睇得透呢?搞到朝鮮半島局勢越來越緊張!唔知係咪受核試帶來的「人造地震」影響,本周初南韓慶州市以西亦發生黎克特制5級以上地震,其中更錄得一次5.8級地震,屬有紀錄以來最強。雖然當地核電廠未有受影響,但都關閉咗附近一座液化天然氣發電機組以策安全。唔好以為金仔獨善其身,原來北韓東北部亦出現水災,聯合國指水災死亡人數升至133人,395人失蹤,並有3.5萬間房屋受影響,逾10萬人要逃離家園。黑仔事件仲未數完,全球航運業衰咗咁多年,勢估唔到南韓首先爆煲。全球第七大航運公司南韓韓進海運(Hanjin)向法院申請破產保護,共66艘載滿貨貨船因無法泊岸頓變「鬼船」於大海漂浮,過千萬貨品面臨報銷,事件被喻為「航運版雷曼」。臨近聖誕先搞啲咁嘅嘢,有機會引起漣漪效應,代理、貨主、甚至零售都有機會受影響。天災人禍樣樣齊,泡菜國今鋪認真慘慘豬,希望中秋過後會迎來一番新景象,金仔生生性性唔好再搞事啦!越野兔
https://www.facebook.com/Sailorrabbit/本欄逢周五刊出




來源: http://hk.apple.nextmedia.com/financeestate/art/20160916/19771812
自成一格 自成 一格 泡菜 國黑 黑仔 事件
PermaLink: https://articles.zkiz.com/?id=309333

自成一格:一對波鞋賺萬五蚊?

1 : GS(14)@2016-09-23 08:08:03

上星期中秋,有好多朋友損手爛腳,不過就唔關煲蠟事嘅,只係有好多慘慘豬買咗iPhone7但又唔係jet black,搞到變成蟹貨,最後惟有自用或者轉手畀親朋戚友啦!越野兔4月已經講過,iPhone已經炒無可炒,識炒一定係炒波鞋!有水位有得炒都係只因一條黃金定律,「物以罕為貴」!今年9月初Nike開賣的經典Air Jordan1 Retro High OG「BANNED」2016版已經炒得沸騰騰,官方價1,299元,好多波鞋友都無緣抽到,據eBay最新開價,竟然高達3,500大元!不過,炒味最濃的已經唔係Jordan喇!去年Adidas Originals請咗美國著名Rap友Kanye West轉會合作出限量鞋Yeezy Boost,先真正上神枱,每次一出必定瘋搶,全球炒到飛起!除咗年中推出的Yeezy Boost750「Light Grey」炒至過3萬元外,另一較平民的Yeezy Boost350 V2亦將於本周六(9月24日)全球同步發售,官方建議零售價2,200元,仲要Adidas VIP先有得抽。專門店方面一早到咗貨,唔少關連人士都已經預留,eBay亦已開價,最高叫價17,062大元,一對閒閒哋賺15,000蚊!不少真用家都對於波鞋炒家恨之入骨,其中一個「犯眾憎」的是20歲華人炒家Allen Kuo,每次在公開發售前都會上載自己與大量新鞋合照。著名波鞋網Sneakerwatch今年6月曾經訪問過佢,佢表示自己讀書開始由賣襪起家,過去幾年間已賺取六位數美金收入。不過佢私底下唔係真鞋粉,平時亦唔會着Yeezy或者Jordan,覺得着嚟show off冇咩意義,賺錢好辛苦唔想亂咁使喎!越野兔唔反對炒賣,要大家你情我願先可以有價有市;但其實諗深一層,Allen講法亦不無道理,係時候分清楚「what you need」和「what you want」喇!越野兔
https://www.facebook.com/Sailorrabbit/本欄逢周五刊出




來源: http://hk.apple.nextmedia.com/financeestate/art/20160923/19778777
自成一格 自成 一格 一對 波鞋 賺萬 萬五 五蚊
PermaLink: https://articles.zkiz.com/?id=309675

自成一格:萬聖節消費學

1 : GS(14)@2016-10-28 06:21:25

一個人的收入有幾多,可以從佢有幾捨得洗錢喺無聊嘢上睇出來;同樣地,一個國家的經濟是咪真正好轉,亦可以從佢哋有幾捨得洗錢喺節日上。來到10月,美國大街小巷已經滿佈蜘蛛絲、南瓜燈,而平日空蕩蕩的萬聖節服裝店,放工時間熙來攘往,擠得水泄不通。作為消費大國,過時過節洗吓錢都好正常吖,今年美國女生最hit打扮成電影《自殺特攻》入面的小丑女Harley Quinn,服裝店一早賣到斷市又補貨。只不過今年興扮小丑女,下年又興第二樣,大部份人套衫都是買來着一次咁大把,下年咪又係買過新。咁搞法,到底美國人平均洗幾多錢喺萬聖節呢?美國零售業聯合會上月預計,今年美國人將會花84億美元,即係約650億港元在萬聖節上,平均每人消費達83美元(643港元),較去年74.3美元,增幅逾一成,亦都係近11年來最高。而萬聖節在美國節日消費排行榜中只佔第八位,最令到美國人荷包大出血,將會係11月尾的感恩節以及聖誕節,講緊全國消費額將會高達6,261億美元(約4.86萬億港元)!而家不少大型零售商都瘋狂請季節工,幫手食大茶飯谷行年尾條數!一次性消費闊佬咗,無謂錢洗多咗,購買力強咗,係咪反映美國經濟真的復蘇咗?等總統大選完之後,不明朗因素都掃除埋,睇怕耶媽12月都無藉口唔加息喇啩!越野兔
https://www.facebook.com/Sailorrabbit/本欄逢周五刊出




