袁偉豪被爆撻着張寶兒前度岑杏賢：戥佢哋開心
1 :
GS(14)@2017-08-17 08:12:2436歲袁偉豪(Ben)同拍拖3年嘅前港姐岑杏賢舊年分手，事後Ben多次爆響口話想復合，但有指女方態度強硬，「牙佬」翻撻冇望。不過做咗一陣「獨男」後，Ben感情終於有着落，新歡同樣係港姐，昨日有報道指Ben暗撻現年25歲嘅張寶兒(Bowie)，二人喺今年5月，出發到坦桑尼亞拍攝大台旅遊節目《打工捱世界Ⅱ》時，日對夜對火速撻着。返港後，二人繼續約會，戀情升溫，但有指Ben因為唔想太高調，令前度岑杏賢尷尬，所以一直只係同Bowie發展地下情。據知Bowie原本有一拍拖穩定嘅男友Jonathan，但舊年已告分手。現時換上新男友嘅佢，連facebook嘅cover pic都換上自己同Ben嘅合照，而二人嘅座駕，亦被影到喺電視城泊埋一齊「晒愛」。對於前度撻着同樣係港姐嘅張寶兒，岑杏賢昨日回覆傳媒表示：「有睇報道，不過唔知真定假，如果係真嘅，都戥佢哋開心嘅！」
來源:
http://hk.apple.nextmedia.com/entertainment/art/20170817/20123590