劇突出被封「18女神」22歲江嘉敏：好開心
1 :
GS(14)@2017-02-12 13:52:36香港教育問題有好多敗端，之前有小學生喺公聽會上控訴學校功課量多、睡眠不足，學習壓力大到似俾「石頭壓住」，更有學生一度飲泣，但教育局局長吳克儉繼續話「會檢視」，上月仲宣佈全面復考小三TSA(「全港性系統評估」…呢個究竟係乜嘢名？)，但巧合名目叫「BCA」，叫大家唔好搞亂兩者。民怨四起，學生苦不堪言，吳克儉涼薄如故，例如話防止學生自殺委員會就大學生自殺的調查報告結論是「源於未做好生涯規劃」、又稱大專生在壓力下「有啲唔舒服嘅嘢就頂唔順」。小三TSA，中學又有DSE，無窮無盡的操練。無綫劇《親親我好媽》裡、飾演中六DSE學生嘅江嘉敏，劇中係「虎媽」江美儀大女兒嚴茜瑜，日夜操練受盡壓力。現實中，江嘉敏畢業於名校嘉諾撤聖心，樣子甜美，成為「18女神」，網民對佢讚不絕口。生於小康之家嘅江嘉敏，6歲起學習鋼琴，12歲時已達演奏級，歌唱舞蹈樣樣精。17歲主演香港鮮浪潮國際短片競賽最佳創意獎（學院組）得獎作品《野犬與貓咪》，2014年憑麥曦茵執導電影《曖昧不明關係研究學會》出道，另一作品是黃國輝執導的《此情此刻》，不時拍短片同MV，如吳業坤嘅《被單身的人》，電視廣告同平面廣告更是不可勝數，最為人記得應該係某品牌安全套廣告……愛‧無阻隔……咁樣樣。江嘉敏前日接受傳媒訪問時謙稱謂好開心多人留意自己，佢話﹕「迴響比我想像中好，因為第一次拍劇，起初都有啲擔心觀眾唔鍾意自己表現，好彩又冇，好開心。」曾有報道指，江嘉敏因為讀書時期拍私影，疑被同學睇唔起「咁少錢都做」，一度想過自殺，後因有其他同學安慰先打消念頭。江嘉敏稱報道內容「半真半假」，她稱﹕「我想澄清，我係冇自殺過，仲話我爸爸係的士司機，其實唔係，內容唔啱。」至於遭同學看不起，江嘉敏沉思半晌才說：「emmm....以前嘅嘢唔記得，唔想多講。」江嘉敏話自幼已經有好強表演慾，所以中學畢業後就入演藝圈，佢話﹕「讀書時經有教琴，影雜誌封面，細個已經好鍾意幕前演出，入行都有掙紮過，因為父母起初都會擔心，驚我學壞，但依家見到唔係玩玩吓，佢哋亦尊重我嘅決定，父母係我嘅支柱。(經濟支柱？)唔係，咁大個唔使。」
來源:
http://hk.apple.nextmedia.com/entertainment/art/20170212/19925889