來源: http://hk.apple.nextmedia.com/financeestate/art/20161028/19814209
自成一格 自成 一格 萬聖節 萬聖 消費
PermaLink: https://articles.zkiz.com/?id=313782

自成一格:別低估Shy Tory的威力

1 : GS(14)@2016-11-11 08:09:26

無錯,越野兔今期都係講美國大選;過去一個月身在美國,基本上接觸美國的媒體以至社交平台,都是鋪天蓋地覺得希拉莉贏硬,特朗普無機會,臨選前幾日個股市仲提早升定慶祝,成件事個氣氛似層相識,就好似6月英國脫歐一樣,大家都太老定。有前輩覺得,2揀1一向是50/50,所以任何一邊贏都唔應該叫做黑天鵝,最多叫爆冷。到底今次結果係咪真係爆冷?越野兔覺得事情發展一早已經會係咁,只是大家被媒體及朋輩誤導太多。現今世代大家都會在互聯網上接收新資訊,你以為你知道的就是事情的所有,但好多時你所睇都只是隨你喜好口味,合心意先睇,慢慢地你個世界得番你啱聽的聲音,令你以為整個世界都係咁。身處民主黨的票倉加州,越野兔日日周圍問人揀特朗普定希拉莉,大部份民主黨人都話其實想要桑德斯,但二揀一的話勉為其難可能投希拉莉;相反,如果問到共和黨人,尤其是退伍軍人或者警察,都堅定不移的支持黨、支持特朗普,可能你問多幾句佢都講唔出點解,但總之就好堅定不移。證明了主流媒體或社交平台上睇到嘅希拉莉大勝,都係大家建構出自己想得到的結果,但現實投票的人遠遠多過所謂的主流意見;可能一直在郊區放牧的阿伯,根本就唔睇主流媒體又唔識玩facebook,但總之每一屆都要投畀共和黨囉。英國選舉中有個叫做「shy tory effect」,譯做中文可以叫做「怕醜的保守黨支持者效應」,曾經在1992年及2015年令英國保守黨在選舉大勝。民調睇唔到佢哋的意向,因「沉默的螺旋」效應,令到佢哋非主流意見唔夠膽講出嚟,於是不知不覺,呢一班怕醜的Tory就成功扭轉局勢,令特朗普爆冷跑出來。越野兔
https://www.facebook.com/Sailorrabbit/本欄逢周五刊出




來源: http://hk.apple.nextmedia.com/financeestate/art/20161111/19829560
自成一格 自成 一格 低估 Shy Tory 威力
PermaLink: https://articles.zkiz.com/?id=315036

自成一格:3.2蚊租架BMW去媾女!

1 : GS(14)@2016-11-18 17:22:14

美國西岸最大的車展LA Auto Show今個禮拜開始,越野兔有幸可以搶先入去睇新車,雖然各大品牌有成20架新車發佈,但越野兔覺得,最正的是寶馬(BMW)ReachNow計劃。
Reach Now是寶馬將旗下3系車款,以及Mini Cooper周圍泊供大眾租用,只要利用手機應用程式預約,30分鐘內前往取車即可,現時收費為駕駛時每分鐘41美仙(3.2港元),停車時收費為30美仙(2.3港元)一分鐘,不同地區有不同收費。咁樣計咪好鬼貴?其實仲有收費上限,3個鐘最多收50美元,12個鐘最多收80美元,24個鐘收110美元。最方便的是,唔使去到租車點還車,何時何地都可租車還車,而且價格已包含保險及油費等瑣碎費用。現時在美國紐約布魯克林區(Brooklyn)、奧勒岡州的波特蘭(Portland)及華盛頓州的西雅圖(Seattle)試行。其實在歐美地區,汽車共享概念已經玩咗好耐,最先由Benz的姐妹公司car2go於2008年開始,為了迎戰ReachNow價錢就減咗少少,最近仲進軍內地重慶,只不過越野兔就唔太鍾意,因為個車款係好鬼肉酸嘅smart car,你話租嚟溝女嘅話情何以堪呢……其實BMW早於2011年搞汽車共享DriveNow,無奈地在三藩市因法例問題而搞唔成;到今年4月全新的ReachNow才在西雅圖啟行,但話咁快就發展到3個城市,搞咁耐BMW都要搞呢個汽車共享,睇好未來呢個市場發展潛力,未來越來越多汽車品牌出嚟爭,到時仲邊使個個月供車保險牌費油錢丫,一時揸吓BMW,一時揸吓mini cooper,日日換晝都得丫!越野兔
https://www.facebook.com/Sailorrabbit/本欄逢周五刊出




來源: http://hk.apple.nextmedia.com/financeestate/art/20161118/19837198
自成一格 自成 一格 3.2 蚊租 租架 BMW 去媾 媾女
PermaLink: https://articles.zkiz.com/?id=316075

自成一格:Uber司機變ISIS炸彈人?

1 : GS(14)@2016-12-10 03:44:10

香港地方細,交通四通八達,加上的士霸權下,Uber司機唔算好賺錢。不過在美國,好似洛杉磯呢啲大城市,公共交通規劃仍然只停留在市中心,周邊城市根本上唔揸車去唔到,所以呢邊啲Uber司機個個賺到肥仔咁,但係賺到錢同時,其實好多司機都好驚驚。早兩日收到線報,話環球影城個地鐵站會有恐襲,全城警察軍人FBI都出動埋去守地鐵站。越野兔咁啱周末先去完,個地鐵站根本就搵個人望吓都無,你係恐怖分子都唔炸呢度啦!分分鐘炸完都無人知。當日同個Uber司機吹水,佢覺得遲早有一日,啲恐怖分子會搭Uber去放炸彈,又或者利用UberEATS送外賣功能,炸彈扮漢堡包送去最旺場的地方,然後一次過引爆,到時連派個人玩自殺式爆炸都唔使,直接叫個Uber司機去送死。佢嘅幻想其實真係有可能,事關上個月先係紐約拉咗個穆斯林Uber司機,想學尼斯恐襲咁搞紐約市。今個禮拜初,四間科網龍頭facebook、Twitter、YouTube及Microsoft手牽手搞個「Fingerprints」數據庫,想收集恐怖份子的資料,以及阻止有關訊息在網上流傳開去,只不過咁,恐怖分子有幾可會俾你收集到堅料?玩突襲、防不勝防先夠noise,所以派Uber司機做炸彈人真係遲早嘅事囉。越野兔
https://www.facebook.com/Sailorrabbit/本欄逢周五刊出




來源: http://hk.apple.nextmedia.com/financeestate/art/20161209/19859403
自成一格 自成 一格 Uber 機變 ISIS 炸彈
PermaLink: https://articles.zkiz.com/?id=318873

自成一格:美國保持青春秘方

1 : GS(14)@2016-12-30 08:13:11

第二次世界大戰後,不少發達國家都出現嬰兒潮,個個都好似豬乸咁大生特生,以美國為例,四十年代新生嬰兒超過3,200萬個,較三十年代增加33%;之後仲誇張,新生嬰兒以每年400萬個的速度增長,直至1965年才有所放緩,當時每10個美國人中,就有4個為20歲以下的年輕人;呢個情況除了美國以外,加拿大、歐洲、英國等發達國家都出現。數數手指,呢堆嬰兒到今時今日已經差唔多退晒休,加上醫療日益先進,平均壽命延長,搞到各大發達國家面對人口老化、生產力下降、福利開支增加等問題,一旦好似日本經濟泡沫爆破後難以復原,再被老人問題拖住後腿,迷失廿年都未迷完就足夠各國警惕了。除了日本,歐洲大國亦面對同樣問題,人口老化成為發達國家增長的包袱;以去年聯合國統計指,現時全球60歲以上人口就達到9.01億,加拿大、歐洲、英國甚至香港60歲以上人口,佔總人口近四分之一,比例上最多「老餅」的國家為意大利,老人佔總人口28.6%。奇怪的是,美國的嬰兒潮絕對不遜其他發達國家,但60歲以上人口佔比只有20%,在發達國家中偏低,最主要原因是龐大的新移民人口。現時美國的新移民淨增長為每16秒一個,其中最受歡迎的地區為加州。加州為全球第六大經濟體,要搞高科技可以去三藩市聖荷西;電影文化產業又有洛杉磯荷里活,接受多國語言,加埋天氣好到不得了,所以吸引到好多新移民,勞動力自然UP。美國總統參選人特朗普日思夜想,都想將新移民踢番家鄉,但偏偏整個加州都處於「I don't care」的狀態,警方表示拉非法移民唔關佢事;議會趕在新總統上場前,通過好多保護無證人士的議案,洛杉磯市政府仲出錢又出力,整咗個千萬基金,新移民如果遭遞解出境的話可以用來打官司,總之就擺明同特朗普作對;無他嘅,除了加州人好藍之外,他們亦明白,新移民才是生產力,如果真係踢晒無證移民出國的話,美國好快就好似歐洲國家咁,又老又無力了。越野兔
https://www.facebook.com/Sailorrabbit/本欄逢周五刊出




來源: http://hk.apple.nextmedia.com/financeestate/art/20161230/19880865
自成一格 自成 一格 美國 保持 青春 秘方
PermaLink: https://articles.zkiz.com/?id=320628

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019